如果有留意兩聲道區嘅會員,應該都有睇過鎗王早前出咗個我諗係佢出帖以嚟最Cheap嘅包膠「不成比例的測試 MPS GOLF-205」。佢試完之後,即刻打比我叫我一定要試吓呢對喇叭仔玩AV嘅效果,我即時上網睇吓係咩料先!!妖!咁薄嘅音箱!咁細嘅單元!咁Cheap嘅身價!會有幾好嘢呀?!不過既然一向高要求嘅鎗王都讚不絕口,無理由唔攞番嚟爆吓佢架…

從鎗王手中接上呢對MPS GOLF-205,原本諗住咁嘅價錢一定係輕飄飄啦,咦?又唔係喎,份量一啲都唔少,保守估計每隻有接近十多磅。打開個盾牌形網面,見有Atohm高音單元,同埋一隻直徑5.25吋嘅中低音單元,而聲箱只有11.5公分厚,從外觀而言,我覺得比較適合做環繞聲多啲。不過鎗王話呢對喇叭仔堅抽得,全頻好平均,不妨將佢做前置試聽先,睇吓效果如何。既然鎗王力薦,我就順佢意駁去前置玩吓先。

********** 試歌篇 **********

雖然鎗王對佢有咁高嘅評價,但我一邊擺上我對書架喇叭上面時仍然有啲半信半疑。既然係咁,要解開我嘅疑團,就用幾隻黑膠試試佢水溫先。先嚟一隻Manger – jazz variants。呢對喇叭仔響應頻率係30kHz-80Hz,所以我唔會預期佢有好重嘅鼓聲,但可能就係咁嘅緣故,反而覺得佢有啲料到,當然相比起我對Revel M20有啲距離啦(音箱厚佢四至五倍),但係咁薄嘅音箱嚟講已經有喜出望外嘅表現。高頻方面果然係佢強項,開首果30秒鈴聲好鬼清脆,絕唔拮耳,但可能我對前置喇叭要就隻120吋銀幕嘅關係,喇叭擺放太闊令音場還原度不足,當我將喇叭向內各自搬入一呎半之後,相距七呎左右嘅距離GOLF-205即時似交番功課,樂器歸位。原本諗住聽一隻歌就開始爆戲嘅我,竟然身不由己咁攞多兩隻膠膠出嚟聽。好!再嚟The Dave Brubeck Quartet – Take Five,雖然套鼓細咗個碼,但抽擊力仍然不俗,Saxophonist同鋼琴嘅中高音,正如鎗王所講「好滑」。最後播放音響技術35週年 – 夜夜夜夜 瑭瑭,估唔到人聲都聽得吓,幾甜美,係音場比較窄一啲,以百事佬呢套兩萬零蚊嘅黑膠組合,GOLF-205可以話收晒貨。

********** 試影篇 **********

係時候入正題,既然佢有貨賣,我亦唔留手,繼續將佢做前置試試。今次全程用Dolby Atmos試機碟,揀咗有聲無畫嘅”The Encounter”同埋環繞聲十足嘅”Unbroken”。有嚟過百事影室家訪嘅會員都應該領教過呢段”The Encounter”,飛碟從上空降落到左前置,之後一條機械臂從左前伸到右後置,繼而再伸到左後置,最後沿路收回到飛碟再以超音速度升空飛離。喺前後左右穿梭期間,天花喇叭就擔起串聯嘅工作,雖然無畫面,但聽者只要閉起雙眼,就可以感受到整套系統嘅連貫性同超低頻嘅震撼。GOLF-205演繹飛碟降落時無疑係力感比較弱咗,係因為佢最低只得80Hz低頻唔夠所致,但整體音質唔錯,大音壓下亦甚少失真。我於是將原本前置分頻點由80Hz加到去100Hz,由超低音支援GOLF-205出低果浸,質感及力度即時好番好多,始終低頻係佢弱項,而且要同一對身價高出六倍嘅書架喇叭相比,輸係無可厚非嘅。

********************

有咗初步GOLF-205嘅AV表現,我再將佢放到後置取代B&W CM7試聽,當然首要工作係將後置分頻點調到100Hz啦。聽過一段”Unbroken”炮彈同戰機嘅左右穿插,GOLF-205同前、中置銜接得幾好,飛機從前飛到後縮小情況唔算嚴重,而且一收一放快速,中頻幾有料到,但我弱嫌佢高頻唔夠尖,要喺EQ方面加強幫佢一把,玩AV唔同聽歌,高音搶少少,聽起嚟會更過癮。

*********後記***********

講真,現今音響器材想搵到平、靚、正真係一啲都唔容易,MPS GOLF-205確係可以,又或者大部份可以(靚唔靚見仁見智)做到。同GOLF-205相處咗兩個星期,發覺佢嘅可塑性相當大,兩聲道AV兩食都有貨賣,聲音穩重,而且輕易做到離箱,大音壓下亦無箱聲問題,以價論表現,性價比非常高,就算配合佢身價六倍嘅前、中置使用都唔失禮。我真係有衝動集齊12隻GOLF-205(串聯雙中置),再加隻有質素嘅超低音喇叭試玩一下7.1.4,四萬蚊平玩組合,三甲非佢莫屬。

鎗王報告:不成比例的測試 MPS GOLF-205

  • 目錄