有留意百事佬出帖既網友都應該知道，百事佬最新既玩具係Anthem P5後級，不過今次同大家分享「笨」唔係佢有幾堅、有幾好聲，而係因為佢要用上兩條電源線關係，搞到我既三組獨辣電(共六個美式插)都供不應求，AV前級、兩部後級(3條電源線)、4K BDP、合併擴音機、Music server、超低音，計落剛剛欠一個插位。百事佬第一時間諗到喺現有既插座中拖手加多一個美式插座,但又突然諗起上次測試三部入門級電源處理器都對影音有正面影響。既然要投資，不如投資一個電源處理器吧！記得上次最得百事佬歡心既係中村製作所NZT-0600，不過佢得兩個位，而且仲要8K多，實在超咗我筆直。於是我致電解藥堂Gary哥求救，Gary哥了解過我既情況之後即時叫我落去佢舗頭，皆因有一個七個位、用上全新PLC專利技術，靜到無倫既電變式電源處理器，街價唔使6K，好適合我玩。既然Gary哥講到咁堅，而上次測試果隻NZT-0600又咁有料到，梗係唔會錯過版主既專利，一於借番嚟慢慢試啦。
拆開包裝，眼前既中村製作所NXP-001並唔似一般電源處理器，四四方方而且四邊有螺絲孔比用家安裝上牆，外表似足一個魚泵。攞佢上手秤一秤輕飄飄咁，佢真係有料嚟??? 唔係講笑，真係有D懷疑。正所謂「人不可以貌相、機不可以睇樣」一於抆晒AV前級同埋部碟機既P/C，測試一下佢既實力先！
4 x Analog；2 x Digital 設在電源處理器上方
另一個得兩腳既Digital則設在輸入電源既對面
如用跟機原裝黑雞線可用盡整個電源處理器
如用兩個IEC插的話，就會出現以上畫面
電源處理器四個角設有螺絲孔，比用家安裝上牆，呢點又真係幾體貼
器材:
YAMAHA CX-A5100前級
CAMBRIDGE AUDIO CXUDP
碟片:
線材:
Synergistic Research black電源線插前級
Acoustic Harmony電源線插播放機
跟機原裝黑雞電源線插NXP-001電變式電源處理器
首先將CXUDP插到Digital，CX-A5100依舊插到獨立電 – 弱音有少許加強，空氣感有所遞增，重低音層次感亦有略增。
之後將CX-A5100插到Analog，而CXUDP繼續插Digital -弱音進一步加強，定位更清晰，背景音樂更突出，整個音場豐富咗
最後將CXUDP插到Analog，再將CX-A5100插到Digital – 弱音更突出，低頻量增加，密度最強，遇上密集場面唔會有凌亂感覺，加大3幾個db都無失真情況，百事佬最滿意！
直昇機從由前面飛到皇帝位後，機葉聲音實淨唔少
飛彈係身邊擦過，微細弱音聽多咗，定位更著跡
機內響起警報，原本不以為意，當將兩部器材插到NXP-001後，整個氣氛都緊張起嚟
直昇機不斷打轉，密度高咗，包圍感都強咗少少
犀牛群撞向石頭既碎石聲，好微細，但都聽多咗少少
呢段背景音樂表現好似換咗另一套喇叭咁，成個音場撐闊咗唔少
寶石跌落撞到機身時既「叮」一聲，突出咗而且尾音都長咗少少
測試尾聲，百事佬攞條JPS IN WALL百事版嘗試谷谷個NXP-001睇吓會唔會再有咩突破，結果係…..分別不大！所以有興趣入手既準用家，大可以唔需要花太多筆直落去呢一部分。
後記:
同NXP-001電變式電源處理器相處咗接近兩個月時間，發覺佢好中性，器材無因為佢既出現而大幅度改變本身取向，只係將原本有既進一步放大比你聽，可能呢種就係設計者所謂既「靜」而產生既後遺症。心水清既讀者應該都會察覺到，雖然NXP-001聲稱擁有七個插位(4 x A；3 x D)，但實際上極其量只能夠插到三部器材(如用IEC插)，感覺上有D搵笨。不過如大家共當佢係一個三位既電處，另奉送四個插位比你插一D唔需要好靚電源線既器材，如LPS、Docking又或者黑膠唱盤或phono放大等等，用條黑雞線接駁，百事佬可以肯定比插一般牆蘇或拖板有更好表現呢！
報告裡面百事佬用咗唔少「聽多咗少少」、「長咗少少」、「強咗少少」、「實淨咗唔少」等等字眼好似唔係好實在，但當每個細節少少、少少咁加埋實質上係幾唔錯。如果閣下滿意自己套器材既聲音表現，但又想係唔改變聲底既情況下再進一步提升，不妨考慮中村製作所NXP-001電變式電源處理器。
