MPS

我一向用開NEOTECH NEI 3001做兩聲道 (世紀格雷CAS 去 luxman Amp) 訊號線相安無事, 突然條HIENDY林雪 (鎗王)失驚無神隊對NEOTECH NEI 3001 REFERENCE我, 話正過我原用果對NEI 3001好多, 包我一試返唔到轉頭。鬼唔知阿媽係女人咩, 我夠知新版正過舊版好多啦, 之不過我食樹皮時期仲未過, 邊度有多餘錢去升級線先得架… 林雪聽後竟然擺出一副代理相同講出代理一樣口吻: 試咗啱聽先比錢啦… 妖 !!! 又係呢招… 今次仲比對XLR我添, 你唔係唔知我部世紀格雷係RCA好聲過XLR既咩… 但當我打開個盒之後, 見到對線同插頭, 就好似鬼上身咁掉頭行咗去…

我從來都唔會研究D線同頭係點構造,因為睇咗都唔會明佢係咩技術同甚麼道理,所以都係聽過最實際,就搵呢三隻碟試吓係咪咁巴閉先…

插頭係OCC金版單結晶物料,真係靚仔好多

粉紅色線身,好鬼死「姣」

拮吓Luxman個pat pat先

由於線都係新到手,所以特以煲線機煲佢兩日再作試音。先選「愛聽陸寶」,無乜原因,因為對寶哥把聲太熟,現場及CD都聽過無數次,所以有任何轉變都好容易察覺得到;對比起舊線,呢對Reference 版本聲音密度更高,原本已係人聲低音炮既寶哥聲音更加雄壯有力,正因為聲音密度提升,人聲感染力更加強,中頻好有銅線的溫暖感以及濕潤感。

個人一直好欣賞張崇基、張崇德兩兄弟,曲風很有個人風格,當然唱歌技巧亦係毋庸置疑。今次試「二人之重唱」,全碟編曲不會太過複雜,有些少好似新派民歌的感覺。雖然兩兄弟把聲都有分別,但是唱異音把聲好容易「痴埋一舊」,3001 REF 既聲音分隔度做得幾好,當然都是比舊版更勝一籌啦;而一些樂器的聲音細節位比過住更為突出,聽得更多,估計是線身屏蔽及新插頭落咗唔少功夫。張氏兄弟大碟曲目都比較少用電子樂器,新REF 3001 可以展現到結他或者鋼琴一類樂器既活生感,聲音鮮明、生猛,所以感覺立體感又再推進一步。

最後試女聲, AGA – Ginadoll l,感覺清新爽快,唔會因為純銅線既關係而有拖泥帶水既感覺,低音線條及控制力方面都做得唔錯,聽流行曲既節奏感都能充分配合。

原本諗住呢對XLR比到既驚喜應該唔會太大,因為世紀格雷設計上係以RCA優先,XLR係細咗幾個db,點不知我將Luxman校大幾個db出嚟既效果仍然輕易擊倒對舊版。既然佢有料到,索性插佢落影音系統度睇吓又點表現先,唉!睇完LA LA LAND就可以肯定呢次樹皮期要加長,最慘係要加多對RCA版比LUX仔食呢… 死林雪,真係無好帶挈…

  • 目錄