序~

這一代的頂級線材, 雄霸了HIEND界的神線界別已久. 未能擁有者(好似我咁), 就繼續儲緊錢. 但對於一些已成屋都係既神級玩家來說, 的確有些[悶].

話雖然說我儲緊錢買神線, 但好在我勝在肥人好雙乳, 相識滿天下. 所以我都可以試盡這一代神線, 不論在我自己屋企套CHEAP機, 亦有拎埋D神線出去走遍全港九新界富豪級玩家家訪. 得出結論係, 誰也勝不了誰. 就好像在說, 現今造線技術, 好像停滯不前, 無法突破.

當然你可以話線材夾機, 機夾線材. 不同組合有不同結果. 每個牌子的特性, 絕對需要配合主人家的個人喜好, 聆聽環境與及器材.

但無法突破, 已經係事實. 所以我先夠膽寫個[悶]字.

早幾個月前, 網友超牛出左篇Taralabs Zero Evolution XLR. – 一賞心願: TARALABS ZERO EVOLUTION. 各位師兄係咪睇到流晒口水呢?!

話說小弟亦有緣測試這對TARALABS二佬 ZERO EVO XLR.

試過已心知不妙, 正想為佢寫多個Taralabs REPORT分享吓之際, 代理話比我聽, ZERO EVO只係二佬, 遲D拎對大佬ZERO GRAND MASTER EVOLUTION XLR比你先一次過寫啦.

就因為咁…我一等就等左成三個月.

前幾日, 收到電話話對ZERO GME XLR已到港, 老友仲話佢都未聽過我套機, 唔知夠唔夠班測試這對GME, 所以今次要上黎我屋企聽下套機既表現先決定比我唔我試喎. 超! 即管放馬過黎, 我對屏風出晒名衰聲, 絕對唔驚任何挑戰.

到手既GME重量十足, 我諗個雙地盒佔左大部份重量. 因為對GME既線身拎上手, 手感極柔軟. 唔會有之前ZERO GOLD抽左真空, 硬線身既問題. 至於粗度, 我估計係THE ZERO EVOLUTION既DOUBLE.

平衡接頭上, 依然用番ZERO GOLD既180度可調節方向既插頭. 詳情可到 Taralabs THE Zero Gold XLR 睇睇.

外觀唔多介紹啦, 你地都有相片睇到啦.

我地都係入正題啦. 佢既表現如何? 可以令我夠膽用到超極限這三個字去形容?

屏風, 由兩年幾前玩第一對1.7開始到依家用左成兩年既3.7, 用全套膽機ARC推屏風, 我覺得人聲偏乾是屏風的弱項, 一直以黎我都不斷搵緊不同附件去增加水份, 當用到CARDAS CLEAR插前去後級, 我諗這是已最有水份的表現了. 後來再加入GURU XLR, 在中低頻段再添加了肉地. 我開始覺得有小小滿意了.

當對GME插在我套ARC CD8 + REF.5se, 播左一首人聲, 我偶像羅敏莊小姐既大碟”愛是無價”第一首 – [無價]. 我呆左, 羅小姐在唱這曲[無價]時侯的豪邁既心情, 佢想表達友情既意思, 完完全全咁喺我套屏風展現出來. 再聽真D, 全頻既質感密度起碼三級跳. 無論我幾鐘意我現用這對GURU XLR, 都不得不承認, GME真係高班好多. 當然, 以二萬幾既XLR去PK一對定價25萬既XLR, 雖敗猶榮.

聽完偶像隻CD, 再聽埋EVA姐隻LIVE AT BLUES ALLEY, 第九首AUTUMN LEAVES簡直係我最近最愛試音既歌曲. EVA姐把聲未出, 現場一樣既空氣感包到我張SOFA背. 黐晒線既音場包圍感再一次另我”O”咀.

TARALABS既空氣感本已是強項中既強項, 但這對GME在空氣感上, 竟可再上一層樓.

聽完EVA姐隻LIVE AT BLUES ALLEY, 我連古典都費事聽. 以我記憶, 出現過在我屋企既神級線材, 都未有今次既提升咁有震撼感覺. 而我為左引正我的記憶, 我立即甩番對GME出黎入番袋, 我決定用這對GME去PK現今所有神線.

至於大家最想知既結果, 就交番比有機會聽過既網友, 由佢地自己講番佢地既感受, 我諗大家會更有體會.

所以今次我既REPORT, 到依度就完左我果PART肋, 其他就交比其他網友自己寫下感受啦

 Link: http://www.hiendy.com/hififorum/forum.php?mod=viewthread&tid=78719&extra=page%3D1

The Zero Grand Master Evolution XLR 1.5M,
定價 – $250,000