MPS
racewong report – AirTight ATC-1 & ATM-3
http://www.hiendy.com/hififorum/ … hread&tid=85493

睇完鎗王版主”AirTight ATC-1 & ATM-3″的官方測試報告,結尾講到ATM-3推屏風喇叭係錯配,於是忽發奇想,推平胸唔電,唔知推我對法蘭西大波妹(Elipson 4240 Millennium)電唔電呢?   即刻whatsapp版主,問佢可唔可以借套AirTight嚟玩下……  本來想先聽下套機係版主屋企嘅表現,然後可以比較係自己屋企有乜唔同,可惜佢話已經pack箱了。(唔通真係咁唔電?!)

某日放工前,突然收到版主whatsapp, 問我放工後得唔得閒上佢度聽下機,然後搬套AirTight返去。(吓!乜唔係代理送貨咩? ) 不過,既然未去拜訪過版主大人,就趁機去聽下佢玩屏風喇叭啦……
話說係版主家中聽聽下機,竟然有朋友來訪,後來方知那位仁兄老遠從港島揸車過來九龍, (呢D咪叫發燒囉!)後來那朋友更幫手車套AirTight去我屋企,真係唔話得。

*     *     *

既然有幸借套AirTight前後級,而自己手上又有粒AirTight PC-5唱頭,咁無理由唔借部AirTight phono amp返嚟玩下全套吧!  於是週末已急不及待親身走上代理Guru取貨了。

返到屋企當然即刻駁晒全套機試試啦。當時在「火鳥」上裝有兩支臂,其一是SME312S配Ortofon Cadenza Bronze, 而另一支是朋友的Graham Phantom II 配 PP-1000唱頭,因為部phono amp ATE-2005只有一個MC輸入,我隨手接上PP-1000,一落針……   點解聲音「斯文」得咁緊要嘅? 於是即刻上代理個網站搵下部phono amp嘅資料……
吓! MC個gain只得53dB ()  今次瀨嘢了!個gain咁低,點玩呀?  唉!都怪自己新手一名,無做足功課啦!  (PP-1000的輸出是比較低的,只有0.29mV)
既然PP-1000唔夾,就試一試輸出高一點的Ortofon Cadenza Bronze吧! (輸出0.4mV)…… 都係唔滿意。

最後機會,亦係今次借AirTight的主要目的,就是試一試用同廠的PC-5唱頭,其輸出應該有0.55mV. 這粒PC-5是一位朋友轉讓給我的,如果你找它的資料,想信不會多,它可能是PC-3的前身,再上就是PC-1了 (0.6mV),另外還有一粒旗艦唱頭, 外型令我想起黃金戰士的PC-1 Supreme (0.4mV)。
既然要換唱頭, 一不做二不休, 就出動這個吧!

結果如何? 稍後再講, 先簡單介紹今次借來的AirTight器材:

AirTight ATE-2005
這台獨立唱放, 提供1個MC輸入和2個MM輸入, 沒有什麼可以供調校的設定, 用3支12AX7 (ECC83) 膽管, 內部線路相當發燒, 分開四個獨立部份, 把MC放大, 膽管線路, EQ放大和供電分開, 以減少相互干擾。
在不同網站的資料, 對ATE-2005的說明有點出入, 我唯有自行理解如下: (有錯請指正)
MC輸入的話, 阻抗固定為100 Ohm, 增益為30dB
MM輸入的話, 阻抗固定為47k Ohm, 增益為53dB
你可能會問, MC的增益只有30dB, 怎麼夠用呢? 對我來說, 這並不奇怪, 因為我自己用的Ortofon EQA-999的規格也是差不多的說明, 而配合Ortofon唱頭是完全沒有問題的。總而言之, 聽聲收貨就是了。

AirTight ATC-1
這是AirTight的入門前級, 總共用5支12AX7, 附有內置唱放, 不過只供MM唱頭使用。內部線路完全沒有用PCB, 全部以人手焊接。

AirTight ATM-3
這也可以算是AirTight的入門後級吧, (以mono block計,) 所用的功率管是6支6CA7 (EL34, KT77), 可以選擇用三極或五極放大, 而輸出是55W (三極) 或 110W (五極)。調節三極或五極是需要打開上蓋的, 我借來測試的器材一向不會打開機蓋, 所以就按原本的三極放大設定, 聽講是比較靚聲的。

*     *     *

好! 換了唱頭PC-5, 用同一國籍的唱臂IKEDA IT-407 CR1搭載, 既然鎗王版主話唔爆得, 我就一於用隻火鳥去試一試…..

聲音的確是正常了, 不過, 白噪音(CC聲)似乎太明顯了吧!  於是問問朋友和高手們, 當然又是反問我一堆問題啦.  終於找到後級ATM-3上的這粒制…

可能是鎗王的屏風喇叭需要吧, 那ATTENUATOR被扭到Max. 於是, 我嘗試扭返細一點, 白噪音開始減少, 最後要扭細一半, 而前級的音量制也需要配合扭返大一點。這下子終於算是調校完畢, 可以坐下聽聽音樂了 。

以往聽膽機的感覺又返來了, 那種膽機的獨特音色, 溫暖感, 通透度, 殘響的餘韻…… 實在令人著迷。聽火鳥又如何, 我覺得完全可以收貨, 不過, 低頻的衝擊力, 是比石機後級差少許, 如果可以調到五極110W的輸出, 我相信會是另一種感覺。

又試一試聽流行曲和爵士樂, WOW! 好像從沒有在我這組合上出現過的活潑和彈跳感, 正!
聽大提琴的時候, 我特別喜歡那種擦弦的質感, 或者叫松香味吧; 聽爵士音樂, 例如那隻”牛筋四人幫” (The Bass Gang), 又或者當舖爵士 (jazz at the pawnshop), 都有很好的表現, 這種音色, 是因為我換了IKEDA唱臂, 還是用了AirTight的膽機呢? 應該兩方面都有影響吧! 總之, 我借器材返來玩, 調整好之後, 我就會專心去聽音樂, 畢竟, 這樣的組合以後未必再有機會重聚了。

*     *     *

整體上, 這套組合的確唔錯, 尤其當AirTight唱頭遇上AirTight唱放的時候, 果然有種協同效應似的。 如果問我有什麼不足之處, 也許是爆到好大棚嘢嘅時候, 好像欠了少許君臨天下的氣勢, 那種穩如泰山的感覺, 唔通又要好似鎗王版主所言, 要出動到呢對?

  • 目錄