佢高傲, 但是宅心仁厚.
佢低調, 但是受萬人敬仰.
佢可以將音響器材運用得出神入化.
佢可以擺出堪稱[聲之藝術]既超立體音場.
佢究竟係神仙既化身, 定係地獄黎既使者?
無人知!
但可以肯定, 每一個人都稱呼他一個稱號~~~~~~~~~~~八爺!

哈哈哈!!! 我未試過用星爺既經典對白作開場, 但一諗到本文主角, 腦裡彿然諗起食神這段台詞.

我初玩HIFI已認識的老朋友, 佢可以話係我HIFI既啓蒙老師之一, 由第一次上去佢屋企家訪, 令我知道立體感可以到咩程度.

家居篇

網名7308, 老友們都稱呼他叫八爺.

大家先睇下7308既家居環境.

八爺既聆聽環境大約9 X 23尺, 小L型廳, 最大鑊係大門位置係一個小三角位.

而八爺就巧妙咁用左兩幅落地窗簾布將三角型入門位隔開, 從而形成一個完美的長方型廳.

我問過八爺, 落地窗簾質地只是一般酒店既遮光窗簾, 並無咩特別選擇.

器材篇

CDP – DENON DCD2000

NETWORK PLAYER: CAMBRIDGE 851N

前級: AMP

後級: RAVEN

化震板: RINGMAT

線材: 無牌子.

喇叭: TAD 2201

聽感篇

上到八爺屋企, 佢老人家一定會拎幾隻80年代廣東歌出黎嚇下到訪者先.

這張CD就係佢既至愛 – 張德蘭喺陸小鳯既插曲: 落花淚影

聽完我先明白點解張德蘭果時可以咁紅, 佢把聲原來可以好好聽. 八爺套機竟可播出張德蘭在每句歌詞既情感表達得淋漓盡致. 張德蘭既立體感已經唔再係咀型細唔細既膚淺要求, 佢既立體感強到可以見到張德蘭個表情變化, 都可以表現出來.
加上配樂的質感與分隔度, 令我唔相信這頂級音質音效係由這套入門組合發出.

經曾, 我最記得八爺有句格言, 玩兩聲道立體聲, 最基本係[立體感], 要做好立體感, 才談論到音色吧.

除左人聲, 當然唔少得小提琴獨奏啦, 只要聽過八爺套機播小提琴, 就會知道咩叫微動態. 咩叫分析力, 咩叫音色.

我第一次喺八爺套機聽小提琴時, 打死我都唔信這套入門級組合可以播出這無可挑掦既音樂.

以我聽過好多過百萬器材, 甚至超過三四百萬既組合, 若單以立體感, 微動態, 我可以好肯定咁講, 未有一套可以超越八爺.

除左以上既強項外, 另一隻必播CD係LIVE IN JAPAN. TAD2201既小單元完全發揮出小喇叭專有既速度感.

當然, 如果你硬要挑掦這套組合, 我只能說播放大爆棚古典時, 是缺少了超低頻墊底吧.

但以這對2201書架仔黎講, 佢已做出超身價表現, 超低都係留番比D大喇叭啦.

心得篇

講到依度, 我諗大家都會問, 咁八爺既擺位功力如何了得? 對於喇叭擺位學問上, 有D咩可以分享下先?

有關八爺既擺位學問, 我都問左佢好多次, 有無程式可以分享? 用開咩碟黎試擺位.

八爺話, 擺位沒有程式可言, 只能用耳朵, 加上佢既經驗. 就能擺出聲之藝術. ……..妖! 鬼唔知聽歌搵對耳仔聽咩? 有無D實際D既心得分享吓呀?! (火爆MODE )

結果, 比我打左十幾下心口後, 八爺淡淡地, 幽幽地講出數句金句 – “只要SET到個人聲口型聚焦喺兩對喇叭中間, 離地大約五至六尺既高度. 基本上音場既平衡度已做到八成了. 剩餘既兩成, 只能靠經驗, 根據每個聆聽環境, 作出微調, 令口型更細更聚焦, 三頻更為平順.”

咁八爺可以分享埋平時幫老友擺位, 係用咩CD作為工具呢?

八爺: 你剛才所聽既”落花淚影”, 就係我用黎擺位既唯一CD. 主要原因係我聽得太多, 聽得多, 自然知道張德蘭及配樂的位置, 口型大細等等. 所以我自己及幫老友擺位, 都係只用這張CD作為擺位工具.

秘技篇

立體感就可以靠擺位擺出黎啫, 但以八爺套機既班次黎講, 我到依家都唔相信能做出剛才我所聽到既微動態, 無可挑掦既音色. 仲有完美既超高頻.

八爺話秘技就在於墊機的RINGMAT板及水松木. 每加一層都有唔同較果, 就連個小小拖板, 八爺一樣使用三粒RINGMAT水松木墊起.

八爺仲即場示範左, 將拖板果三粒水松木拎走. 播同一首歌, 可以立即由萬里無雲變成暗淡無光.

當然仲有門口既落地窗簾啦, 只要由中間拉開少少窗簾, 人聲既立體感立即散晒.

同場加影 – MQS篇

MQS, 近期熱門到爆既音樂FILE. 當我聽完八爺部DENON DCD2000後, 佢話最近迷戀玩MQS, 仲即場播左幾首ALAN TAM, 陳慧嫻, 蘇芮比我聽.

佢使用一部入門級一體過既 CAMBRIDGE 851N. 並將四隻MQS抄入851N HARDDISK. 就係咁簡單, 就可以開聲了.

說實話, 單以HIFI元素來說, CAMBRIDGE 851N 加上MQS, 並未能超越一張靚錄音既CD由八爺部DENON DCD2000播出咁立體, 咁細緻.

但MQS這幾張FILE, 正正就唔係賣HIFI元素, 佢既賣點係原音! 當我在八爺套機聽到陳慧嫻既[玻璃窗的愛], 我可以好清楚聽得番陳慧嫻初出道既少女情懷, 我好快可以進入我O靚仔溝女果時既年代. 我諗, 這正正就是MQS原音的威力.

八爺驚我唔死, 下一首播既MQS係ALAN TAM既[亮了紅燈]!….我聽左大約一分鐘, 就起身唔想再聽落去…原因係這首[亮了紅燈]快速令我進入廿年前被女飛既情景, 眼淚不受控制咁滴左兩滴出黎…

妖! 我堂堂肥鎗版主, 點可以喺八爺面前流馬尿, 所以聽左半首[亮了紅燈], 我就叫八爺STOP, 我唔想比人見到我流馬尿既樣!!

就係因為這兩首歌, 竟可以令我快速進入廿年前既情景, 單單就這份[感覺], 我決定要搵部好似部851N咁既全能NETWORK PLAYER放喺屋企, 自己一個人慢慢想當年, 想起被女飛既種種感覺!

後話~~

在本文中既家訪篇及器材篇相片中, 已將八爺既秘技全部影晒出黎. 你又可以在這幾幅相片中吸收到幾多呢?~

~~~~~~~~~~~~~~~~~~~~~~~~完~~~~~~~~~~~~~~~~~~~~~~~~~~

http://www.hiendy.com/hififorum/ … id=88197&extra=

Categories: Feature, 家访世界区
  • 目錄