家訪活動在音響界實在平常, 相信大部份人都經常參與或組織這類活動, 但對我個人來講, 第一因為小弟工作時間長, 又不定時, 再加上工餘時閒所淨無幾, 很多時候放工還是選擇回家休息, 靜靜地聽下歌仔, 但今次家訪的主人, 就住在小弟屋企附近, 他不是使用什麼天價器材又或是換機狂熱份子, 而是一名青年才俊, 有品味¸有學識, 又懂得欣嘗音樂的釘sir(DT825), 當然他最為人熟悉還有他對黑膠唱片版位知識及熱誠。
話說某日釘sir、大C、咪爺去完才子的家居試音室，就直入有大埔毒氣室之稱的釘Sir家，可惜小弟未趕得上參與這趟家訪
好彩一直在手機群組有跟幾位聯絡，當然馬上要求佢地現場直擊報導啦
才子：「我可能都算釘Sir家的其中一個常客吧，自從三年前第一次去家訪認識釘Sir, 大家傾得投契，於是一直保持來往，每每有器材變動，或興之所至，都會去找他聽聽音樂、吹吹水和飲返兩杯，回顧三年前的器材，跟今時今日的已經有相當的不同了。
http://www.hiendy.com/hififorum/ … hread&tid=47076
今日的器材：
Accuphase DP-550, 因為主力玩膠，CDP算是downgrade了一點點吧
JR Transrotor Rondino (Phantom Supreme & Morch DP8 + P1 & PP1000 & PP Mono), 唱頭跟初時升級了不少
ASR Exclusive， 由YS Audio的Concerto Plus來一次跳升
Soulution 720，我覺得是整套組合中最有驚喜的一項升級
Soulution 710，寧捨711而取710，只能說，在這套組合中明智的決擇
Kharma Exquisite Midi，始終如一 
釘Sir所調校的音色是我喜歡的類型，尤其是聽古典的樂曲，弦樂的質感對我來說是充滿劇毒的，釘Sir最喜歡Kogan拉奏的小提琴，每每播放Kogan的唱片，都令我浸醉非常。在玩黑膠方面，釘Sir對我也有很大的影響，這個我在之前的家訪中已經分享過了：
http://www.hiendy.com/hififorum/ … hread&tid=69118
換上Soulution 710，配合720就是完美的一套西裝，跟我第一次去家訪時所用的Audio Note M6 配McIntosh MC601已經有很大的差別了。現在的音色，簡單來說，味道較淡，可以說比較中性，速度爽快，高低頻的伸展更大，自從換了Soulution, 連超低也不需要了，令我最深刻的是背景的寧靜和細緻的微動態，這個在播放小提琴時特別吸引，由此可見，主人家確知自己的音色喜好而有能力向著正確的方向去 升級和調校，果然有高級管理人員的風範！」
咪爺：「初次與釘Sir見面，果然外形俊朗，衣著入時，而且消費力驚人，是公認的青年才俊
剛步入釘府就被那既簡約又有品味的裝潢設計所吸引，大廰既寛敞又雅緻。不過雖然裝修簡約，但背著落地玻璃大窗的一套雄据接近三分之一個大廳的音響組合就絕 不簡單。JR唱盤，PP1000唱頭，加上Soulution 7系配合Khama midi喇叭，實在令人非常期待可以欣賞美妙音樂
主人家殷勤的招呼小弟坐在那Designer Chair皇帝位中，名盤、頭版一張接著一張，種類應有盡有。Soulution 前後級小弟已在不同組合中欣賞過多次，其中最喜愛便是他的中性、速度及良好的控制力。
今次在釘sir家中亦無例外，再配合上黑鑽高音無論在兩極延伸、起伏動態、透明度和重現現場空間感的能力都令人信服。整個組合呈現出一種不急不躁，既穏定 又冷靜的表現方式。Time out的爵士激情，白頭佬的慷慨激昂，Diamonds and Rust in the Bullring的現場空間感絶對難不到這套組合。
特別是小提琴的拉弓擦絃粒顆在Khama黑鑽石高音下絕對清晰可聞，不會過份美化了音色及保持了應有質感。大合奏的動態、氣勢和上落起伏更是 Soulution的拿手好戲。主人家為組合的源頭配上 PP1000和PP mono，兩者的略甜微暖性格亦為女聲加上一點柔美色彩。當然，不喜Soulution這種直白情格的亦大有人在。
最後值得一提的是釘sir的皇家芭蕾還是原裝頭版，小弟還是第一次觀其真身聽其美音，以其高昂身價，這樣播放一次的費用可能比請小弟食一餐飯還要昂貴，一笑。」
大C：「毒釘大埔毒氣室已去過不少次，主人家釘釘可說是一名膠痴，無膠 不歡，我諗佢自己都唔記得自己有幾多隻名盤，釘釘先來一張For Duke 嘩！Jazz音樂的明快節奏，鋼琴鏗鏘像真，鼓聲定位出奇地準，低音線條一聽已是非常上乘，金屬聲音所表達方式不愧是歐洲名器所出的仙音，跟著再來現場錄 音的鬥牛場，Joan Baez 一曲Let It Be彷彿身處現場聽清唱一樣，喉嚨所發出的聲音密度，女聲所發出高頻無遠弗屆，我又一次比粒黑鑽高音所迷惑…………心情未平復之際釘釘攞隻頭版The Royal Ballet，播放其中的胡桃夾子，那種自然耐聽不是平時所聽開的Classic Records可比到。我只可以講每次去釘釘屋企家訪的確是件賞心樂事，但又非常大壓力，佢調教所出的音效是集現代HiFi友想要的原素。試問邊個 HiFi友唔想得到，但如果問我有無改善的地方，以我個人的口味，我希望可以在重播古典音樂方面有更大的氣勢就更好了，而人聲再加小小味道耐聽一點（可謂 係剛吸過Kondo膽機毒後遺症吧！），但百人玩百機就有百種好聲的理由，只係小弟的聽感而已！」
聽完眾兄弟嘅直撃報導輪到小弟分享一下，其實小弟不久前都曾拜訪過釘sir一次，而且是相當特別的一次….
前傳 ：一首金曲 張德蘭 – 落花涙影
在一次偶然機會下, 透過手機群組認識了釘sir, 於是大家經常有機會透過網絡, 討論及請教釘sir玩音響及聽黑膠的知識, 真是獲益良多, 同時一直想請釘Sir到小弟府上作客, 交流下心得, 但由於時間上難以安排, 相約左幾個月仍未能一睹釘sir風采, 直至幾個月後的一天早上, 剛好又在群組吹水, 得知釘sir當日休假, 並相約左一位高手前輩到其家中作客, 巧合地小弟又不用上班, 於是即刻拉衫尾上去學下野!
第一次見面釘sir果然一表人材, 外表文質彬彬, 青年材俊一名, 傾落又健談, 講到玩Hifi或聽音樂既理念仲非常理性, 例如每次更換器材, 除了考慮價錢外, 器材數據的分析等等, 最重要還是要跟他原有器材配合得宜, 能否在沒有離地的價錢內物色到心儀器材, 不只是追求市面上所謂的名器。
講到黑膠更是釘sir毒(獨)到之處, 無論是對版位, 曲目都有很高要求及深入的認識, 當中除了水源(金錢)要充足外, 尋覓既過程肯定花不少時間, 當然相信釘sir一定享受這個過程, 否則如何投放大量時間與金錢!
心急人的我, 吹水完畢澎澎聲上釘sir屋企解下毒先, 家居環境音響器材留待下半部份先為大家介紹, 見釘Sir從房中只攞出一張頭版陸少鳳CD, 心想釘sir吾係掛, 雖然小弟家訪經驗甚少, 但只聽一曲的家訪還是第一次! 了解後, 原來今次釘sir約呢位高手前輩來係微調喇叭攞位, 咁小弟唯有乖乖學野。正當我以為聽大俠陸少鳳, 原來我又估錯, 釘sir一按搖控, 喇叭播放出來的是張德蘭姐姐的＂落花涙影＂, 由於當時只是啱啱開機, 初步開聲聽感, 感覺有小小焗促, 三頻較混濁結像較濛, 於是大家一邊吹水一邊欣嘗下器材, 除著時間慢慢過去, 在repeat 又 repeat情況下, 德蘭姐姐的歌聲越來越甜美, 大家已感覺到整套系統慢慢進入狀態了, 期間高手前輩同釘sir一邊播放, 一邊將喇叭前後左右推來推去, 好似搬龍柱咁, 當中我當然搭下咀, 請教喇叭擺位嘅心得, 最後經一輪努力, 高手前輩終於揾到理想位置, 將音場結像兩方面取得合理平衡, 在聽感完全係兩回事, 德蘭姐姐的唱腔非常甜美圓滑，咀型結象恰到好處, 整個音場好有舞台感, 整首＂落花淚影＂由喇叭播放出來效果自然, 好有果種淒酸既氣氛同感染力, 所以要將一套器材玩得好, 唔係只講錢, 仲要好似釘sir咁有金耳朵, 有經驗, 有心機, 雖然今次是一曲家訪, 但真係學到野。
回歸正傳
聽完才子、大C和咪爺的家訪報告，我真係想拋下工作馬上去會一會，但我這基層員工，時刻要堅守崗位，唔似得那些做高層的朋友，可以隨時唔使做去家訪…..
其實小弟用的唱頭跟釘Sir一樣，都是Phasemation PP-1000, 但一直玩得唔好，自從在釘Sir家親耳聽過PP-1000出的靚聲，一直耿耿於懷，於是狠下心入部Burmester 100唱放。上次雖然只聽了一首，不能作準，但始終各人有自己的口味，雖然好聲，但未算是自己非常喜歡的那種音色，於是……
Burmester 100 phono
在才子他們家訪完，我便馬上再約釘Sir, 而且把100也帶上…… 
幸好釘Sir是位謙謙君子，容許我在他那套高貴的系統上試試100配搭1000的表現。
家訪當日試音碟 :
(1) Bill Berry And His Ellington Allstars – For Duke
(2) Diana Krell – The Girl In The Other Room
(3) Michael Jackson – Thriller
(4) Stokowski – Rhapsodies
(5) Dire Straits – Brothers In Arms
(6) Al DiMeola, John McLaughlin, Paco DeLucia- Friday night in San Francisco
用B仔100試聽左以上幾隻膠，感覺上整體係活潑生動, 速度適中, 人聲表現清秀, 三頻表現平均, 彈跳力及鬆容度一流, 低頻表現下潛力恰到好處, 加上整套系統表現出來的現埸氣氛，感染力實在一流水準, 釘sir原本用嘅ASR phono係比較豐滿，B仔相對就較為爽快直接絕不拖泥帶水，整體說迼系統給我的感覺是經過主人家細心的調較及配合，卡馬黑鑽高音果種高頽穿透力真係好毒 但音效並不誇張，配合Soulution從喇叭播出來的音樂，讓你絕不想將皇帝位讓給他人!
至於釘sir自己又點睇呢？
釘sir: 自己玩機只有十數年光景所以跟呢度很多高手相比只係半桶水，當年由第一部Krell合併機推ProAc書架開始，之後馬仔，AA，MSB，MBL，鹿仔， 威士，EmmLab，金仔，Mark仔，Union Research，Boulder，Audio Note，Densen，老麥，輾轉去到現階段Soulution，其實追求嘅都只係一點點音效上嘅改善或者音色上嘅改變。大家都知兩聲度看似簡單但其實 器材匹配變數甚多，房間音效影響甚大，再加上主觀感覺，要攪出自己喜歡嘅聲音真係得來不易⋯⋯還有這年頭資訊科技發達會遇到更多機會分享交流，自己抵抗力 低嘅就痕癢症易發難解之後自尋煩惱囉！ 不過幸運地咁多年音響歷程行得頗為順利嘅主要原因並唔係甚麼高端器材，而係背後有位十分支持自己尋找理想音色嘅另一半呀⋯⋯
其實現階段無乜要求，主要係揾下名盤享受音樂，至於器材配搭自己嘅心得係＂沒有絕對靚聲或衰聲嘅器材和線材，是乎用家如何配搭並配合聆聽環境去發揮佢最佳表現啫⋯⋯＂
睇完釘sir嘅分享係時候講拜拜，下一站是……
待續⋯⋯
http://www.hiendy.com/hififorum/forum.php?mod=viewthread&tid=94074&extra=page%3D1
