大家知道我玩屏風都玩左四年幾, 學好多前輩話齋, 一玩過屏風, 好難返得轉頭.

我與這次家訪的屋主的第一句說話, 就由此已起.:

屋主回覆我一句, 要贏到MAGNEPAN 20.7的喇叭, 以依家的音響售價, 唔到六十萬都唔駛旨意全面贏佢.

而我作為MAGNEPAN 3.7用家, 深感贊同.

記得上年中, 到代理吹下水睇下HIFI雜誌偷下師, 無意中發現音技有位寫手都係屏風用家, 仲係用到MAGNEPAN 20.7. 當時我立即叫代理介紹屋主比我識,因為我想去家訪依套屏風. 可惜大家各有各忙, 一約已是大半年後的2017年3月.

本來大家都已忘記此事, 有日到膽王吹水聽歌, 問下膽王老闆兼老友既MARK哥, 對新款KT120 APOLLO到貨未? 我想試試APOLLO推屏風的威力.

點知原來MARK哥話我遲左一步了, 對APOLLO已經送左去音技寫手之一的登勤屋企作測試了用. 咁我當然打蛇隨棍上, 要求家訪登勤兄的大屏風啦.

大家見到登勤的音樂室, 簡直就是發燒友夢寐以求的聆聽空間, 獨立大屋, 地下果層就係HIFI專用房, 全房以兩層磚牆作隔聲之用, 此舉除了為左令個音樂室更為寧靜外, 其次就係為了鄰居設想, 就算半夜三更大爆棚都唔會噪到人.

音樂室的冷氣部份都是安裝在室外, 再用通風喉抽風. 所以我一入到登勤依間房, 第一感覺係勁靜, 但靜得黎又唔會靜到耳鳴. 唔知係咪皇帝位外果兩部空氣清新機的勁微弱聲音中和返. 等對耳仔唔駛咁辛苦.

今次, 我沒有訪問屋主的發燒年資, 發燒故事. 因為我已被眼前的發燒器材所吸引. 大家先睇睇屋主使用的器材/線材先啦.

CDP 二嫂SACD PLAYER,

OPPO BLURAY PLAYER (FILE DISC)

Chord DAC

JR頂級陀飛輪,

 

LINN LP12,

全套頂級貴豐,

另加ROGUE APOLLO MONO. 推動出名大食婆的MAGNEPAN 20.7.

 

 

大家千其唔好似為屋主使用BI-AMP推20.7. 最新一代的屏風.7系列, 已經沒有了BI-AMP輸入. 再睇下屋主對屏風使用的JUMPER, 在中頻的Resistors, 佢竟然使用番MAGNEPAN原裝JUMPER, 而高頻方面, 佢就使用了duelund cast 1 ohm電阻. 而FUSE方面, 兩粒都使用Audio Magic Premier Bees Wax SHD-“Super High  Definition”. 這品牌我還是頭一次見.

全部線材使用Vertere. 這亦是比較少見的, 因為去到屋主的器材級數, 好多都是使用不同品牌的線材去調效自己口味, 全SET用晒同一品牌線材的用家真的比較少見.

 

還有一個十分有趣的小道具, 就是使用乒乓波作墊材, 用於墊在喇叭線上. 聽屋主講, 這個乒乓波真的能夠加強空氣感與分隔度. 使用方法就如下圖般, 使用蛇王DF-SS, 中間放個乒乓波墊住條線. 大家如果搵到其他方法HOLD實個乒乓波, 都可以試試唷.

HIFI RACK方面, 我見屋主用晒本港品牌HO’S, 厚厚的亞加力膠板, 加上純鋁柱身. 而最吸睛就係中間個來自HO’S特訂裝的全實心紫銅HIFI架, 上面就放左個大碼零震台, 上層就用普通SIZE的零震台墊部二嫂.

今次的家訪, 總四人, 我, MARK哥, 屋主登勤. 另外還有一個大毒友, 在音技專門寫碟評的STEPHEN大哥.
唉. 我一到步後見到STEPHEN大哥, 已心知不妙. 今次的家訪一定會大破財…

我和MARK哥到達登勤大宅已經是下午17:00, 到步後第一首歌目, 我已忘是甚麼曲目. 因為我現在的腦海, 仍然被下面依隻”亞依達”歌劇所迷惑著.

丫….我記得啦, 開始的時侯, STEPHEN大哥為我地準備的頭盤是播CD, 再到SACD, 高清FILE —>…LP!

我仲記得開始時, STEPHEN大哥只播一些小品或流行品比我聽. 等我地熱下身先. 等到熱身完畢, 已經是晚上七時了. 原來登勤兄已為我們準備了一頓豐富晚餐. 席間, 大家喝著啤酒, 分享發燒趣事, STEPHEN兄亦一邊食飯, 一邊分享佢玩黑膠的心得與趣事. 這頓晚餐
, 我真係又食又拎 (學習玩膠). 勁開心

飯後, 我們回到地下的音樂室, 開始今次家訪的高潮 : [黑膠]

STEPHEN先以LP12作熱身, 播放一些小型室樂, 演唱會等等曲目. 我諗一般發燒友已經慘被毒死了.

可借, 我這屏風用家,  經過做餅主後的洗禮, 已去到百毒不侵的境界. 普通的室樂, 在大屏風上已不能叫我有驚喜的感覺.

可能STEPHEN已經FEEL到我好似不太投入, 就開始了今晚的高潮, 使用JR陀飛輪播放超大型歌劇AIDA. 後級方面, 依然使用ROGUE APOLLO MONO BLOCK推動20.7.

未開聲前, STEPHEN先作少少介紹這張AIDA歌劇要留意的地方就是, 指揮皇帝-卡拉揚喺今次的AIDA歌劇裡, 刻意將部份管樂放在二樓後方, 所以播放AIDA這張黑膠時, 其音場應該好明顯聽到上下兩層的感覺.

的確, 開始時我聽見一隊整齊的管絃樂團及樂團在大屏風後牆出現, 其定位的清晰度已經可以去到數人頭的感覺. 再過多一陣, 我在頭頂左右兩邊上空, 兩小隊的管樂慢慢响起…這時, 我已經感動到有”起雞皮”的感覺. 天呀, 好久好久沒有起雞皮的感覺了.

屏風最強項就是這份現場感, 的而且確, 在登勤這間獨立聆聽室內, 使用一對ROGUE APOLLO推動MAGNEPAN, 其空氣感, 清爽大動態的個性, 配合得天衣無縫.

及後, STEPHEN還介紹了多張古典名盤給我欣賞, 當中有些曲目, 又是令我有新體會, 就是一份有彈力的超低頻.

無錯, 你地無睇錯, 本來超低頻已經是感覺多於聽覺, 但20.7配夾APOLLO後, 我的感覺就真係感受到一份有彈力的超低頻慢慢浸出在整個聆聽空間的下層.

除了APOLLO配夾20.7. 屋主還還即場A/B後級, 將APOLLO的線材移接去後面的貴豐後級.

但見這貴豐後級的墊板使用了CMS最高型號MAXXUM, 我就對屋主說笑: 你實在太偏心了, 貴豐就用CMS墊板, 部APOLLO就只係用粒NORDOST釘墊起. 不過部貴豐後級實在太重, 無必要都唔會搬動佢, 所以今次APOLLO只係讓半臂.

全套貴豐出聲. 的確在中頻以下的質感與分析力都比APOLLO出色, 尤其係果份君臨天下, 大把在手的能量感. 頂級CLASS A後級就是有這份吸引力.
相對來說, ROGUE APOLLO出來的膽機空氣感, 低頻與超低頻的彈跳力. 又贏番部貴豐少少喎. 在場MARK哥話, 話膽機最好的地方就是可以跟據用家的口味而作出微調. 佢話只需換左前級兩支膽仔, 就可以有對貴豐一樣,君臨天下的感覺. 尤其是中低頻的質感與量感, 都會大大提升.

可惜的是, MARK哥今次無帶D 膽仔入黎西貢, 所以我並不能再聽聽APOLLO的終極威力.

總結:

在這晚的耹聽經驗中, 我深深感受到, 我的3.7係時侯要升級了. 因為3.7無論如何都無法做到這份超低頻. 就算將部ROGUE APOLLO搬到我屋企, 我都未有把握可以做這個完美的音場.

在我心中, 不禁响起前輩們的金句, “器材無罪, [聲]是跟人”. 的確,!
以屋主登勤的財力, 本可用到最貴最出名的名牌器材與附件. 但事實眼見登勤有些附件只屬入門級, 甚麼乒乓波, MAGNEPAN原裝JUMPER…等等. 可見屋主並不是盲目的名牌追隨者, 佢會利用自己的聆環經驗, 加上自己口味, 去用盡任何方法去達至自己心目中的美聲境界.

這晚, 由17:00入到西貢, 聽到00:30先依依不捨離開. 在我自己的家訪字典中, 沒有一個家訪比這次更長時間了. 登勤的音樂室完全發揮了MAGNEPAN的最強一面, 基本上所有現場錄音的曲目都有超高水準, 越大棚就越見真章, 果真是天外有天, 這次家訪令我對屏風有更深的體會.

在這家訪報告, 我要多次多謝登勤兄的招呼, STEPHEN兄的教導, 當然唔小得我老友MARK哥介紹登勤比我認識啦.

————- 完————–

 

 

http://www.hiendy.com/hififorum/forum.php?mod=viewthread&tid=102507&extra=page%3D1

Categories: Feature, 家訪世界區
  • 目錄