各位老友都知道我自從玩黑膠至今, 鐘情於SME這品牌, 無他, 就是喜歡她的設計概念與精細造功.

自從第一支SME V唱臂開始, 玩黑膠時間越耐, 越明白SME利害之處. 所有設計設定, 首要當然係要最好聲. 其二就係耐用, 其三就係USER FRIENDLY.

曾經有前輩講過, 黑膠初哥既第一支臂, 最應該係由SME開始, 除左佢既聲音質素有保証外, 最主要係SME臂的設定極之容易. 一把尺就攪得掂. 加埋個VTA, 微調唱重, 攪掂晒. 可想而知, 依間廠為客戶易於使用的大前題下, 的確落左好多功夫.

講番我由MODEL 10 UPDATE去MODEL 15, 這是一個不錯的經驗, 大家睇過我篇MODEL 10的報告, 大約估到MODEL 10只係我我黑膠生涯的過客, 當然選用MODEL 10, 最主要原因係我真係好鐘意依個品牌, 所以想由最低型號的唱盤, 開始去感受SME每個型號的提升.

MODEL 15, 在整個唱盤的結構上與MODEL 10, 簡直就是兩個設計. 除外型與MODEL 10差不多外, 其他所有SME的獨家技術都放在這MODEL 15上.

其中最出名的技術, 就是其[可調式油浮避震系统]

黑膠盤大致分為軟盤/硬盤, 這個大家都知道了, 當然亦知道軟盤的強項在於音樂感與連貫性, 柔和優美. 可惜市場上大部份軟盤都是使用多組彈弓墊在盤底. 調較困難, 的確令很多軟盤愛好者卻步.
但SME這[可調式油浮避震系统], 有別與傳統, 使用油浮避震, 由上以下咁吊起個盤, 這就大大方便了調較問題, 而又可以達到軟盤的強處.

不過大家可能對這油浮避震有D誤會, 這油浮避震並不是用來調節水平, 這個油浮避震真係只係用作避震用途, 如果用家要調節唱盤水平, 一定要在盤底的三隻腳去作出微調.

SME盤另一個好正既功能就係佢既碟壓部份, 好多品牌只係將會碟壓壓在中軸上, 目的當然是令到唱針讀碟時更穩定.

但SME碟壓的設計有別與其他品牌, 佢會跟埋一塊金屬O RING比你.

碟壓方面, 佢的底部係有少少向內孤型設計.!

你要將這O RING放在中軸, 放碟後, 將這碟壓輕力扭上中軸, 扭到最底, 但不要太用力, 因為太大力上緊的話, D聲會暗左D. 所以力度要掌握得好好.

這碟壓的用意就是用塊O RING微微墊高黑膠碟的中心位, 再用碟壓扭緊, 令黑膠碟與盤面得到完美貼合. 更可令一些有小小炒魷的黑膠得以貼服咁緊貼在盤上.

當然, 我有試過用其他的碟壓去取締這原裝SME碟壓, 但在穩定度方面, 終於都係用番SME碟壓會比較優勝.

今次依個MODEL 15, 我使用番MODEL 10的SME 309唱臂以及ACOUSTICAL SYSTEM THE ARCHON唱頭配合. 基本上整套黑膠組合都無變過, 只係換左個盤. 所以當我SET好個盤後, 好易就能夠感受到MODEL 15與MODEL 10的變化提升.

 

 

首先, 我沒有刻意去調節果幾條橡根的鬆緊度, 只係根據番SME的基本設定去SET 盤SET臂. 當開聲一刻, 我D毛孔立即擴張. 超強的微動態細節在一張MICHAEL RABIN MOSAICS裡出現, 如果這是100%的應有微動態, 咁原來我之前的MODEL 10只能聽80%左右. 在琴絃的質感上, 每一下的擦絃聲, 力度變化都輕易表現出來. 而音場完整性與全頻密度亦高出20%, 這好明顯就是不同班次的比較.

聽聽下, 發覺支小提琴好像有少少偏硬朗, 線條過於實淨, 所以我就將三個橡根頂位微調鬆番少少, 大約係四份一個圈. 成支琴的柔順度明顯提升了, 易入耳好多.

所以話, 這幾條橡根的鬆緊度, 可用作最後微調出黎的聲音想微微改變成”剛度”或是”柔順”.

有這提升, 除左果幾條橡根外, 我估計MODEL 15有多個位置都作出了改進, 當中包括了佢果三隻腳都可以比用家選擇使用[膠環]或[釘],

由於我使用SYMPOSIUM SEGUE ISO, 所以MODEL 15的金屬釘腳正好大派用場. 直接將轉盤的震盪傳至SEGUE ISO化震.

當然, MODEL 15仲有好多微細的改進. 當你有機會見到MODEL 15真身, 必定會驚訝於SME的造功與貼心的設計.

所以對於我這黑膠新手來說, SME係一個[喜歡音樂]的發燒友必然之選. 至於選擇邊個型號, 就要視乎你的BUDGET了.

好似我咁, 簡簡單單一個MODEL 15/A 加粒THE ARCHON, 已經夠我慢慢享受聽黑膠的樂趣了.

代理: 聲望音響
價錢: SME Model 15/A (w/ Model 309 SPD tonearm) – $ 70,500
SME Model 15 (w/o Model 309 SPD tonearm) – $ 54,000

 

http://www.hiendy.com/hififorum/forum.php?mod=viewthread&tid=104827&extra=page%3D1

 

  • 目錄