自從賣左個SME 15, 一直留意緊仲有無D大約十萬元級的黑膠唱盤, 可惜, 睇極都唔啱心水

諗住上去聲望音響搵TONY問下意見, 順便睇下個SME 30/12會唔會令我有比錢的衝動.

加埋支金臂SME V

講真, 無論係幾時上去睇依個盤, 都有比錢的衝動. 可惜30/12的售價遠超我所能負擔.   唯有多D上聲望聽下就當買左就算啦.

喺我仲陶醉緊SME 30/12所播的黑膠時, 比我睇到本文主角NOTTINGHAM旗艦ANNA LOG.

講真, 依個盤的吸睛程度絶不輸給SME 30/12, 因為佢既設計十分獨特, 一碌百年古木墊起個PLATTER, 加埋支原廠ACE 294 ARM 12吋臂, 古色古鄉. 睇個LOOK就應該估到依個盤既聲音取向合我口味.

雖然我有好多老友都用緊NOTTINGHAM唱盤, 不過由於我自己都未用過依個牌子, 所以就大膽問聲望, 可否借個盤比我回家測試, 順便寫番個報告, 試試啱唔啱我口味先決定呢?! 

就是這一問, 兩個大紙盒就係三日後, 送到我家.

先開箱比大家睇下入面有D咩先?!

比較細D個盒, 就係放左最重既盤. 而大盒就放置了百年木, 墊板與其他組件.

兩個大紙盒, 都好多配件, 好似依件咁搶眼的百年木, 係使用左20件瀝青松木混合成螺旋組成. 咁既設計除左用作調聲, 當然係為了能有效導走諧振.

金屬架方面, ANNA LOG可提供兩支臂使用, 當然佢跟盤就只得一塊臂板, 如要多塊, 就要另外購買.

 

至於佢既腳墊, 使用特殊的橡膠去針對50Hz的諧振, 又係可以減少不必要的振動.

仲有佢果塊厚達65mm的墊板, 上番佢官網, 雖然無講到依塊厚過板有咩特別, 不過可以肯定既係設計者在調音上, 一定有計埋依埋厚板呢.

ANNA LOG個軸心, 好巨型, 好靚仔.

 

 

仲有個PLATTER方面, ANNA LOG係使用最厚的PLATTER, 厚度達55mm,

再加埋佢專用的25mm石墨墊. 總80mm的厚度, 夠晒台型

至於ANNA LOG貴為NOTTINGHAM旗艦, 其Wave Mechanic power-supply亦是跟盤配件. 依個power supply唔單單係供電比摩打, 前面板有個圓鈕可以微調轉速, 而入面更有組電源處理, 即係話D電入左個WAVE MECHANIC POWER SUPPLY後, 會處理左D電, 先會再比個摩打, 此舉更能令摩打保持在最穩定的轉速呢.

 

仲有支ACE 294 ARM 12吋臂, 連埋條臂線, 唔使再身痕換PHONO CABLE. 哈哈.

介紹完個ANNA LOG各個部份, 就講番前文我講” 一睇個LOOK, 就知道合我心水.” 點解我咁講? 咪就係因為佢碌百年 & 12吋臂.

玩得耐HIFI都知道用”木材”對於聲音的影響, 就算你搵幾粒細細粒既黑檀木去墊起部CD機, 都聽得出木材能將中低至中高的頻段變得 豐厚, 人聲更有厚度, 更有感情.  依個ANNA LOG咁大碌木墊底, 可想而知, 聲音特性應該係走和暖易入耳. 強密度/質感.

再加埋我之前聽過既12吋臂特性, 齋睇OUTLOOK, 已經知道依個ANNA LOG盤與我套屏風組合應該夾到啪啪聲. 

安裝依個盤其實無咩難度, 都係四五份部件. 唯一要留意就係因為佢條橡根有番咁上下粗度, 所以佢既摩打與PLATTER的高度一定要好水平, 先唔會令到條橡根振動, 與摩打有不必要的磨擦.

不過講到唱臂, 依支 ACE 294 ARM 12就令我頭都痛埋  因為我比黑膠玩左一年, 都係使用SME臂, 大家黑膠友都知道SME臂係全世界最USER FRIENDLY.  依家換左NOTTINGHAM, 初次接觸依支12吋臂, 喺安裝上面的確有好大分別.

大家唔好諗住我實唔識裝支12吋臂啦, 哈哈, 你地估錯了, 因為裝臂當日, 我叫左我好友TONY到我家幫拖呢.

有TONY幫拖的確好辦事, 兩條友仔, 唔駛一個鐘已經可以坐喺皇帝位微調唱重, VTA等等.

丫….差D唔記得講, 今次我又係用番我最愛的ACOUSTICAL SYSTEM THE ARCHON唱頭. 支12吋臂配依粒頭都應該OK.

好肋, SET完成個盤, 就坐定定聽歌仔. 今次我地又係搵隻DIANNA KRALL 出黎試聽. 因為我最鐘意SET完個黑膠盤後, 就搵隻CD一齊AB比較, 起碼要SET到個黑膠盤要贏部CD8 一倍以上先收貨呢. 哈哈.

一落針, 已經可以贏到部CD8三成, 來回SET左三四次唱重與VTA後, 已可以超越五成.  TONY可以功成身退了. 哈哈.

依個ANNA LOG, 我依家聽左兩個星期, 給我的聽感果然是全頻質感超強, 尤其在中頻的分析力方面. 無論係女聲男聲, 在ANNA LOG的演播下, 感情豐富得令人心醉.  

至於古典, 一支小提琴已能充份發揮ANNA LOG的能耐, 琴腔的超真實感竟然可以在我這套屏風組合裡出裡得咁清楚, 每個音符與音符之間果份連貫性簡直係一流.

大棚古典呢, 我諗這個ANNA LOG的超重PLATTER與完美承軸, 令到在超大音壓下播放交響樂, 穩定度超出我之前用過既黑膠盤.
一邊爆緊古典, 我個心一直諗緊我套以屏風為主的組合, 不嬲都想令質感更強更實淨. 暫時聽左兩星期, 這個ANNA LOG的特性與我的組合可謂夾到啪啪聲…比唔比錢好呢?! 

講真, 我之前用SME MODEL 15, 在連貫性這項可能比ANNA LOG略優, 但講到質感密度, 音場的穩定性, ANNA LOG的確強上很多. 我會唔會試埋個SME 20/12先決定呢?! 真係好頭痛呢.

代理: 聲望音響
價錢: 剩盤 $104,000, ACE 294 ANNA 12吋臂 $25,700

  • 目錄