MPS

繼上年試過Analog Domain 之後,一直蠢蠢欲動想換機 不過心裏面一直控制住自己,換就要換得其所,因為牽一髪動全身,如果唔夾,到時換其他缐材都係得個搞字,所以一套夾嘅器材係非常重要

今年音響展裏駿韻展房竟然見到一套老頂力士前後級(C900u&M900u)推B&W老頂800D3,眼前真係一亮 心諗兩個品牌夾唔夾 當然日系品牌係日本做show好多時都會配B&W,夾應該唔係問題,例如金仔(自己都聽過老頂金推老頂B&W),不過力士推真係第一次,仲要可以係音響展到見到聽到就更難得,始終唔同公司,難得有crossover 當然聽聽,結果出嚟嘅效果相當喜出望外,如果有聽過嘅師兄一定都會有啲印象,論聲當然唔係全音響展最好,不過以價論聲出嚟嘅表現自己覺得一定係頭三位(話哂呢個組合以零售價加埋先五十萬,係音響展裏面分分鐘平過其他牌子一隻喇叭或者一對喇叭缐….. )

竟然有咁好表現,當然希望試下佢,話哂自己用緊804D3,始終音響展人多,表現一定有啲折扣,如果可以係屋企試就好囉 ….之後同槍王食飯講起呢個組合,佢二話不說即刻打俾代理借套老二(C700u&M700u)俾我試試,真係唔怕會毒屎我咁

部機到步開箱攞部前級出嚟,嘩乜咁很重 原來部前級C700u都差不多三十磅,以前級嚟講真係重,唔知仲以為後級 而後級M700u就差不多六十磅, 一個人上架都有啲吃力 不過除咗重之後,要欣賞日本廠家嘅做功,細心睇下兩部機啲金工同夾口,機背嘅鍍金RCA插座,仲有後級喇叭缐插位裝有彈弓,用义頭完全穩穏陣陣夾實,非常細心扺讃!整部機手工基本上同歐洲頂級機接近睇齊,我甚至覺得好過一啲德國牌子……..

不過今次力士部前級比較特別,以佢地啲合併機甚至同其它日系前級比較,呢部前級竟然冇耳擴亦唔可以加phono card,估計廠方希望専心做好一部好聲嘅前級,其它有機會干擾嘅部分一一排除,好處當然係對聲音有好嘅影響,唔好係用家要另外花錢購買耳擴同phono,而力士產品款式相當齊全,要夾聲買返同廠耳擴同phono就可以了,廠家真係識諗 又或者廠家覺得既然玩得前後級,其它部分應該分開玩先好聲!

睇返廠方資料,呢部前級配有兩個廠方自豪嘅技術,一、放大部份第一級先用上ODNF( Only Distortion Negative Feedback) 技術,呢代係第四代,技術係取代一般負回輸,除有效降低失真,最重要係唔會將聲音變得死實,加強改善訊號雜訊比,令中頻更圓順,然後再放到下一級電路再放大。當然呢部前級係全平衡缐路,放大模組有兩份(老頂C900u就用上四份!)另一技術就係音量控制處理,用上廠方LECUA1000(Luxman Electric Controlled Ultimate Attenuator)固定電阻減衰器系統,音訊經過二個電阻來達成衰減目的,有啲似R2R音量系統,目的都係維持音量控制器達到最少嘅誤差!

後級M700u內部用上名為Lixman Ultimate Efficiency Power Transformer 嘅EI牛提供8ohm 120W, 4ohm 210W嘅火力,另外Damping factor 係350,如果用到兩部橋接更可以推到8 ohm 420W! 內部都係全平衡設計,我諗唔駛橋接都夠推爆我對804…..

駁好缐開聲,同之前音響展聽到嘅聲音有啲相似,兩個品牌原來非常之夾聲,新800系列聲音固然清秀,但配落力士呢套前後級出嚟嘅聲音又絕對唔薄聲,如果大家覺得日本機係比較日本聲,咁呢個組合一定唔似,不論聽乜類型歌曲都好中性,冇乜特別偏向!反而俾我嘅感覺係音樂感好好,聲音密度高,細節豐富!其實聽咗一星期,不同類型嘅樂曲都試過,發覺呢套機真係同廠方設計理念一樣,一)聲音自然不誇大、二)音場自然真實、三)音樂細節豐富、四)聲音各頻道嘅能量速度都係維持一致性、五)令人可以長時間聽音樂,耐聽不倦!其實最後一項非常重要,有時套機Hifi感太強,一時快感固然吸引,不過長時間聽兩三個鐘耳仔都會有啲吃不消

聽人聲中頻微微暖,口型適中,女聲少少嬌柔,不過清爽,絕對唔係重口味個種,有一晚我將關淑怡LPCD45II精選成隻碟連續聽咗三次一曲 ‘再會’感情豐富動聽!聽84年出嘅甄妮演唱會精選黑膠,雖然隻碟唔係特別靚聲,不過一曲命運同奮鬥都一樣聽到熱血!男聲又聽我喜愛嘅李宗盛嘅理性與感性,滄桑味一樣表現恰好!再到張學友嘅餓狼傳說,爆到七彩!到趙聰嘅聆聽中國,低頻抽得、動感強,一樣過癮!再聽其他Jazz、古典、一樣難唔到套機,音場定位、動態、氣氛全部交足功課有餘,不誇張,總之你會樂意去將一張一張嘅碟聽完又聽

如果同我之前試部Analog Domain ISIS 比較,AD會比較Hifi感強,音場定位可能更出色,不過力士反而更耐聽,佢係果種真實耐聽,歌曲該爆就爆,該柔就柔,該通透就通透,少少味但又不多不少不誇張,佢係果啲唔好期望可以某方面可以攞超高分,但就樣樣做到八九十分俾你嘅機種,可能驚喜唔大又唔起眼,論名氣佢可能未及同郷嘅金仔二嫂甚或其他歐洲機,但係呢套機係絕對可以陪你渡過長年歳月去聽音樂又唔駛身痕成日想頻頻換機!如果唔覺意走漏眼,就好似每年音響展一樣,你同我都唔會期待去聽力士一樣,係都去聽傻佬信啦 不過佢就係咁唔起眼,又唔金光閃閃,又唔大件頭,但係咁樣你我都可能已經走咗寶! 呢套前後級嘅質素絕對比起講緊以依家啲合併機閒閒地開價過十萬元以上嘅話,除咗有得揮之外,論金工用料聲音,仲有講緊一套前後加埋賣價十萬有找,我返而覺得更超值!玩開五六萬機想升級又唔想玩到十幾廿萬嘅師兄,有時間去聽下唔好漏咗佢!

最後套機對缐材非常敏感,缐材越好表現更好,中間有段小插級有朋友借條絕對夢一插,效果表現簡直o能咗嘴 當然唔建議用咁貴嘅缐,只要唔好太薄聲太活潑,中性細緻有質素嘅缐材就可以了。最後又再多謝槍王同駿韻東哥嘅安排,毒很屎人咩!

 

http://www.hiendy.com/hififorum/forum.php?mod=viewthread&tid=107076&page=1&extra=#pid2687744

  • 目錄