冷凍雙雄 - CAS Workshop 自家製英式插頭

pepsiman

大家仲記得百事佬聖誕時攞咗隻Earthquake Sound MiniMe P12超低音喇叭返屋企玩嗎？(聖誕夜，執好嘢！) 其實當日攞呢隻十仔返嚟時已經預咗佢會夾隻XTZ SUB12玩雙十，一前一後，實行玩足7.2.4 ....

上個星期將隻XTZ SUB12搬回原位 (左前置與中置之間)，然後將隻MiniMe P12搬去聆聽空間左後角，藉住角落反射增加量度加強包圍感，可惜百事佬無拉獨立電到果個位，亦無美式牆蘇招呼隻MiniMe P12，只好插條黑雞原廠線開聲，播咗幾段試試，發覺出嚟嘅效果完全係我預期中嘅「臃腫」。好！動手搞搞佢先，不過摷勻全屋，最好嘅英式電源線就係得條比投影機用嘅灰武士20A加MK插頭。為咗試清楚先出手入線，唯有犧牲一下部投影機...

pepsiman

有咗灰武士20A及MK插頭嘅幫手，量感有增加之餘，「臃腫」情況亦得到改善，但就肯定仍有進步空間。以我玩美式電源線嘅經驗，插頭物料對聲音絕對起好大變化。我即時攞起電話，打俾鎗王問佢有咩英式插頭好介紹，鎗王就介紹我去CAS Workshop搵Sampoon，因佢剛剛自家製咗一批鍍銠MK冷凍英式插頭（後簡稱冷銠頭），可以搵佢幫幫手！聽到呢個消息，我第二日收工即刻揸隻戰羊飛落油麻地搵Sampoon求救。


去到舗頭Sampoon好殷勤咁介紹佢隻全新產品，聲稱呢隻自製冷銠插頭金屬部份經過重新抛光處理，表面更平滑，接觸面更皆，之後用上德國上等銠水電鍍，最後再交到台灣冷凍廠冷凍，將原本屬醫院級別嘅MK插頭發揮到極致。不過佢好坦誠咁話佢都未試過用喺超低音上，希望完咗測試都話個結果俾佢知。為咗可以作對比，Sampoon仲比多隻MK冷凍英式純銅插頭我（後簡稱冷銅頭），睇吓邊款好聲啱使，呢個老闆真體貼。臨走前；老闆更比多個鍍銠冷凍尾插，話配合起個冷銠頭有相得益彰嘅效果！


百事佬自問唔係金耳朵，記憶力亦唔係高果隻，為咗結果可以更準確，我特意遠赴北角搵AudioLink老闆Philip整多條灰武士20A，可以即時作A/B比較，在此要特別多謝Philip老闆嘅幫忙。二話不說，回到家即時將冷銠頭及冷銅頭裝上去條灰武士線度。但話晒係新線兼新頭，一於煲兩條線幾日先正式比試！

喺正式測試之前，百事佬上網做咗少少功課，知道冷凍技術對音色上嘅改善：
「低溫冷凍時，分子間的壓力得以釋放，從而重新整齊排列。所以訊號或電流通過時，混亂的粒子碰撞亦會明顯減少，減少電噪，過流量亦大增。品質之提升無容置疑」。而物料方面，百事佬過往都接觸過「銠」及「銅」兩隻物料，認為銠特性為通透及具分析力，比銀厚實；而銅則量大且厚，分析力一般。不過放於超低音用情況又係唔係一樣呢？請大家拭目以待。

**** 正式測試 ****

由於已經有咗原裝MK插嘅初步聽感，所以我只會以冷銅頭線同冷銠頭線駁上MiniMe P12，分別A/B測試Dolby Atmos試碟內之Enrique Igiesias、Mission: Impossible Ghost Protocol及蝙蝠俠對超人：正義曙光片段。


Enrique Igiesias



歌舞片段音樂節奏強而有節拍，好容易就聽得出超低頻嘅層次以及音樂感。相比之下，冷銅頭比原裝銅頭同樣擁有量感，不過毛燥感少咗，尾音亦收得快咗少少，節奏感亦強咗。冷銠頭呢？估唔到躍進之大，真係可以唔需要A/B比較都即時擦覺得到，超低頻層次感豐富而富有彈性，每個拍子更有力度，低頻全完溶入整套系統，歌舞睇起嚟更有氣息，雖然量感比起冷銅頭少，不過我真係鐘意佢多啲。


Mission: Impossible Ghost Protocol



當然試風沙暴一段，來襲一刻好易分辨超低頻嘅優劣。冷銅頭喺風暴初來襲時尚算可以，到吹正嘅一刻已經有一舊舊嘅情況，做唔到一浸一浸。又難怪嘅，呢幾分鐘嘅強勁密集性超低頻，絕對唔易演繹得到。去到撞車後跑車打筋斗埋身果幾聲，真係夠晒量，好埋身亦好重力，正！至於冷銠頭，未用佢之前，我已對佢好有信心可以順利過關。果然，镀铑嘅通透加上冷凍嘅清晰係呢段表露無遺，風沙暴輕重分明，絕無煩厭感，終於明白冷銠頭唔係量少咗，而係線條好咗，更加收身。同樣地，跑車打筋斗埋身果幾聲比冷銅頭punch及狠，震撼力大了半個碼！


蝙蝠俠對超人：正義曙光



最後嚟到蝙蝠俠對超人：正義曙光測試，行雷、音波炮、機鎗、背景音樂等等，幾方面冷銅頭都攞番唔少分數，氣氛十足，而冷銠頭只係喺拳腳位較到肉，磅數增大而有更強刺激感，整體與以上聽感分別不大。

總結：
你地可能會話我「行」，但事實係唔可以話冷銠頭全勝，只係佢嘅特性同天生唔夠punch及收放唔夠快嘅MiniMe P12有天作之合之感，補品一向都係配對得宜就如魚得水，相反就龍困淺灘。整體而言，冷銠頭用於超低音上仍然能保持高分析力、收放快速、乾淨利落，音樂感亦較強。而冷銅頭雖然睇嚟表現較失色，呢個只係錯配問題，如用於一啲量感不足嘅超低音，好肯定可以令其重振聲威！今次測試係希望比大家對插頭嘅物料有更多嘅認知，以後配插頭時有一個參考。睇嚟唔使幾耐我個英式牆插都要換走，到時再試吓搵唔同物料試玩，之後再同大家分享一吓....


發售點：        CAS Workshop - 油麻地彌敦道534號"現時點" 276 號鋪
電話　：     23104647
售價　：     冷凍鍍銠MK英式插頭（$328 ）
                冷凍純銅MK英式插頭（$138 ）
                Martin Kaiser 德國製冷凍鍍銠尾插頭（$280）
                *Hiendy 會員獲九折優惠

ballgor

百事佬，你估灰武士加佬頭啱唔啱投射用？

wildmanhk

我都係玩英式的，用開古珂金頭，真係可以試下改玩呢隻冷凍銠頭喎。百事兄快的為我哋同潘生傾個團購價喇。

pepsiman

ballgor 發表於 2018-1-19 15:49
百事佬，你估灰武士加佬頭啱唔啱投射用？

呢個配搭有得諗喎

pepsiman

wildmanhk 發表於 2018-1-19 18:44
我都係玩英式的，用開古珂金頭，真係可以試下改玩呢隻冷凍銠頭喎。百事兄快的為我哋同潘生傾個團購價喇。{: ...

即管試吓

wildmanhk

pepsiman 發表於 2018-1-19 19:29
即管試吓

會員有福了

SamPoon@FB

wildmanhk 發表於 2018-1-19 20:58
會員有福了

師兄們比面GA, 叫返SAM仔得LA~

KelvinLiu@FB

佰事兄 如你咁樣講我隻肥仔hrs-12都可以用呢個冷凍銠頭修吓身了。 唔知有冇美式頭呢？

pepsiman

ballgor 發表於 2018-1-19 15:49
百事佬，你估灰武士加佬頭啱唔啱投射用？

你部Optoma特別版投影機用緊咩線?

pepsiman

KelvinLiu@FB 發表於 2018-1-21 18:50
佰事兄 如你咁樣講我隻肥仔hrs-12都可以用呢個冷凍銠頭修吓身了。 唔知有冇美式頭呢？ ...

老闆話現階段只有英式插頭,將來如有美式頭會再通知大家...

ballgor

pepsiman 發表於 2018-1-22 16:20
你部Optoma特別版投影機用緊咩線?

DIY 鍍銀PC。其實到幾ok， 不過身痕。

pepsiman

ballgor 發表於 2018-1-23 10:24
DIY 鍍銀PC。其實到幾ok， 不過身痕。

約日我攞上嚟玩吓好嗎?
順道上嚟偷吓師,因應該好快會有新投影機進駐百事影院呢....

SamPoon@FB

比你地講講下身痕,等我諗下搞返批美式先~!

pepsiman

SamPoon@FB 發表於 2018-1-24 15:41
比你地講講下身痕,等我諗下搞返批美式先~!

到時記得第一時間通知聲百事仔喎

ballgor

pepsiman 發表於 2018-1-24 14:39
約日我攞上嚟玩吓好嗎?
順道上嚟偷吓師,因應該好快會有新投影機進駐百事影院呢....  ...

新投影機？ 咁我要加快裝個新投影機架先

pepsiman

ballgor 發表於 2018-1-24 20:03
新投影機？ 咁我要加快裝個新投影機架先

何解要換機架？

ballgor

pepsiman 發表於 2018-1-24 21:22
何解要換機架？

部658重過之前部入門Optoma好多，舊架仲對唔正幕中，所以要裝過新位置囉。

pepsiman

ballgor 發表於 2018-1-24 23:36
部658重過之前部入門Optoma好多，舊架仲對唔正幕中，所以要裝過新位置囉。  ...

明解...
搞掂通知聲...

ballgor

pepsiman 發表於 2018-1-25 07:21
明解...
搞掂通知聲...

一定啦，到時有新玩具同你分享吓！