建國大典 - 6 鬼殺隊出場

zelo

當所有嘢已經收拾好，以為可以開始嘆吓，唔好睇相以為個場好很正，dream room之類，夢就係夢，實情係惡夢，由所有嘢搬入到放置好差唔多個半月，我從未覺得滿意過，依段時間真係寢食難安，攪新地方已體力透支，効果仲要衰過以前，所以近排個個見到我好似見鬼咁，反正諗唔惦，試聲試到成個人迷失晒，不如請啲鬼殺隊過嚟聽吓，反正套機已經差到落底線，我都冇晒感覺，問吓人集思廣益，聽吓意見跟住做都好，搞出嚟再衰聲仲可以入Q佢哋數…







請過嚟呢班高手，個個都幫到手，查到64周同80周出事，於是對症下藥。叫得做鬼殺隊當然會有”柱”，所以佢一嘢就車兩條大Bass Trap柱俾我嘆，位置放好後效果係有嘅，亦都有進步，起碼無咗‘全城共震’依個感覺已經好安慰。當然問題仲係有，所以鬼殺隊Team 2已經開始做嘢，佢哋有三點提出，第一將個唱重調校到1.9至2.0水平，另外將唱臂VTA高度調高少許，第三點係將對喇叭重新擺位，前前後後試吓搵邊個係G點，頭兩點好容易解決，我一個人唔使幾分鐘都可以搞掂，但係第三點就真係有難度。



去到呢個位我一個人真係冇辦法解決，於是又呃呃氹氹，又俾我氹到一班鬼殺隊Team 3年青人過嚟幫手，Team 3一班係科學L，我依啲古老石山頭腦唔靈活，要靠呢班科學L去解決，年青人果然有活力，一入嚟已經接好晒咪兼set好晒電腦幫我度位，電腦模擬出嚟嘅數據，間房總共有三個peak，每個peak超過20 dB，即係我點加吸音都冇可能解決到，所以我哋按另一個方向走，就係將對喇叭重新擺位，電腦模擬出嚟，對喇叭要拉前三尺左右，即係差唔多去到間房嘅一半位置，條curve就會正常返好多，叫得做科學L，點都要實踐，班年青人亦都眉精眼企，見我呢啲費佬死下死下，都係冇力搬，即刻自動波幫我移喇叭、調教平水、度埋尺，service仲好過6星酒店，身水身汗攪完一大輪，開聲聽咗一陣，再微調一下個角度，噢賣吉～我眉頭片污雲終於散開，可以見到聖光鳥～～當然心中需然興奮，作為葡萄老祖，況事都唔可以表露於面，一定要扮大支嘢，仲要扮到不外如事咁講，‘唔⋯幾好，應該仲有進步空間’。
依家第一個stage 暫時解決，可以話大步擸過，下一步又要開始進入phase 2。