不知是什麽出錯. 上集之內容變了下集,
相片又亂哂龍, 巳佈告版主跟進.
如想睇番上集. 請到 http://kkchiu88.blogspot.hk/
Day 3
早上得一個行程: 熱沙浴
由酒店步行去約 10 分鐘.
熱沙浴營業時間, 請留意下圖
原來都唔係熱到頂唔順喎.
一邊浸, 一邊望下個海天景色, Good!
約15分鐘, 會有工作人員叫你起身.
浸完熱沙浴, 步行返洒店,
沖個涼, 又可以再浸下洒店溫泉.
Very relaxing.....
下午飯到JR車站附近食, 當然要又試下地道食物啦
叫咗 set lunch, 只需約 YEN1000/set, 味道唔錯喎.
食完就揸車去今日嘅重點遊覽: 別府地獄
別府地獄組合分8個地獄,
6 個就集中係附近, 另外 2 個就要再揸車去.
想睇哂8個, 記得買 '地獄組合套票', 抵 D.
係 '鬼山地獄' , 有條 66歲嘅鱷魚 
如果只够時間去其中一個地獄, 就去 '海地獄'啦,
因為最出名同面積最大.
地獄出名嘅小食:
石垣饅頭、地獄布丁、地獄甜玉米、地獄甜薯、地獄蛋......
連 '地獄 ice cream' 都有, 問你怕未?
我地 '為食兵團' 當然冇有怕,
一於..............食晒佢 
玩完 '別府地獄組合' 巳經下午四點多, 速速揸車走 
今晚 book 咗一間好隔涉位於山區之民宿: 湯布院山城屋
訂佢有三大理由:
1) 出名好食嘅農家菜 (主要埋由)
2) 有四個獨立半露天家庭溫泉, 即係如果你同家人用緊, 其他人就不能內進.
3) 試下山區民宿
揸入去'山城屋'個條小小山路真係一路揸一路滴汗.
條路直頭窄到俾單車行就差不多. 
危險 刺激 小山路
等小弟試下形容條路點難揸啦.
首先, 係一條非常窄而'灣灣曲曲'嘅山路.
司機個邊係山邊, 佈滿山石和凸出黎嘅樹枝,
架車 "挨親埋去", 右面車身一定花哂.
而架車左邊係無欄杆嘅沿崖邊,
隨時一不小心就成架車碌落山.
全程單線雙程 兼冇避車處. 
X-Trial 最多只能算中型車, 絕對談不上大型.
不過一路行車, 司機位個邊離山石邊只有1,2 CM,
而車嘅另一邊係沿崖邊, 我估車輪離沿崖邊亦只有2,3 CM.
行車時, 除咗車內 '右前方防撞感應器' 不斷發出警示聲外,
坐係後邊嘅兩位女士,
左邊個位就叫 '就嚟碌落山啦...小心呀!',
而右邊個位就叫 '撞山啦, 唔好駛咁埋呀...!'
音效直情勁過 "ATMOS全景音響".
真係人都顛. 
有冇相片睇下絛路有幾驚險?
梗係冇啦!
全程四個人四對眼都望實條路 同 架車嘅前後左右,
邊有可能仲有心情同時間影相.
師兄門如想感受一下, 只可以自已飛過去日本親身體驗,
刺激過坐 '過山車' 咖. 
'山城屋'係由一家人經營,
主廚係位79歲嘅婆婆,
負責營運係她的女兒, 佢老公就幫手.
全家都好 nice.
佢女兒早年在英國讀書,
所以用英文同佢溝通全冇問題 
終於到達'山城屋',
可能山區空氣+食物都好, 主廚婆婆 同 公公超精神.
小弟房間 + 其中三個 '家庭溫泉'
嘩! 周圍嘅景色都好靚.
相中見到天色咁黑, 唔好以為好夜, 只係黃昏六點咋.
山區裏嘅主街, 十間店舖九間冇營業.
民宿主人話連假日都冇乜人行.
D 人通常會揸 20 分鐘車到市中心消遣.
條小山路咁窄, 小弟剛到步時巳煩緊明天有乜辨法可以安全地揸番架車走.
現在條路'黑漆漆', 話揸車出去玩, 咪講笑啦! 
行完街, 到晚飯時間.
未食前心唸 '農家菜' 嘅賣相會比較粗糙.
點知一入到食堂就俾佢嚇一跳.
擺設得非常精美, 直情似'懷石料理'
味道如何? 小弟俾 100 分.
記得前一晚我地食 '和牛' , '活魚刺身' + 其它海鮮,
因食材名貴和新鮮, 覺好好味.
今晚嘅食材需然一樣非常新鮮, 但絕非名貴.
可以煮到咁好食, 特顯主廚婆婆功力非凡.
絕對食得出佢對烹調個份細心, 執著, 一絲不苟.
真心講一句: "婆婆好嘢!"
食完晚飯, 休息一陣,
同老婆大人去享受下 露天家庭溫泉,
超正.
之後嘅節目當然就係瞓覺啦....
Day 4
一早起身, 望出窗外嘅山林紅葉景觀真係冇得輸呀! 
早餐時間啦.
真係唔洗多講, 自己睇.
好食到就算飽都唔想停手呀.
呢間民宿真係樣樣都好, 價錢亦絕對唔貴,
冇記錯應該係平過 HK$2k/night, 包一泊兩食.
唯一令小弟猶豫是否再來就係條'要命小山路'.
食完早餐, 都係時候去今日第一個景點 - 金麟湖, 湯の坪街道
金鱗湖位於湯布院中心點,
在太陽光映照下，湖泊彷彿魚鱗般閃閃發光.
多得民宿主人指點, 泊咗架車係一個非常鄰近金鱗湖之泊車處.
淨係個泊車處 同行去金鱗湖條路巳經靚到...冇嘢講
金鱗湖
湯の坪街道有許多可愛的小店.
不過時間唔够, 相都冇影,
怱怱行下就要走.
揸咗一個鐘車, 去到 '九重夢吊橋'
參觀完吊橋, 肚子餓. 下一站 '九重山牧場'
吃日式燒肉做午餐. 目標係 '豐後牛'
'豐後牛'肉汁多, 入口鬆化. 正!
右下圖係 Home-made 雪榚,
有三種口味: 綠茶. 牛乳, 朱古力
全部都幾好食咖. 
牧場景色
日本新米好食咖, 同老友一人一包買番香港食.
向熊本市出發, 途中居然見到........
當然立刻揾個地方停車影相啦
去到熊本市, check-in + 梳洗完,
又到晚飯時間. 今晚打算食兩餐.
因為想試熊本拉麵,
又想食熊本出名嘅 馬肉料理. 
第一餐先食 熊本拉麵
揾到間好地道嘅拉麵店,
門口大大隻字寫著 '一生懸命',
好 serious 呀, 一於入去試下 
湯底相當濃味, 麵條亦彈牙. 好味.
第二餐心目中巳有一間較高級之 馬肉料理專門店.
點知去到佢話全店滿座, 成晚都 fully booked,
叫我地唔使等.
唯有又發揮民間智慧, 見到最多人食個間就入去啦.
下圖右上角係馬肉刺身.
小弟覺得'馬'係其中一種相當可愛嘅動物, 所以冇食.
老友食完話冇乜味, 試過就算. 
我都好佩服班 '為食兵團'
剛剛食完拉麵仲可以食咁多野!
Good night 
Day 5
仲寫緊最後兩日, stay tuned........................ |
IP卡
狗仔卡
發表於 2015-11-16 19:25:29
提升卡
置頂卡
沉默卡
喧囂卡
變色卡
顯身卡
5
發表於 2015-11-17 10:57:14
