燒閒選：TARA Labs The 30th Limited Edition XLR

dt825

燒閒選：30年的誘惑.......
30年⋯⋯令我諗起醇到無朋友嘅威士忌，又或者香到唔捨得飲嘅老普洱。
但今次30年的誘惑並唔係甚麼陳年佳釀，而係一個品牌嘅30週年限量產品⋯⋯


對TARA Labs這品牌只略知皮毛所以唔敢班門弄斧講佢有幾勁嘅技術，只曾經領教過佢旗艦級產品嘅威力，印象深刻係龐大立體嘅音場，像真度高嘅現場感，加埋令人醒神嘅速度彈跳力，相信有財力嘅燒友好容易比佢毒到乖乖科水，而自己就當然無能為力望門輕歏啦⋯⋯


直至上個禮拜版主話有新嘢玩，得知係30週年XLR訊號線當然又興奮又內心掙扎啦，講得係全球限量30條你估會平得去邊？到時又自尋煩惱？都係唔諗咁多玩咗先算，連價錢都費事問（此乃逃避現實）⋯⋯


要了解這條30週年先從廠方資料著手，這款限量30對嘅信號線用料甚為講究，沿用其專利高純度mono crystal (RSC) Rectangular solid core單枝銅(所以線身頗硬！唔夠長轉彎麻煩買長啲)，Teflon(PTFE) air tube和Teflon filaments於線內構造成穩固嘅helix geometry,當然唔少得招牌HFX地盒啦⋯⋯咁多理論都係聽咗先


再遇狗狗
早幾年搜尋訊號線配搭Soulution時，一眾佳麗曾經作客家中比較過，從Vovox, Siltech, Crystal, Stealth, Guru到TARA Labs (當時係25週年)，每隻牌子都各有優勝之處真係音多耳亂(恕我亂咁自創形容句)，最後選擇咗Vovox Fortis因為喜歡佢最夾Soulution嘅性格。如今TARA Labs(今次係30週年)再度相遇狗狗又會點呢？


超班配搭
先從CD去前級熱下身，用超班來形容第一估計對30LE訊號線身價應該高過部金仔550 sacd機，第二沿用多年嘅平靚正zonotone身價才幾千銀，所以無打算刻意比較，只想知30LE搭上中價器材可以有幾強。


CD軟件選擇咗三隻不同類型曲目：



揀陸小鳳係多年前跟高人學習領略到人聲定位嘅重要性，高人前輩喜歡用德蘭姐姐首＂落花涙影＂微調喇叭位置，適當嘅擺位可令人聲高企和理想嘅音場深闊度，配合埋角度微調可找到理想結像和三頻平衡(可惜自己都係識講唔識做)。


剛開聲心裏悶哼咗一聲，心諗版主話對線已經煲練過何解秋官無黎神氣面色暗淡呢？唔係咁下話⋯⋯ 比佢唱多幾隻歌但都無乜起色，何解⋯⋯
隨即揾鎗王求救因為好難相信咁嘅效果，經驗豐富嘅鎗王當然知我衰乜啦：老友你知唔知前面地線接地盒(有吖)，後面左右地線要接埋架?(點解條條fing嘅!)⋯⋯


拿拿臨走去機後面接番條地線，當連接果一刻，好鬼魅地秋官即時響我側邊抬番起頭有番哂神釆，好似佢以前唱＂太陽出來了＂咁添⋯⋯
接著徳蘭姐姐出場，一如所料音場撑大了，分隔度更好，人聲高企，咀型結像很細緻非常像真⋯⋯


緊隨陸小鳳，到俗稱＂巫婆＂這張classic records金碟嘅＂骷髏之舞＂，此曲我常用來挑剔動態是否強勁爆炸力是否足夠，同埋音場深和闊度有幾多。本應用其黑膠來試真章，不過黑膠巳經有頗多選擇所以揀CD做熱身。
結果當然係空間感强，雖然密度質感還是比黑膠遜色但爆炸力凌厲這方面，30LE應記一功。


CD最後有The Dave Brubeck Quartet ＂Time Out＂SACD嘅＂Take Five＂，其實黑膠都準備咗隻六眼仔招呼30LE，因為想揀隻爵士樂sacd就隨手抽佢出來。效果當然無失望尤其分析力和節奏感方面令人聽得十分醒神，匆匆熱完身不如快快轉黑膠啦⋯⋯


總結CD方面，30LE大勝係預咗不過我都唔會心動，因為9成時間都係聽黑膠而CD多數係屋企老細聽下流行曲，點都無咁富貴用幾皮嘢招呼部CD機囉⋯⋯


黑膠之人聲篇
轉入直路好緊張呀，今次由phono amp去前級，不敢怠慢揀咗幾隻好嘢聽清楚30LE嘅能耐⋯⋯


Diana Krall嘅The girl in the other room內有＂Temptation＂，此曲唱與錄都算係Krall姐精釆作品之一，今次出來嘅效果係人声非常細緻，嗓音弱音更多，分隔度好立体感強，能表達出Krall姐比較年輕時嘅女人韻味，比起狗狗多份活潑感覺(雖則自己鍾意成熟女人味多啲)⋯⋯


接著鄧麗君嘅＂淡淡幽情＂寶麗金原版，此碟不用多介紹而自己就近排比損友毒害急急腳去入貴碟(好彩遇唔倒隻歌林版咋)，聽隻＂但願人長久＂，開頭幾下鋼琴嘅像真度係無話可說，之後小鄧每一句咬字轉音都好清晰比你感受到佢好認真唱，你知小鄧把聲異常甜美再加埋真實感，真係有啲毛管戙呀⋯⋯


人聲最後係Joan Baez嘅Diamonds and Rust in The Bullring俗稱鬥牛場嘅原版，大家都應該好熟悉卦？聽此碟主要係非常好嘅現場氣氛，而當中比較喜歡尾斷嘅＂Let It Be＂。30LE出來嘅聲音有顯微鏡般嘅分析力但中高頻質感足夠所以唔拮耳亦唔誇張，弱音清晰加上現場真實感利害，一曲到尾觀眾掌声好立體地填滿空間，老實講狗狗重播這斷曲目已經唔弱，今次30LE確實比我感受到更利害嘅現場感⋯⋯


整體講30LE於人聲表達係比較真實自然、理性和細緻，唔會有多餘嘅色彩⋯⋯


黑膠之古典篇
接下來揀咗幾隻心目中嘅精選聽下30LE播古典有乜強項先⋯⋯



先來Classic Records 180g版本嘅The Royal Ballet，皇家芭蕾舞係我十多年前重投黑膠懷抱前第一隻擁有嘅黑膠所以有份情意結，而且全碟曲目好聽錄音亦達到天碟級數所以見到乜版本都照掃⋯⋯
今次聽＂Swan Lake＂，30LE比我非常好嘅感覺，因為場面大唔在講，現場感又出色，可以幻想下一眾靚靚天鵝响面前彈下彈下⋯⋯


另一張天碟係Classic Records 180g版本Bizet嘅Carmen Suite，30LE模擬出一個非常真實嘅立體空間，深度距離感，現場包圍感，每個樂器群組位置交待很清楚，而且節奏爽快彈跳力强，高低起伏令人興奮，令我又幻想自己做緊指揮！⋯⋯ 一向知道這天碟錄音出色而且當年Classic Records再版嘅動態非常凌厲，只係無預料到今次會聽得異常興奮啫⋯⋯


心情稍為平伏繼續係Classic Records 180g 45轉版本Heifetz嘅Tschaikowsky Voilin Concerto，經過剛才卡門嘅轟炸再聽柴協，可以感受到30LE分析力也非常細緻，樂章開頭由微弱樂聲至逐漸增强都交待得清清楚楚，前後深度距離很立體，去到Heifietz solo小提琴質感很好亦交待到動作快慢對比，這一切都係非常優越嘅分析力表現⋯⋯


除咗爆棚和絃樂，鋼琴曲目就要試下依隻Katia & Marielle Labeque(簡稱孖妹)嘅＂Stravinsky concerto for 2 pianos＂，Philips於80年代嘅數碼錄音有唔少平靚正，而這兩位美少女(留意係30年前)合作天衣無縫，琴音鏗鏘通透，孖妹演繹爽快動態凌厲，聽得爽死⋯⋯


鋼琴過關後亦要試下低頻，用隻M&K direct to disc嘅＂The power and the glory vol.1＂，聽依類教堂管風琴錄音最緊要盡扭大聲去感受下澎湃嘅低頻。今回效果係教堂空間感强，低頻不强調量多而係一浸一浸有層次咁湧出來，夠過癮嗎？我就忍唔住越扭越大声感受氣勢囉！


經過不同種類嘅古典曲目，整體講場面控制好好，分析力超卓，速度快爆得過癮⋯⋯此回合值得加分！


黑膠之爵士篇
輪到爵士樂，個人較注重質感和節奏感，揀來幾隻常常聽大家亦應該熟悉嘅名盤⋯⋯



首先係M&K直刻版For Duke嘅＂Take the "A" train＂，此碟係天碟級靚錄音亦係自己首選至愛之一，今次聽到非常好嘅節奏感，彈跳力好速度爽快亦令人聽得興奮，至於金屬樂器質感屬於適中自然，很容易令人投入於爵士即興氣氛中⋯⋯


其後兩隻原版六眼仔嘅The Dave Brubeck Quartet Time Out內嘅＂Take Five＂和Miles Davis Kind of Blue內嘅＂So What＂，好一致30LE有非常好嘅節奏感令人容易投入爵士樂嘅即興氣氛，而且空間感強分隔度高可清楚表達每一件樂器嘅自然音色，至於質感就貫徹自然重質不重量，這方面是否足夠就是乎個人喜好⋯⋯


同場加映
正打算總結之前卻忽然有不速之客，唔好誤會，絕對唔係什麼麻煩客人卻反而係自找麻煩，所講嘅係某富豪燒友拎住部Burmester 100 phono amp過來企圖毒我，咁天生抵抗力低嘅我又點忍得呢？


橫死掂死就同B仔加30LE同歸如盡啦！


不過都要揀幾隻啱呢位燒友聽嘅靚黑膠黎招呼下部B仔既⋯⋯



先黎Al DiMeola, John McLaughlin, Paco DeLucia嘅Friday night in San Francisco半速版嘅第一首＂Mediterranean Sundance/Rio Ancho＂，用B仔聽這類結他現場錄音真係一絶，有聽過嘅都知隻碟錄音好HiFi和動態強勁，B仔加上30LE嘅閃電般速度，絃線嘅張力和彈跳力真係過往未體會過，到曲尾嘅觀眾歡呼拍手聲更將氣氛推到頂端，燒友比我更加透不過氣添(咁究竟係邊個毒邊個呢？)⋯⋯


燒友問有無啲更刺激嘅，我話只要你心臓負荷倒就黎喇⋯⋯


聽B仔的確可以炸得好過癮，無論係Michael Jackson＂Thriller＂嘅喪屍場面(係聽到嘅畫面)，又或者Duran Duran ＂the Wild boys＂隊band嘅爆炸力(80年代同隔離屋鬥爆都係靠佢咋)，B仔配合30LE都可以爆到七彩而所有細節重齊齊整整絕不散亦不亂，依家明白燒友所謂嘅＂激情＂為何物了⋯⋯


最後稍稍慢落黎聽番燒友至愛Dire Straits嘅Brothers in Arms，手頭上嘅係80年代原版比起近年復刻版音色較自然，B仔配合30LE速度爽快絕不拖泥帶水，連續聽完＂So far away＂和＂Money for nothing＂，燒友頻呼過癮但同時卻擰擰頭離開，何解呢？


結論：真⋯⋯音樂
用＂真＂作結論主要係TARA Labs the 30th LE XLR分析力超卓，針點式結像和細節位交待得好好像真度髙，密度和質感自然真實，三頻平衡唔誇張，音塲撑得深而闊充滿現場感，速度彈跳力和節奏感俱表現出每斷錄音至真嘅一面。


聽人聲你會感受到歌者好認真唱好每一句，音色中性不帶額外色彩。

聽古典最能表達出樂團嘅陣容，每組樂器都交待得清清楚楚令你感覺置身其中，爽快嘅速度感爆棚就更著數，所以個人最欣賞佢播古典嘅表現。


聽爵士樂就有非常好嘅節奏和音樂感令人容易投入氣氛中，樂器質感適中件頭唔大亦不埋身，屬於理性派。




聽搖滾樂一樣有爽快嘅衝擊和爆炸力，令人有衝動扭盡音量去轟炸自己。



歡樂過後難免有點唏噓，雖然到呢一刻都未知真正賣價(只知定價約美金1萬元！)，但對我來講又有乜分別呢？

leoking

十分精彩、詳盡嘅報報導、實而不華、扺讚

bigpun1975

Good review, 線毒，碟更毒

pp101

十分詳盡十分風騷同十分毒………………
毒釘厚堅

whoami

好正既報告

curtis9797

精彩……

hohoiho

很實在, 讀了兩篇。
多謝

Jason1969

超毐

dt825

leoking 發表於 2016-3-16 11:20
十分精彩、詳盡嘅報報導、實而不華、扺讚

多謝king sir，亂咁寫文法唔太啱所以請見諒

dt825

bigpun1975 發表於 2016-3-16 11:23
Good review, 線毒，碟更毒

見你剛剛踏入膠道咪比多啲資料你參考囉

iwantbd

Hiendy又多一名才子！

yhyueng

冩得巧精彩

louisc

D碟同線一樣毒到爆

dt825

iwantbd 發表於 2016-3-16 13:17
Hiendy又多一名才子！

禾沒才沒資格喎

musicolic

真係睇到我流哂口水 ，可惜荷包冇水。

dt825

louisc 發表於 2016-3-16 13:20
D碟同線一樣毒到爆

都唔夠你一半

louisc

dt825 發表於 2016-3-16 13:32
都唔夠你一半

你講個個人叫根爺。唔係我

dt825

louisc 發表於 2016-3-16 13:36
你講個個人叫根爺。唔係我

如果講根爺我十分一都無呀！
佢歸來吧原版都keep住3隻你話有冇天理！

bigpun1975

dt825 發表於 2016-3-16 13:12
見你剛剛踏入膠道咪比多啲資料你參考囉

多謝

louisc

dt825 發表於 2016-3-16 13:40
如果講根爺我十分一都無呀！
佢歸來吧原版都keep住3隻你話有冇天理！  ...

其實D碟龜曬邊去咗根爺到，有錢真好