新漢建業專業級Showroom

pepsiman

論本地代理影音Showroom，重新裝修嘅新漢建業絕對係數一數二嘅優質之選。最近；佢地更引入法國品牌StormAudio ISP 3D.32 ELITE Reference前級放大器，配合上Ascendo 22.4有源喇叭，透過SIM2 NERO 4 UHD HDR 投影機，投射出176寸畫面，淨係睇個陣容，已令熱愛影音嘅百事佬熱血沸騰。咁正嘅器材無咩理由唔上去聽吓架？好！一於打個電話聯絡Jerry哥約個時間上去嘆吓先！

未開聲之前，周圍影吓相，窺探一下廬山真面目先

StormAudio ISP 3D.32 ELITE Reference其貌不揚，不過愈簡單愈是不簡單

機背插滿平衡線，少一啲耐性都幾難應付到佢

SIM2 NERO 4 UHD HDR 投影機亦係主角之一

喇叭設置完全符合現今Dolby Atmos、DTS:X及Auro 3D三大制式

只需篤一篤個pad，想點玩就點玩


176寸透聲幕背後同樣架設兩層喇叭，再加上兩隻超低音，迫力無比

另有16聲道版本，相比下較適合一般家居使用


影完相，我拿拿淋坐去皇帝位等享受呢套極品組合，Jerry哥亦早已準備咗兩套4K影碟比百事佬開吓眼界！

先嚟蜘蛛俠：強勢回歸

論畫面，SIM2 NERO 4並唔係以超清影像嚟吸引用家，反而以電影感作賣點，不過這正正係百事佬所渴望追求嘅

論聲，StormAudio加上全套Ascendo有源喇叭，聲音強勁密度超高，連貫性對佢地嚟講全無難度，聲音穩如泰山，不過大家千奇唔好諗住佢會係「唔打爆心口誓不罷休」嘅超低頻演繹，而係極度平衡、類似戲院式嘅全頻表現，要知道家庭影院能做到聲音線性一啲都唔容易，不過Jerry哥話用家只要安裝專為StormAudio而設嘅Dirac Live軟件就可以輕而易舉咁調校出理想嘅聲音。

睇完新戲，Jerry哥播上另一套超級經典舊作「未來戰士續集」

今次Jerry哥分別以DTS:X同Auro 3D兩個不同制式去示範比我聽，感受吓有咩唔同。

現時有唔少日系擴音機都可以將Dolby或DTS 制式upmixing到Dolby Atmos、DTS:X或Auro 3D，不過出嚟效果大都未如理想，有時更會削弱本身主聲道嘅音質添。但聽完StormAudio嘅演繹之後，包圍感仍然超高，雖然無得同真正嘅比較，但我仍然感受到天花喇叭嘅聲音轉移，更估唔到，Upmixing後嘅Auro 3D各方面都比DTS:X優勝，Jerry哥話因為Auro 3D更能用盡場內所有喇叭，所以出嚟嘅效果更細緻。

********************

不經不覺就玩咗成個鐘，一向鐘意借嘢返屋企玩嘅百事佬今次真係無福消受，7.2.4已經係我嘅百事影室嘅極限，莫講話玩22聲道，就算係16聲道都搞佢唔掂，唯有下次再上去玩過啦。如果大家都想親身感受一下，可以同Jerry哥make個appointment，又或者如多師兄有興趣的話，我都可以同Jerry哥夾吓搞番場試影會嘅...

marco

示範級既水準

wildmanhk

下次搵埋我呢個跟班仔磅住你嘛？好等我觀摩下，學下野喇

mojiji1

我報名

mojiji1

我報名