不可能的Mission QX-3

pepsiman

早前；行動版主豬賓到輝煌搵東哥實試Mission QX喇叭系列，不論外貌、評價、以及價錢都非常吸引，碰啱百事佬對前置喇叭好不幸地被高音殺手「魔童」下毒手，高音單元拍打至返魂無術地步，見有咁啱射程嘅目標，即刻上去輝煌搵東哥表明來意，東哥一聲「無問題，過幾日後送到府上」，＂有東哥、無奔波＂真係太監騎馬，無X得頂呀！



豬賓報告：走進HIEND之門， MISSION QX 揚聲器系列

pepsiman

唔使幾日，東哥好有效率咁將對Mission QX-3送到舍下，仲好小心咁放好取代我對Revel M20前置位置，臨走之前，東哥叮囑我要試真佢兩聲道表現。百事佬好奇怪，玩咗接近廿年AV，通常去舖頭試AV喇叭，Sale屎都唔會點試兩聲道比你聽，因為一定好聲極有限，但今次東哥特別提醒百事佬要試清楚聽歌表現，唔通真係好有料到….



倒轉高音及尖鼻子單元是自家專利技術

低音單體用了一隻特別纖維，使之有紙盆的聲音特質之餘，又能承受大功率及大動態

QX系列座地喇叭都附有釘腳及釘墊，而且質素不俗，用家可以慳回一筆

喇叭插座選用Bi-wire設計

喇叭網以磁石連上喇叭

相對於M20，QX-3感覺細咗一個碼，雖然佢有兩個5寸低音單元，但仍對佢嘅低音還原有所保留。至於百事佬有無估錯？稍後再話比大家知。有嚟過「百事影室」嘅會員都知道，我係打直個廳嚟玩影音同聽歌，所以；如果喇叭如太矮的話，右聲道個低音單元就好有可能會俾張梳化手枕擋住（如第一幅圖）， QX-3呢？….唉....真係擋咗少少！無偈啦，即管放住先聽聽佢咩表現。

既然東哥講到QX-3咁巴閉，一於攞兩膠兩CD測試吓佢先。

QX-3播放Manger - jazz variants開首鈴聲非常清通飄逸，音場比之前不論深度同闊度都大出一個碼，但略嫌樂器位置感有點含糊，低音亦比想像中多，鼓聲好勁，仲有點勁過頭嘅情況，呢點真係有點跌眼鏡。之後放上鬼爪黑膠，QX-3高音果真唔錯，小提琴既肉地表露無遺，如速度感可快一點就更perfect！試完高音速度，之後梗係挑戰埋佢中低音啦。"Flamenco"節奏強勁見稱，拍手、踢踏同敲打舞娘手中嘅響板，都充滿現場感。透過QX-3演繹，輕易浮現出現場環境，踢踏地板質感好實在，氣氛高漲。最後試聽Reference Sampler Ultimate Hi Quality CD第一首「點指兵兵」，泰廸羅賓獨特唱腔，估唔到QX-3播人聲都有一手，唯獨結象有點缺失。既然佢有咁既能耐，我亦唔偷懶將佢移離死角位，一於俾多點空間睇吓佢係咪真係咁抵玩。

我將QX-3搬出離側牆約三呎，離後牆兩呎半，兩隻喇叭相距約五呎，無做任何Toe-in，再重播Manger - jazz variants，樂器乖乖地歸位，鼓聲再無boom，但力水尤在，有點似換咗喇叭。之後到點指兵兵，掃過幾吓結他之後，Teddy Robin嘅歌聲就似係坐喺喇叭後四呎唱歌，定位以及分離度都有兩聲道喇叭水準，東哥果然無老點！

經驗話比百事佬知，喇叭播歌好，睇戲肯定唔需要擔心，問題係後級嘅火力足唔足夠應付。QX-3靈敏度88db，唔係大食一族，所以我諗唔到佢有咩理由爆戲時會衰聲。好，先嚟一隻「THE ACCOUNTANT」藍光碟，片段裡面包含狙擊槍、衝鋒槍以及肉搏場面，子彈屋內四處飛，定位及動態都非常誘人，我於是開大多5個db再嚟多一次，Wow！好爆得嚟又好聲，全無「標」亦無「擦」。再嚟「DUNKIRK」4K碟，螺旋槳飛機喺整個聆聽空間穿梭，QX-3同JBL ARRAY 800中置可叫做合作無間，唯高音方面有少少差異，唔夠800刺激，不過已經算唔錯。大家仲記得起初百事佬形容QX-3「低音有點勁過頭嘅情況」嗎？嚟到爆戲就簡直係如虎添翼，炸彈落到地面爆炸時，QX-3同超低音銜接得好正，真係唔敢想像側邊有多隻12寸單元嘅QX-5低頻會有幾堅。

THE ACCOUNTANT




DUNKIRK




後記：
不可能！真係不可能！點解呢對喇叭細細嘅QX-3，可以十八般武藝，樣樣皆能。大膽講句，假如蒙住閣下雙眼去試聽QX-3，我保證你估唔到佢會係一對身價九千大圓嘅喇叭。又假如你親眼睇過QX-3嘅設計同造功，就更加唔相信佢係一對入門級喇叭。最後再假如你覺得百事佬有誤導之嫌，不妨打個電話去輝煌搵東哥，約個時間帶定碟上去試過清清楚楚。不過；最後破財千奇唔好賴我喎...

輝煌影音
九龍旺角西洋菜街51號有誠商業中心11字樓
Tel：21375638

bigpun1975

佢D低頻真係聲痴缐架

appe

我在東哥11楼那里将QX-3搬进大房用L-509X试過,劲爆得天翻地覆也不见脚軟,又試了女声、男声....等等七八首不同風格的歌曲,絕不能令人相信这是定價一万元還不到的喇叭所表現出來的能耐同声音。

wildmanhk

百事兄一於留低對Mission QX-3做前置取代對Revel M20喇

febytam

Made in ??

NETDSL0100

QX依對真係低到暈~不過我重SET緊個擺位

bigpun1975

NETDSL0100 發表於 2018-4-24 01:02
QX依對真係低到暈~不過我重SET緊個擺位

pepsiman

appe 發表於 2018-4-23 18:53
我在東哥11楼那里将QX-3搬进大房用L-509X试過,劲爆得天翻地覆也不见脚軟,又試了女声、男声....等等七八首不 ...

我諗住東哥個場器材堅、地方四正，好聲唔出奇，估唔到喺我屋企套cheap cheap雞都可以有番咁上下,讚...

pepsiman

wildmanhk 發表於 2018-4-23 23:45
百事兄一於留低對Mission QX-3做前置取代對Revel M20喇

唔得呀,QX-3低音單元過唔到梳化手枕...




所以我考慮緊QX-5...

pepsiman

febytam 發表於 2018-4-24 01:00
Made in ??

MIC,不過喇叭單元係由德國人設計,其他如外觀設計、音箱結構、調校聲音等等都係由英國人擔任,當然對喇叭賣得咁平,唔會係英國生產啦...

pepsiman

NETDSL0100 發表於 2018-4-24 01:02
QX依對真係低到暈~不過我重SET緊個擺位

擺好位記得同會員分享吓呀...

3g184

小弟都入左對QX5

pepsiman

3g184 發表於 2018-4-24 14:08
小弟都入左對QX5

正喎,呢對QX-5我都未聽過,師兄有時間同大家分享吓吖...

3g184

百仕兄！其實對喇叭嘅特性
你同其他師兄已經形容得非常好
我只聽兩聲度，上年一月對舊喇叭走左
所以周圍去試下喇叭，上左輝煌見到BEN哥
佢就二話不説，搬左對QX 5出黎
我一聽，咦？正如BEN哥講，聲音密度好高
跟手試多兩隻歌仔，再問下價錢
我同老虎諗都唔就乖乖比錢
我相信呢個價錢嘅喇叭，會係BEST BUY之一

bigair

9000大洋真抵玩，又多對性價比高喇叭啦

3g184

Sorry 打錯字
應該係幾個月前嘅一月先啱

bigpun1975

3g184 發表於 2018-4-24 17:20
百仕兄！其實對喇叭嘅特性
你同其他師兄已經形容得非常好
我只聽兩聲度，上年一月對舊喇叭走左

我很讚同

bigpun1975

bigair 發表於 2018-4-24 17:33
9000大洋真抵玩，又多對性價比高喇叭啦

佢對書架價論聲，仲抵

bigpun1975

QX-2 $5080