大埔區的終極葡萄

zelo

去咁多個家訪，當中都會有啲印象好深刻，即係就算冇再去，都會用記憶提返出嚟做話題，有某幾個師父級嘅地方係我到今時今日都唔會忘記，黎sir絕對係其中之一，上個禮拜終於又俾我約到家訪，因為黎sir依家好少時間喺香港，所以個機會要好珍惜，儘管當日有兩次黑雨警告，都無法阻擋我帶住抽酸葡萄入去。點解我對今次家訪咁期待，其實對上一次家訪因為時間好有限，加上黎sir套Kalista Dreamplay新開箱仲未煲好，而且我好想再聽吓個黑膠唱盤，最重要係上次每隻歌都俾人斬歌，有啲到喉唔到肺嘅感覺，所以今次好想要認真聽吓個黑膠盤。



黎sir套機基本上同我上次家訪一樣，不過環境有少少改變，聆聽空間嘅天花板拆走咗個假天花，所以成個聆聽空間嘅高度已經跟之前唔同，另一個改變係對喇叭換走哂啲原裝腳，配上Stack Audio Auva speaker isolators，其他都不變。





流程同之前一樣，先由CD聽起，套Kalista Dreamplay跟我記憶中係有分別，對上一次黎sir仲糾結緊用i2S定AES，所以上次線材係仲未定好，加上新機未開聲，所以我覺得分別幾大，今次聽我覺得音色好滑淨同細緻，配上FM西裝，高音圓潤而且充滿細節，配上JBL DD6700 中低頻嘅強烈能量感，音源跟喇叭可謂互補長短，加上寬深嘅音場，聽大棚嘢真係無得輸，不過咁，我個心由一入屋開始已偏向黑膠音源部份，所以CD依個環節，我係冇攝去C位聽，先留俾其他師兄聽。



到轉用黑膠盤部份，黎sir先用佢張珍藏‘The Sheffield Drum Record’暖場，我個人認為全晚只聽依隻碟已經滿足，黑膠音源始終係高一班，我覺得成個結像同音場比之前大一個碼，坐正皇帝位你係感覺到成套鼓就放正喺對喇叭中間，全套機係隱形，只會覺得係得一套鼓喺現場做live，鼓點扎實兼有勁道，小鼓聲俐落而有彈性，搞打Hi-Hat嗰陣，你係好清楚個位置係邊度，原本套碟係暖場用，不過我哋最後都聽晒兩面碟，而我當然坐正皇帝位死都唔讓開，一套碟已經滿足晒。



今次家訪非常葡萄，pH值爆燈，教料級別真係非我依啲小學雞可以比較，最後俾我套到少少料，黎sir 原來已經有目標劍指Summit Everest D2820，所以抽葡萄仲有排酸。

jerrytck

好熟面口，我都有。🐭😁