起跑線

七仔

老毛病突然發作, 牙痛文學一篇, 有同感者算係一種緣份 ... ...

回到八十年代既老家, 一個長大既地方, 儘管唔算最舊式, 冇牛下咁出名, 呢一期既公屋好多仲未拆 ... ... 呢度, 就係我既鄉下 ... ... 原來人同土地既感情, 濃到化不開 ... ...






同好多屋村仔仔女女一樣, 從一無所有, 盡一切努力打拼, 為左變成擁有, 為左跳出呢個地方. 當年懷著呢個心情, 幾年來每晚響呢個窗前挑燈夜讀. 今天, 搬走左廿年, 樹高左好多 ... ...






廿年後返到呢度, 重踏少年時既足跡, 景物變化不大, 還好不至於人面全非. 卅年老店好多仲響度, 當年風華正茂既老板, 今日仍老而彌堅. 當年青春可人既收銀亞姐, 仍緊守崗位.








社區中心, 陪伴懵懂少年多少時光. 諷刺地, 現址已改為老人中心.





上學路上, 以前草都唔多條, 現在已經好茂密 ... ...







還記得, 當年$3.50一餐乞兒兜, 白飯淋一殼哩汁, 另加魚蛋餐肉蛋, 盛惠$5. 當年邊個餐餐去茶餐廳食晏, 日日$10已經好有錢. 重會賣乞兒兜潮州伯伯, 佢話當年每日要煮300斤米, 呢d景況一早冇晒. 佢老人家今年八十幾, 仍每日留守店內, 看著日出日落 ... ...







觀塘係我既鄉下, 長大搬到好遠, 加上每天忙忙碌碌刑刑役役, 觀塘都好少返. 模型舖window shopping, 觀塘書店打書釘, 漢豐唱片有得睇冇得買, 每天放學如是的過. 唔駛好耐, 熟悉既裕民坊, 又會變成沒有面孔又冷冰冰既大商場, 可有可無亦無可再留戀.





到底係世事變得太快, 定係自己貪戀過去, 步伐無法跟上去?




今日已屆不惑之年, 冇咩成就, 當年希望從冇到有, 今日都擁有. 蝸居陋室叫做自己買, 買唱片早已唔駛諗過度過得個睇字, 想聽歌亦無須再聽鄰居焚機, 自己既入門級兩聲道聽得更多更多.

從起跑線上, 一起步就往前衝, 以求三餐溫飽加一塊磚頭, 期望自己變得更堅壯, 擔起一頭家. 做到了, 心裏便總有d唔實在, 硬係差咁d野. 廿幾年好似走左好遠好遠, 原來回到起跑線上, 剛好找到一直缺少既一隻角, 心靈找到最好既慰籍.

謝謝觀看!

七仔

交叉點 - 夏韶聲

http://www.youtube.com/watch?v=VJwZh5vABqA

toyotaae92

Very good!
- 發送自我的 iPhone 大板凳應用

little_stone

我都係屋村仔....

ERIC

人大了，總是想以前........
兒時生活是最開心!

bigpun1975

我們都是屋邨長大的

Manson

我細個住友愛邨的

BoB182

非常咁有感情，睇到人好感動
我以前都係算住係附近，我住係秀茂坪。
我都會好似師兄一樣，偶然揸車返去走一轉。
尋找番D回憶
記得小學時期剛興起便利店，為左飲杯思樂冰。
要特登行去你條邨到買
重有間戲院呢？依家改建成左咩呢？

居士

共嗚之作

吉田

我已前就住係牛頭角，早幾年我都好鐘意一個人番去行吓，回憶番童年時既點滴，不過而家冇番去囉！
牛頭角拆曬囉！

raymond430

小弟正是在牛頭角下村長大的,睇完ching個post,真係眼濕濕
還記得當年(廿多年前)差不多每星期日都會步行至觀塘食嘢,睇唱片......

bigpun1975

還記得以前士多的可樂孖條, 汽水打包

七仔

尋找番D回憶
記得小學時期剛興起便利店，為左飲杯思樂冰。
要特登行去你條邨到買
重有間戲院呢？依家改建成左咩呢？BoB182 發表於 2011-10-16 17:20

街坊您好! 少年時久唔久都會行路去秀茂坪, 現在早已全部改建, 270度海景靚樓. 果陣去seven, 有個變態飲汽水法, 氣水任斟, 專登幾種氣水溝埋飲, 覺得抵d ... ... 咁飲法又唔見肚屙, 哈!

順利戲院到八十年代尾, 好多亞婆現場粵曲聽, 可惜果陣實在唔識欣賞. 過左咁多年返到去, 已改建成冷冰冰冇面孔可有可無既商場. 領匯乜都計過盤數, 摧毀原有生活方式. 儘管我地冇權要人地蝕錢保留以往既野, 冇權要人地既生活停留幾十年做活化石, 有d野冇左, 就係冇左.

諗起呢隻歌: 仙杜拉 - 風雲

http://www.youtube.com/watch?v=SD3IyFqtVtQ

七仔

我們都是屋邨長大的
bigpun1975 發表於 2011-10-16 16:42

屋村仔生活, 甜酸苦辣百味紛陳. 今日仿彿經過多年既努力擁有一d野, 由冇到有, 憑一口氣. 至今亦不會忘記廉租屋帶俾我地一個平宜又安穩既環境, 俾我一直向前無顧慮. 港督麥理浩十年建屋計劃既德政, 永遠銘記於心.

還記得, 同一個窗前, 對面官立中學開幕, 遠遠眺望港督麥理浩架黑色大Daimler個車尾 ... ... 咦? 乜冇車牌既, 中間果個好似係 ... ... 皇冠!

七仔

共嗚之作
居士 發表於 2011-10-16 18:04

居士兄, 各位師兄, 我地都算係有緣人

有時路過舊屋村, 去到人地個鄉下, 都會特意搵間老店幫趁下, 借用一下返老家既感覺.

七仔

記得當年(廿多年前)差不多每星期日都會步行至觀塘食嘢,睇唱片......raymond430 發表於 2011-10-16 20:04

果陣成個觀塘至巴閉果間唱片舖, 係漢豐. 咩碟都有, 公園旁後欄間一隻角, 亦都係後來大快活既後門, 賣碟既品種咩都有. 小小一角, 音樂天地好大好大, 好多classics賣, 佢識我我唔識佢. 現在漢豐個位已改賣九唔搭八dvd, 未來裕民坊重建, 好快會冇埋.

有個地方印象好深, 觀塘匯豐對面果棟大廈, 即係中移動果個位, 以前掛左好多招牌, 又蕭后又蕭小姐咁 ... ... 小學細個得滯唔識 ... ... 咦? 乜呢度咁多人姓蕭既?



讀果間小學響牛頭角下村過少少, 果陣去對面孔雀樓打乒乓波, 俾人報寸搞到見家長 ... ...

Manson

以前住公屋，格泥鄰社關係好好，
差不多年齡小朋友玩唔在講（走廊踏單車，凹口踢波，三層樓玩足迷藏）
連鄰居資料都可以知得一清二楚，有時互相借下油借下糖，
現在住左幾年，連格泥性咩都唔知，亦都唔會好像以前開大對門訓覺.

七仔

以前住公屋，格泥鄰社關係好好，
差不多年齡小朋友玩唔在講（走廊踏單車，凹口踢波，三層樓玩足迷藏）
連鄰居資料都可以知得一清二楚，有時互相借下油借下糖，
現在住左幾年，連格泥性咩都唔知，亦都唔會好像以前開大對門訓覺.Manson 發表於 2011-10-17 00:17

小弟有個體驗. 廿年前未有高鐵既年代, 飛機票學生哥買唔起, 大陸旅行正路會搭火車. 有d路線仍然有, 叫做硬臥. 坐兩日一夜上北京, 三日兩夜去西安再三日兩夜去新疆烏老木齊. 三日兩夜, 全車原來都係陌生人, 成卡車只有兩格廁所一個熱水器, 食同屙都靠晒佢. 正正係成班友夠晒無聊, 困在車廂, 物質又缺乏, 呢個就係互相照應既時候. 得閒得滯? 一齊吹水, 天南地北無所不談, 反正人人都來自天南地北. 唔會分話呢個下舖係邊個既, 吹開水就坐埋一齊開開心心. 停站買啤酒小食, 買返黎一齊共產, 更加唔愁食晒煙斷米既問題, 有煙齊齊煲. 打熱水, 你個壺都冇播, 順手拎埋唔駛客氣. 卡車廣播某車卡有小朋友滾水淥親, 旅行用雲南白藥碞用, 果陣仲係最好既東西只有香港買到.

如是者, 在最匱乏既情況下, 人係需要互相依靠. 臨到站, 成卡車已經變左沒有陌生人既世界.

舊屋村廿幾年前, 仲未興裝冷氣, 果陣邊伙裝冷氣唔碞規格, 屋村辦事處會要你拆. 夏天冇冷氣, 夜晚唔打開門點訓得著? 果陣成條巷, 邊伙嗌交邊伙打仔, 成層樓都知, 冇咩私隱. 現在既新屋村, 基本上每戶都有冷氣, 廁所廚房當然有, 呢個乜都齊全既處境, 人同人之間不再需要互相依靠. 果陣一家人搬去居屋有廿年, 直到現在都搞唔清楚邊伙姓甚名誰. 廿幾年前, 徙置區都未拆, 百零呎住一家八口都有, 邊度有咩隱閉青年?

raymond430

以前住公屋，格泥鄰社關係好好，
差不多年齡小朋友玩唔在講（走廊踏單車，凹口踢波，三層樓玩足迷藏）
連鄰 ...
Manson 發表於 2011-10-17 00:17

    真係越講越感觸,諗返好多以前嘅嘢,好想......

大ken

漢豐.........我響度買左好多黑膠
呀侖, 哥哥, beyond..............
45度擺放CD