百事佬手記(5)
百事佬披上戰衣，飈著戰羊，穿州過省，
走遍大街小巷，四出偵查，
索盡最新行程，為大家報導市場上嘅最新消息。
投投碰著黑
呢期你話唔係投影機嘅世界都唔信，個個品牌都推出後繼機，
連ESPON都以EH-TW8000加入戰團，可知ESPON對上一部TW-4500已經係兩年之嘅產物，
今次TW8000以白色為主機身示人，擺明係想走老闆政策，爭取入屋機會。
12月13日，我同一班HIENDY會員，拉大隊浩浩蕩蕩一行十人操入星光行安橋showroom，
試睇呢部聲稱擁有2,400流明、20萬：1動態對比度、
同埋擁有專利嘅Deep Black嘅EH-TW8000有幾咁利害。
喺外型方面，除咗轉用黑白色機身外，上一代嘅流線型側眼仔設計已經不再，改為硬朗型鬥雞眼，
而且仲加入電動活門添！大家千祈唔好睇少呢隻Auto Door呀！因為好多投影機係用人手釘蓋設計，
如果釘蓋時手粗粗的話，就好容易郁到個focus，到你下次睇戲時又要重新校過，
好似我咁掛到部投影機上到天花板咁高，下下都要擔櫈爬高開冚鏡頭蓋，真係幾麻煩。
而最慘嘅係你唔知郁咗搞到畫面對唔中焦，仲以為部機壞咗添！
HIENDY會員聚精會神地欣賞TW8000的演出
現場人頭湧湧，好不墟冚
整個試影會一共分三個段落，分別係2D、3D、同埋2D轉3D。2D播嘅係近期試影會大熱嘅變型金剛3，
對上一次睇ESPON TW4500試影會時係睇變型金剛2，估唔到兩年後睇ESPON又係變型系列，
唔通到變4時ESPON又有新機出？接住當然係到主角3D啦！
今次TW8000所用嘅係專為3D投影機而製作嘅0.74吋C2Fine 480Hz 16:9 D9面板，
再配合全新設計嘅Bright 3D Drive驅動器，睇3D電影時可確保畫面流暢時，亦減少殘影及疊影。
最後大會特別揀咗許志安最新演唱會嚟展示一下2D轉3D功能，轉咗3D之後，
許志安所著嘅極姣粉紅色外套，透過3D眼鏡睇仍然能保持光度，
而且3D功能亦將佢特別大嘅地方〝鼻〞造得好立體。
HDAV主持人YUKI講解3D眼鏡設計
EPSON負責人介紹全新TW8000投影機
完場前，AV Man 撳入menu 同大家講解TW8000嘅調校細節，
而最吸引我嘅莫過於可以類似三槍機一樣獨立調校RGB三原色，
只要用家肯花時間將三隻原色續一疊齊，表現將會更上一層樓呢！
現場使用之器材
睇完呢部機之後，真係有啲衝動轉玩3D機，而TW8000嘅黑位絕對拍得住DLP。
〝投投碰著黑，我就嚟死得〞
小弟當然唔會錯過機會同幾位美女拍照留念啦
++++++++++++++++++++++++++++++++++++++++++++++++++++++++
假日好去處
話時話；都有成廿年以上無試過十幾廿人去睇戲喇！撞啱M:I:4上演，
即管吹雞試吓呢個會唔會係 mission impossible先！
吹吓吹吓竟然有成15人喎，希望嚟緊新年賀歲片，HIENDY可以包起成間迷你戲院一齊睇戲過吓癮啦！
我地HIENDY其實已經唔係第一次集體睇戲，不過之前只係同版主一齊睇多，所以無出過POST咁解啫。
咁今次係有會員一同參與，就一定要搵間好D嘅戲院先至夠體面呢，所以選擇咗I-SQUARE IMAX戲院。
原本我哋係約咗七點半喺滬江食晚飯，但我六點半已經到咗，
所以無所事事走咗上去I-SQUARE行，去到五樓發覺除咗威達之外，原來仲有幾間大型影音店，
有一間仲放咗部成100吋嘅PANASONIC大電視添，真係有氣勢！
當行到最尾；我見到一間原本開設喺旺角朗豪坊嘅數碼坊，都搬到I-SQUARE，
店內大部份產品同舊店差唔多，仍舊有兩間影音房，仍舊係掛住〝稍後片刻〞。
我呢個鄉下仔第一次睇IMAX電影，所以入場見到個幕都嚇咗一跳，咁Q大嘅？
好彩HIENDY粗口皇帝一早已經上網order定戲飛
（有個會員聽到我話係皇帝上網訂，第一個反應係：吓，乜佢咁叻識得網上訂飛咩？）
所以我地坐嘅位置算唔錯，只不過係偏右咗少少啫，做唔到皇帝。自從玩咗家庭影院之後，
唔知大家有無同我一樣，就係每次睇戲時都會特別留意啲音效，中置人聲靚唔靚？
前中置聲音移動流唔流暢？後置蛇冷夠唔夠連貫？超低夠唔夠〝行〞？
亦會開場前特別打量一下隻投影幕同埋啲後置擺位，大多數戲院都係一排過兩邊放幾隻蛇冷，
不過I-SQUARE呢間UA就淨係喺兩邊角落頭各擺一隻好似人咁高嘅後置，距離座位足足有兩層樓咁遠，
所以啲聲都幾準，亦唔會話同前置音量有太大差距。睇完戲粗口皇帝同是嗎兄都不約而同咁話：
今次係我睇咗咁多次IMAX最好聲嘅一次！
M:I:4片長兩粒鐘，話無冷場就一定係呃你，不過以老湯接近五十歲嘅中坑嚟講，
算係交足功課，總好過叫福伯做動作片咁難頂吖！
呢套片相信出BD時又會係我嘅囊中物，有時間大家都不妨去UA IMAX感受一下吖！
| 
IP卡
狗仔卡
發表於 2011-12-19 15:45:14
提升卡
置頂卡
沉默卡
喧囂卡
變色卡
顯身卡
發表於 2011-12-19 16:30:45
)
發表於 2011-12-19 20:17:12
買啦
