本帖最後由 七仔 於 2012-10-30 01:53 編輯
細細個行過國貨公司, 地面層既玻璃櫃檯, 會有一排排既英雄墨水筆, 同埋一排排既海鷗錶.
海鷗錶產於天津, 係中國最早自主研發生產既手錶, 1955年在工具同物料缺乏既艱難情況下, 生產五一手錶. 現在係全球最大產能既機械手錶廠, 基本上兩三萬以下買到既瑞士定邊度牌子既機械錶, 好大機會係海鷗機芯. 海鷗唔係淨係鬥平, 近年自主研發既陀飛輪, 國際鐘錶展囉埋獎. 囉獎果d, 都係小弟買唔起既 ... ...
http://www.seagullwatch.com/about.asp
http://lux.hexun.com/2012-05-10/141240948.html
同另一國產錶名牌上海錶比較, 上海錶款式比較多樣, 靚靚仔仔, 不過論到品質, 出廠卅幾年都咁準, 海鷗冇得頂! 上列同埋下列右兩隻係上海牌.
呢隻老豆戴左卅幾年, 都仲係咁準, 瑞士製自動機芯, 當年屬超值之作.
早兩年跟手去油麻地某老店, 跟手掃左幾隻倉底貨. 新簇簇唔捨得戴, 後來去淘寶淘左隻同款二手, 仲貴過伯伯一倍.
點知搵海鷗搵上癮, 買國產錶都係原汁原味好d. 同埋祖國越黎越有錢, 舊物會越黎越值錢, 升左值拎出黎望下都興奮. 當年中國第一款出口既手錶, 就係海鷗ST5A, 19鑽上鍊冇日曆. 原東風牌生產線, 因為出口唔想太過政治色彩, 改名海鷗, 1969年起投產.
http://blog.sina.com.cn/s/blog_5e12e1760100pryo.html
左一係ST5A, 19鑽手動上鍊冇日曆, 左二至四係ST5B單曆手動上鍊, 右一係ST5D單曆自動. 自動ST5比較難搵, 手動上鍊冇日曆, 咩顏色周街都係.
ST5D單曆自動
去到1978年, 海鷗自主研發中國第一隻自動雙曆ST7, 大概1982年試製成功. 當年因生產或商業原因, 並無正式推出市場, 現流傳世上既有自動成品同埋手動上鍊半製成品. 果陣時正值石英錶時代開始, 又準又薄又輕, 機械錶漸次消失於大眾市場, 海鷗表步入艱難時期. 連海鷗在內既中國手錶廠, 好多時冇糧出就出手錶, 自己想辦法變錢. 聽的士叔叔講, 當年定價人民幣130大圓既ST5, 流出價60, 買左就娶老婆, 果陣人工都仲係36大圓, 做又36唔做又36. ST7好可能在呢個背景之下流出市面. 以品質同規格, ST7係計劃經濟尖端工業產品, 係中國人既光榮. 呢隻祖國光榮小弟高價買左隻condition麻麻既二手, 戴左半年就壞左, 未及影相已經送上海鷗廠, 只能借圖一用. ST7冇推出市場, 之後賣出口既就係進口瑞士錶芯, 我同老豆戴緊果隻.
絕版手錶, 加上從未推出市場, 搵兩個手表師傅搞左大半年都搞唔掂. 碰碞小弟出差天津, 夾硬蛇左半日, 專程去天津海鷗廠. 海鷗廠位於天津機場附近工業區, 個個廠都老年咁大, 位處偏僻. 火車站的左七十幾蚊先至到. 嘩~~~個廠大到丫! 影到既只係小部份, 呢D先叫做工業丫馬!
小弟呢隻ST7, 同埋手上果隻古董, 勾起海鷗廠老師傅好多回憶. 亦因年代久遠, 展廳姐姐好幫手, 兩位老師傅未食完飯已經俾佢捉過黎幫手. 現在小弟既ST7, 老師傅埋首努力中. 一件工藝結晶, 包含左好多人既心血. 傾得開開心心, 睇中左隻復刻版ST3中國空軍第一隻國產計時碼錶. 嘩~~~乜用埋儀器驗過先至賣, 真係諗都未諗過 ... ...
過晒食晏時間, 加上地處偏僻, 厚住面皮求得一飯, 工友餐相當好食.
可能海鷗廠真係夠晒偏僻, 竟然有個港燦三千公里專程飛過黎整一隻古董錶, 海鷗廠既朋友都好開心. 等食飯路過, 碰到海鷗廠老總, 握握手傾左幾句. 整隻舊錶買隻唔貴既錶, 竟有咁好既禮遇, 諗都未諗過.
最後袋左呢隻手錶 ... ... 唔係! 係工藝品先至碞!
以海鷗廠既品質, 應該值得更多更多. 期望呢隻國產最佳既手錶, 能真正打響品牌, 行銷世界, 做到國產既天梭亞米茄. |