一切緣於一個巧合.
今年我第一次上廣州東方音響SHOW, 第一次見識國內同胞對音響/音樂的發燒程度, 比香港的發燒友更專注, 更瘋狂.
鎗王直擊 - 2015廣州國際音響唱片展
最後一日入會場, 機緣巧合下到訪世紀格雷的示範房間驚為天人, 我可以好大膽咁講, 以我個人口味, 世紀格雷這房間是全SHOW最好聲的國內品牌.
仲記得當時世紀格雷使用一部9i-ADM配搭五部同廠合併機推動PMC大喇叭, 聽緊BLURAY 古典FILE. 那一份現場感, 幼細與力量並重.
返到香港, 出完番VIDEO後, 咁啱原來HIENDY有網友大半年前已購入這部9i-AD, 這網友還出了一份好詳細的介紹這部9i-AD的各項功能. 在此, 真係好多謝網友1o1o的報告.
世紀格雷 9i-AD 限量烏金版 HIFI 音樂播放機介紹篇
這篇介紹一出, 我見好多師兄都對這部9I-AD極有興趣, 所以我得到威馬幫助下, 直接與世紀格雷廠溝通, 並大膽要求他們借出一部9I-AD給我們測試及報告. 就這促成這次HIENDY首次三個版主共同測試的器材, 世紀格雷9i-AD多媒體播放器.
由於豬賓版主又玩AV又玩2 CH, 所以我們決定將這部9I-AD先送到豬賓版主家中作首輪測試.
REVIEW BY BIGPUN1975
好喇,見鎗王同百事佬都力推呢部9i AD, 我當然對之極有期望,在煲練不到三小時便商約到我家測試……
吃過晚飯後便急急開機,先試播Blu-Ray, AB 比之後,表現真係秒殺......
係部9i AD 比我用開嘅Cambridge 751 秒殺,畫面都可以説勉強贏751, 但係聲音完全不及格,又濛又焗,毫無動態,再試2ch, 音場推前,高頻很尖,分析力弱,基本上播半首歌已經頂唔順,Hiendy 初會9i AD , 基本上是不歡而散……
唯有努力煲下部機,BD ISO, 2ch file 交替煲,每日差不多煲二十小時,一星期後捉埋百事佬上嚟再試,都係試AV 先,首先畫面真係吸引,很sharp, 力度很足,聲音那股雲霧已消散,高低延伸,動態已回復應有水平,此回合9i AD 可以說是輕勝。
至於2Ch 方面,我特意將用開在CD 機的缐材放在9I AD , 以達至公平原則,因為9I 都是用Wolfson chips set, 所以聲底與我用開的 Arcam 很相似,但動態,聲音分隔度和细節都更優勝。
9I AD 缺点绝對是有,首先remote apps 功能比較落後,好多功能都無。HDMI lock 唔到訊號時有發生,
不過......
以兩聲道的表現的確穩定可靠,以價論聲,單是2ch 的表現足以令我有入手的衝動了!
REVIEW BY 百事佬
雖然係豬賓屋企見證咗呢部9i AD 煲機前後既超大分別 (說實話,百事佬一向覺得「煲佢幾多、幾多個鐘會好聲好多架」係Sales既售貨技倆,好聲係會,但好聲好多就.....),不過百事佬對豬賓套器材唔係太熟悉,而部9i AD 又真係幾鬼吸引,所以二話不說pack箱拎走帶番屋企玩......
為咗可以更暢順控制部9i AD 同部9i BDR (因上次o係豬賓度玩有唔少操作上既問題),所以今次約埋威馬馬sir一齊試玩,點知鎗王又話要嚟聽聽部機係咪咁神奇.既然係咁,一於煲多佢幾日先.....
今次主要試AV部分,部9i AD 有雙HDMI輸出,當然要聲畫分開行啦! 就畫面而言,確實比部Cambridge 751 優勝,紮實有力,顏色走艷麗方向,雜訊輕微,合格有餘! 聲音呢? 真係奇怪,點解出唔到高清音效既?? 轉去其他語言(聲道)又無問題有聲出,不過係dolby digital,唔係嘛!! 咁都得?? 無計可施之下,馬sir建議由HDMI雙出轉為單出, 咦?? 果然出番高清音效喎, 不過畫面就因為唔係直出而差咗D! 唔好理咁多,放套復仇者聯盟2用Ironman vs. HULK一段爆吓佢先. 正如豬賓版主所講,聲音幾"行",有少少O記品牌影子,音場大小四正,前後連貫不俗,超低頻快上快落,控制力唔錯,不過就發現多兩個問題:
1. 選取段落同快速搜尋後,畫面會窒吓窒吓,而且會無聲音,要接近一分鐘後先可以正常播放;
2. 有甩咀情況,雖然可以利用AV Amp內音頻延遲校正,但不夠user friendly.
馬sir見狀即時QQ世紀格雷負責人,佢回覆係廠方是以日系機種作參考,可能對歐美機有兼容性不太全面的情況. 我記得上次o係豬賓屋企用Pioneer AV Amp時,情況又真係無咁嚴重喎!
玩咗一輪之後,見到鎗王面色轉黑好唔耐煩咁款,就即時熄AV轉玩兩聲道.百事佬知道鎗王係古典癡,梗係播古典俾佢嘆吓啦! 點不知聽咗兩首之後,鎗王笑笑口咁講:百事,pack起佢車嚟我度試清楚佢!
玩聽歌我當然無資格同鎗王爭皇帝位啦,不過企o係後面聽都覺得套機好聲咗,音場闊而深,密度亦有所提高,好似大咗個碼咁. 不過都係唔好咁快落判斷住,等下次去鎗王屋企聽清楚先都唔遲...
註:特別一提,部9i BDR十足十周星馳果把蠱惑的鎗一樣咁盞鬼,唔係有馬sir在場,根本無可能靠(張)說明書而搞得佢掂! 首先要佢連接部9i AD的話,駁好線都千其唔好開部9i AD先,否則佢地就會有如同陌路人一樣互不相干. 好喇! 就算連接咗,都唔好一早放定隻 HDD落去櫃筒裡面,否則係打開唔到個碟盤既,若果真係已經放咗入去,就需要按動搖控器上「黃色」及「藍色」按鈕解除HDD先可以撳個盤出嚟,真吹漲!! 最初仲以為部9i BDR唱盤係壞既添...
REVIEW by racewong
話說我在百事佬屋企聽左兩首古典, 發覺這部9I-AD已真正進入狀態, 而佢在兩聲道的音質聲效表現, 令我決定寫我第一份國產品牌的播放器報告.
講真, 我跟大多發燒友一樣, 我對國產器材一向存在有色眼鏡, 不竟在國內經常出現"COPY CAT"的器材實在太多, 難得世紀格雷堅持原創精神, 無論硬件軟件都一手一腳設計. 單單以這份堅持, 我們作為HIENDY的一份子, 沒有不支持的理由.
當然, 單以熱誠與堅持, 實不足以在音響市場立足. 當中的外型設計, 音質聲效表現也是關鍵所在.
世紀格雷9I-AD就是擁有我以上講的原素, 才能令我破例第一次寫國產品牌. 因為當我聽完佢的聲音後, 我沒有不介紹給HIENDY網友的理由.
到步後的9I-AD, 開箱後就放在我的SYMPOSIUM SEGUE板上.
當接上HARMONIC TECHNOLOGY Magic Power III AC-10 ACM旗艦電源線及GURU XLR後, 首先試聽世紀格雷跟機的2T HARDDISK, 入面有好多好靚的FILE,
當中包括SACD ISO, DSD等等. 前後級就使用ARC REFERENCE 5SE前級及一對BRYSTON 7BSSTC後級, 喇叭當然使用我的至愛MAGNEPAN 3.7.
當聽左兩分鐘左右, 發覺9I-AD的XLR輸出GAIN比起我原用的ARC CD8輸出低很多.
我立即聯絡世紀格雷詢問如何可以增加XLR的輸出GAIN, 但答覆令我好沮喪. 原來今次SEND來香港這部9I-AD的輸出放大主力於RCA. 如要使用9I-AD的XLR, 其輸出GAIN只有2.3v. 反而RCA輸出GAIN是世紀格雷特別設計, RCA插輸出可高達5v.
咁就慘啦, 我套ARC既RCA表現比XLR差20%. 咁即係對部9I-AD唔公平啫. 但都無辦法啦, 唯有急急向朋友借對二千幾蚊既RCA頂住先啦.
當9I-AD接上RCA後, 又係聽番果兩首古典....E..EE..EEE. 有料到喎. 比我預期的音質還要好.
音響味與細節並重. 音場闊度與分析力同我部ARC CD8相差不遠. 當中尤以一些高清檔案. 細節量比我部CD8還要多.
當然, 連貫性、微動態、柔順度、音場深度與質感密度, 與我的ARC還有段小距離. 但這小小的距離, 已足以令我對眼前這部世紀格雷9I-AD有著很高的評價.
試完佢既PLAY HARDDISK FILE表現後, 我就拎左條鴨記賣緊50蚊的同軸線出黎, 使用ARC CD8同軸輸出, 接駁到9I-AD的同軸輸入. 當使用CD8作轉盤後, 9I-AD表現出的微動態與柔順度竟可再一步提升.
講真, 試到依到, 我真係有諗過賣左部ARC CD8入手9I-AD. 既然部9I-AD咁高水準, 我決定搬開部CD8, 等我可以慢慢試清楚9I-AD的功能與表現.
經過一星期的測試, 總結這部9I-AD:
強項: 兩聲道表現真係好強. 這應該是我聽過咁多國產CD機當中, 表現最為優秀的一部. 解碼方面, 更可以播放SACD ISO(DSD64格式)及DSF、DFF(DSD64格式)
單以兩聲道聲音的表現, 9I-AD已超出佢既身價, 而且佢仲擁有AV方面的功能, 又可連接NAS玩. 又可當佢係DAC使用.
同時擁有MUISC SEVER與高級DAC的一體機. 仲有埋個靚靚LCD MON. 對CAS剛入門的玩家簡直係極之吸引.
改善空間: 軟件上仍有好大改善空間, 例如: 如可以接駁DVD ROM後就可以燒CD入HARDDISK就方便好多了. XLR的輸出GAIN可以調高至3.7V以上. REMOTE 觸感不良, APPS板面等等.
但總括這部9I-AD的性價比, 以"聲音收貨"或"外觀先決"的用家一定會喜出望外.
你地有無興趣聽下這部世紀格雷9I-AD的表現呢? 如你地有興趣既話, 我就安排一下.
http://www.hiendy.com/hififorum/ ... id=92254&extra= |