上星期剛到手既兩對RCA與 XLR接線, 係一個新品牌， 名叫Acousimatics. 根據代理所講， 依個品牌設計者係英國人， 開始時只係小型公司, 專門按客人要求tailor made影音相關產品。 一直到左早兩年有投資者注資，獲得資金後推出自己品牌Acousimatics (AM) ，以線材及膽機先投放亞洲市場，所以當我在佢地官網搵資料時， 發現佢既Dealer只有國內與香港銷售。
產品保留英國設計但因為全部人手製作成本問題所以在臺灣生產。
而依個品牌既產品暫時只得四個Grade既RCA, XLR接線， 另有膽機出售。
而本文主解FS-S係旗艦系列。 對下還有supreme S1, Supreme S2及Magic S2。
反而電源線， 喇叭線還未推出。
至於AM 造線技術， 所有型號都有一個共通點，除左全部純手工製作外就係所有產品都使用4N純單支銀做線芯， 從入門的型號至到老二Supreme S1都使用3支單支純銀設計，只有我今日介紹的FS-S採用4支單支純銀製作。 另一分別就係使用既插頭都會跟據不同級數而使用平貴既插頭。 而我手上這對XLR就用左Cardas鍍銠XLR插,
而RCA則用了Xhadow 厚鍍銀插頭。
新線到步， 二話不說就先用煲線機煲佢兩日。 等佢熟透先慢慢試聽。
今次既測試器材， 訊源我係用我套黑膠系統， Nottingham Annalog +Sumiko Starling 唱頭。 唱放當然係Nagra VPS.
經NAGRA HD PRE-AMP去DANISH AUDIO DESIGN THE LITTLE BIG, 反而喇叭就用左兩對喇叭, 其中之一係YG SONJA 2.3, 音展要還喇叭比代理, 所以我將大廳果對AUDIO PHYSIC CARDEAS PLUS搬埋入房.
先唔好討論邊對喇叭好聲, 我地依個REPORT既主角係AM FS-S純銀接線, 手頭上就有XLR及RCA各一對, 以我玩NAGRA HD PRE既經驗, 使用RCA接駁, 比XLR更有質感, 連貫性更好. 所以我就先使用一對FS-S RCA接駁喺VPS與HD PRE之間.
拎上手既FS-S RCA線身極柔軟, 根據代理所講, FS-S用左四層避震網作屏敝, 但可以做到咁柔軟, 抵讚.
而FS-S RCA另一吸引我既係佢粒XHADOW插頭, 厚厚既鍍銀, 唔講以為係純銀插頭呢.
以我所知, 四粒XHADOW 鍍銀RCA插頭散賣都要二千幾蚊.
單睇插頭, 我對依條線又加多D分數.
正式測試所使用既軟件, 我用左兩張女聲, 一張男聲, 及一張古典.
總括聽感: 睇主題就知道依對FS-S RCA的強項係女聲. 當我聽SUKI 及 朱紫嬈兩張黑膠時, 發現中高頻既分析力與微動態超強, 連貫性十分好. 用最簡單既形容詞就係[感染力]. 依兩張碟我先後都聽左數十次, 除左朱紫嬈隻碟在凌智SHOWROOM聽過最好聲外, 就係今次使用了FS-S後的聲音. 尤其係第三首[一生不可自決], 聽到我真係眼濕濕.
除左女聲感染力出眾外, 仲有佢既背景好靜, 鋼琴的琴膛與按琴鍵力度都能好清楚咩聽得到.
當然女聲吸引, 連帶係中高頻既尾音都好有貴氣.
如果以現今最頂級既線材來作比較, 單單以女聲既頻段, 這對FS-S絶對唔會輸比任何天價線材.
至於低頻表現, 我聽左一張男聲黑膠與古典後, 發覺佢性格真係走貴價線材既路線, 低至超低頻既量感與下潛力都能夠超出佢既身價, 唯獨是當聽一D打鼓既樂章時, 中低頻既彈跳力與衝撃力略嫌斯文.
測試完女聲, 就拎張古巨基既SALUTE TO DEAR LESLIE黑膠出黎， 順便懷念一下張國榮。
當我聽到古巨基既聲音， 一幕幕哥哥喺舞台上既風采影像在我腦內出現。 聽到我好感觸 。 依對FS-S真係好有感染力呀。
喺我聽完首DEAR LESLIE後, 我有個衝動想改左個標題
因為依對FS-S唔只女聲正, 連男聲都一樣咁強感染力.
至於爆棚古典既表現, 我只可以用”靚”來形容每件樂器. 因為每件樂器既質感與尾音都好順滑. 而大動態樂章更輕易做出氣氛. 我可以講依對FS-S聽古典, 無論係小型三四重奏, 或是大型管絃樂, 都有上佳水準. 絶對適合任何古典迷.
講完佢條RCA, 我就試埋對XLR, 因為兩對線既線芯都係一樣, 分別只係個插頭. 其實只睇佢對CARDAS XLR插頭用鍍銠, 就估到結果.
的確喺AB比較下, XLR既FS-S比RCA更爽快, 音場更大. 但人聲韻味就RCA好好多.
不過又話分兩頭, 買XLR 或是RCA, 最主要都係睇下部機既強項喺邊一邊. 好似NAGRA就係RCA, 相反在大廳部VIOLA, 則是XLR略優.
另外我要講一講係依個AM FS-S新品牌型號, 除左可以在訊源與前後接駁外, 仲可以用喺前級去後級接駁.
當我嘗試將FS-S XLR 接駁到NAGRA HD PRE與DAD THE LITTLE BIG後級, 聽感上, 佢既能量與速度都好正, 而佢獨有優美性格就會淡番少少
總結: 這英國品牌台灣製造既AM, 實實在在咁話比你聽單支純銀線芯應有既特有性格係咩, 喺
香港家居玩音響, 常聽既歌曲十首有八首都係以小品人聲為主. 而依對AM FS-S正正就是小品人聲最強項.
代理明白新品牌線材係需要比多D人試清楚佢既吸引力, 所以在俱樂部內既FS-S RCA及XLR都可以有[借線服務], 有興趣既會員仲唔快D打比我地約時間?
HIENDY俱樂部電話: 6508 8000
