葡萄老祖去漫遊 1 - 由頭Dan到尾

zelo

之前幾個月忙住搞自己地方，見搞咗咁耐都係咁衰聲兼冇進展，加上我又見班燒友近排頻頻換新玩具，激發起我酸葡萄嘅感覺，我決定出去葡萄園行返轉，正所謂隔離份咸報特別精彩，聽吓人哋啲機，可能會有新啓發。



諗吓諗吓原來我從未家訪過T先生，記得初初識佢時，佢係上我度”話”想聽吓對Alexia V，我記得佢試完之後好滿意，仲話第二日要即刻走去代理訂貨，點知最終佢同我講訂咗Alexx V，我聽到都好驚奇，個心情就好似同佢去威，以為教佢揀A牌已經好叻叻，點知原來佢嘅目標已經劍指向model級，果然層次唔一樣⋯⋯之不過T先生入咗對喇叭後我又從未去過家訪，因為依段時間佢又搬屋又裝修，卒之等到近排知道佢套新機到，我決定破門入屋。



T先生用情好專一，一直以來都係玩兩個大牌子，佢之前喇叭係用Wilson Sasha ，Amp就一直用住Dan D’Agostino，由最初Momentum integrated、到Momentum C2再到今日嘅Relentless，所以佢對依兩個牌子好熟悉，調教自己口味就更得心應手，音源方面亦都好專一，因為T先生家藏海量CD，一套dCS四季已經夠晒聽。



一套CD音源系統、一套amp加對喇叭睇落非常簡單，但睇真啲就非常唔簡單，T先生對接線都好有要求，由牆蘇開始已經唔係普通嘢，全部用上Agrento FMR EE牆蘇，經蛇王Shunyata Omega X- XC 接去Everest ，一條Odin gold入Vivaldi  DAC，三條Shunyata Omega俾Vivaldi clock , upsampler 同轉盤，不過最吸晴係前級用上Siltech Royal Crown電源線，而後級跟機線就直接插Argento牆蘇，淨係電源線部份已經睇到眼突。









接線方面以Siltech 同Transparent 為主導，source去前級為Siltech三皇冠，前去後就用Transparent Opus G6，最勁揪係對喇叭線，Transparent Opus G6紅腳黑松露燒鵝，成套機嘅配搭確實係絕配，dCS + Dan + Wilson + Transparent，依個組合絕對係最強組合。



講返套機， Alexx V喇叭我已經非常熟悉，所以今日唔係主角，焦點放咗喺Dan D’Agostino Relentless 前級同800後級，依套係全港第一套黑金版，加上我從來未試過喺家居聽過Relentless，仲要夾返佢絕配嘅Wilson 喇叭，所以我係好期待，Relentless個造工已經冇需多講，黑魂版加上金邊，配落對全黑鋼琴面Alexx V，成個格調好高貴，加上精緻家居環境，T先生認真夠品味。



套機warm up咗一陣，開始入正題，第一首我哋揀咗聽布蘭詩歌，因為今次有位朋友係布蘭詩歌狂迷，我哋都叫佢做布蘭斯‘哥’，只要有佢出現，首布蘭詩歌就會自動成為BGM。Relentless Pre Amp控制力果然一流，配合800後級嘅驅動力，推Alexx V完全冇難度，成個劇團如浮現眼前，氣勢十足，每個弱音都聽得清楚，大能量而又不失細緻動態，出色嘅分析力及層次感加上Alexx V嘅表現，嗰種包圍感確實令人大叫過癮。

之後我哋試人聲放隻Olivia Ong嘅Sometimes When We Touch，我個人覺得女聲有啲生硬，欠缺韻味，有可能套機仲未煲好，煲好應該會有改善，再之後試見龍卸甲隻鳯嗚山之戰，依隻真係不得了，氣氛十足如臨大戰場面，鼓聲澎湃，收邊非常圓滑，低頻完全冇過量，音色乾淨、快速、又有穿透力。聽鼓聽得咁過癮，又整多隻鼓王群英會V，真係棒棒有力，定位準確，估唔到響Alexx V度可以聽到咁靚鼓聲，大鼓聲飽滿，小鼓聲乾淨利落，夠晒刺激！





總括來講，T先生依套機非常平衡，我敢寫包單，十個有九個聽完都會中招，剩低一個要去驗耳，正如某師兄話齋，以佢多年經驗，睇相已經知道靚聲，尤其套Dan D’Agostino Relentless 前後級，實力超班，本來我對Alexx V依對喇叭已經冇乜特別感覺，因為Alexx V我已經聽過好多配搭，我覺得其表現相差唔會太大，今次完全耳目一新，只要配搭得得宜，Alexx V絕對係一對好喇叭，Wilson喇叭同Dan D’Agostino真係絕配。



其實我喺T先生套Relentless 到之前一日有聽過momentum C2前级，効果都已經非常好，但仲未到令我有驚喜，估唔到換上大佬Relentless即刻拋離成條街，所以我一路都同所有人講，要換機一定首先換前級，一部靚前級絕對可左右成套機表現。今次依個葡萄園真係令人樂而忘返，酸到我口水流乾。

racewong

隻ARGENTO牆插...

zelo

racewong 發表於 2026-1-16 14:19
隻ARGENTO牆插...

T生先套機件件精品，真係HLSM~

racewong

zelo 發表於 2026-1-16 15:51
T生先套機件件精品，真係HLSM~

我都係第一次見有師兄用依個牆插

zelo

racewong 發表於 2026-1-17 12:55
我都係第一次見有師兄用依個牆插

都好多，kahw 師兄都用緊。

dandylinpsst

racewong 發表於 2026-1-16 14:19
隻ARGENTO牆插...

市場上唯一純銀牆插
貴到沒朋友

racewong

dandylinpsst 發表於 2026-1-20 16:11
市場上唯一純銀牆插
貴到沒朋友

ARGENTO一向無朋友