兜個大圈先升級到唱臂線>_<

kelvinhin

早前換咗 Technics SL-1200GR 唱盤後，發覺高頻突然多咗一份刺耳感。後來上網爬吓文，發現係原裝線電容量太高，影響MM 唱頭嘅頻率響應，然後就開始咗一連串嘅錯誤（笑）。

最初我諗住買條 BJC LC-1 算數，因為佢價錢平，三呎一對只係$49.5美金，電容值極低（每呎12pF），而且係Belden 線基，衰極有個譜。但後來有朋友話「唱臂線影響大，買條靚啲嘅比較著數」，所以就開始睇下兩千蚊左右嘅唱臂線有咩選擇。初時想買Van Den Hul (VDH)（但我都係喜愛「雲吞河」依個花名）嘅D-501 Hybrid，因為依條真係好正路，而且全新價錢都係喺射程範圍之內。但後來我見到有人話Furutech 嘅AG-12整體聲音質素比D-501 Hybrid 好得多，加上日圓匯率大跌令佢喺日本樂天網嘅價錢只係兩千蚊，比原本定價平得多，結果就令我犯下第一個錯誤。

AG-12最大問題係佢條地線嘅叉插位太細，雖然唱盤嗰邊可以正常插到落地線柱，但唱放果邊就唔得，只能夾硬固定喺地線柱中間窿位，令接觸面變得好細。結果一開聲就聽到嚴重嘅hum聲同高頻干擾聲。我嘗試過將地線插落唱放嘅螺絲位或者用返唱盤嘅原裝地線，但都完全冇改善。我嘗試過改變唱臂線嘅位置，盡量避免接近其他線，問題有短暫改善，但好快又出現返一樣嚴重嘅噪音，之後我就準備犯第二個錯誤。

當時我懷疑啲噪音係由電源地線流入去，因為我部後級有ground lift功能，未浮起地線前會聽到輕微高頻干擾聲，浮起地線後就聽唔到。所以我就二手買咗隻 iFi GND Defender 試吓，結果插落唱放完全冇分別，插落唱盤都係完全冇分別，所以就直接排除咗係電源地線問題。

去到依度都已經確定純粹係唱臂線問題，所以我就喺一個禮拜內將條AG-12同GND Defender 全部賣走晒佢，從頭嚟過。好彩手上有條之前喺淘寶買落百零蚊嘅短身RCA 線可以試吓，一試就證實我嘅推論無錯。換咗依條線後，噪音比原裝線輕微減少，高頻變得平順，但聲音細節量同原裝線差唔多，所以仍然有需要換條好啲嘅線。

幾經研究後，我就鎖定咗買二手雲吞河D-501 Silver Hybrid。佢二手價兩千蚊出頭，而且評價良好，好多人話佢聲音細節豐富兼抗噪能力優良，隱憂係因為佢係純銀線，所以聲音可能會略薄。去二手網搵咗陣，就決定入手。由於依條線無跟地線，我用咗唱盤嘅原裝地線。一駁上機，即刻放低咗第一個心頭大石，佢嘅背景超寧靜，完全無晒干擾聲同hum 聲，只有開到比正常音量更高時聽到微弱嘅沙沙聲。落針播碟時，放低埋餘下嘅心頭大石，佢嘅音色一啲都唔薄，飽滿得嚟又好結實，整體而言頗為爽快。聲音細節豐富，但又唔會有壓迫感，聽落好輕鬆，個人認為以二千蚊出頭嘅二手價嚟講係超值。雖然之前果兩件嘢一來一回蝕咗幾百，但都無奈當係交學費，起碼教識我有咩懷疑就即刻還原檢查吓有冇同樣問題，先好再畀錢買其他嘢嚟試。

Simcity

師兄，你好俾心機玩，要俾個like你 {:5_167:}