前幾日收到AURENDER香港代理龍駿SEND過黎既喇叭仔, 今日終於得閒開箱睇下依對喇叭仔有咩咁好玩? 要佢老闆專登拎過黎比我測試.
開箱見到兩個布袋袋住今次既主角S5W, 而今次既S5W係啞紅色鋁金金外殼, 拎上手好扎實. 以喇叭仔來說, 全鋁金屬音箱真係好少見, 可見AURENDER今次真係賣大包.
至於單元使用SCANSPEAK既1吋軟半球體高音, 4.5吋中低音單元.
喇叭入面更有每邊50W輸出的內置擴音機, 無錯, 即係話依對書枱喇叭係有源喇叭.
吓, 有源喇叭好鬼煩喎, 又要駁電又要搵條接線比訊號比佢. 只要大家睇埋喇叭背板既天線, 就知道依對喇叭係唔駛用接線比訊號佢, 因為佢係用WIFI連接, 而龍駿更一早拎左部AURENDER X100來到俱樂部, 我只要將隻USB手指插入X100後面既USB AUDIO, 一開機就已經將一對S5W連接到X100, 設定方面真係好簡單.
喇叭背面有兩粒制, 一粒係POWER, 另外兩粒係高音及低音的微調按鈕.
背面下方有個洞係比對S5W既電磁使用, 即係話依對S5W可以拎埋出街玩.
咁喺屋企聽呢? 原廠跟左兩隻火牛比你接駁S5W, 夠晒方便.
AURENDER X100本身只係一部STREAMER, 並無內置解碼. 所以解碼部份都係內置埋喺S5W喇叭內.
簡單D講, 依對喇叭有齊WIFI接駁, 有埋解碼, 再加上每邊50W輸出. 一對咁細對既喇叭就有齊上述功能.
當然你地可能會懷疑咁細對喇叭, 仲要D咁多元件 放晒入去喇叭箱內, 好唔好聲架?
咁你地可以放心, 我仲緊張過你, 我心諗如果聲音未如理想, 就REPORT都費事出, SEND番對喇叭比代理算數啦.
測試既地點喺我間工作室, 用左對MYSTJ 喇叭腳架墊起對S5W.
當我使用AURENDER APPS播放一首SUKI隻MOVING FORWARD裡面既[完全], 鋼琴聲既輕重力與SUKI人聲既厚潤感染力, 令我立即打開電腦, 一邊聽SUKI一邊寫依篇既REPORT.
AURENDER這品牌一向比我既感覺就是強於數碼串流播放, 佢既旗艦W20到依家都仲係企喺STREAMER最高階位置. 今次我真係估唔到佢做喇叭都有一手. S5W聲音圓潤扎實, 唔留意唔會發覺佢只係使用WIFI連接X100開聲.
聽完簡單既人聲, 就要試埋佢既爆發力, 我用太極隻ROCK THE BALLAD 第六首[點夠喉]去炸爆依對小喇叭. E... OK喎, 全鋁金屬音箱的特點表露無遺, 低頻夠實淨有力, 當然你唔好期望佢可以喺我間二百幾尺既工作室表現超卓, 但如以一般家居100尺左右既環境下, 依個X100 + S5W組合可以話係夠晒爆. 而令我最驚喜係我開到勁大聲, 佢都無失真. 單單就依一點, 並唔係對對喇叭仔可以做到呢.
總結今次龍駿音響SEND依套X100 + S5W組合比我測試, 我感覺到AURENDER這間音響公司不單單強於串流播放, 喺依對咁細對既S5W表現, 我可以睇到佢地喺調聲方面落左好多心機. 以AURENDER現今的串流技術, 加上佢對聲音表現的要求. 喺HIFI界必定可以吸引更多發燒友支持.
代理: 龍駿音響
價錢: $19800 (特價$13800)
靚仔又靚聲既有源喇叭仔-AURENDER S5W |