Inakustik nf-204 and ls-204xl 開箱+報告

一休大師

Workman 發表於 2020-8-6 08:08
想請問一休大師，Inakustik 的喇叭線線身是否普遍偏硬？（我曾摸過其中一款，非常堅硬。）

我有此一問主要 ...

係嘅！ 呢樣嘢冇錯， 就算你用502 線身都係好硬， 以前咁多代 我用過咁多條 每一條都係好硬， 除咗on/off 202 數碼線之外， 因為呢條數碼線佢本身係幼， 咁所以都好輕鬆嘅！
新呢代我覺得真係柔軟咗好多， 加上可以換插頭， 其實使用方便程度 大大提高， 當然！ 佢都有番咁上下粗， 彎曲半徑係有極限， 但係再加埋分線嗰個位， 其實都好多走盞， 有興趣可以上代理摸下， 睇下啱唔啱使， 反正又唔使錢嘅！

至於訊號線 睇相你哋都睇到啦， 使用上應該冇咩問題， 哎呀……！ 我又講漏咗， 我想讚一讚佢個平衡頭， 都插得幾穩固同埋紮實， 做得幾好嘅

另外你話驚鬆嘅問題， 我唔知你驚嗰個位置喺邊度， 究竟係熱縮膠包住 接線嗰個位？ 定係個叉會鬆？ 又或者係個蕉會鬆？ anyway 任何嘢都有極限， 如果太過份， 咁結果都一定係唔好， 咁呢一樣嘢一定要你自己親身 先可以衡量到！

Workman

一休大師 發表於 2020-8-6 08:39
係嘅！ 呢樣嘢冇錯， 就算你用502 線身都係好硬， 以前咁多代 我用過咁多條 每一條都係好硬， 除咗on/off ...

謝謝一休大師的回覆。

我說會被頂鬆的，是喇叭的喇叭線插口。假若離後牆夠遠，我相信線身如何硬也沒問題，因為可以有足夠的距離放平線身，讓它以一個近乎「直線」的狀態躺著。但我的喇叭距離後牆只有六吋左右，即是說喇叭線一定是抝成一個近乎九十度的狀態，若線身太硬，它便會有個趨向回復「直線」，可以肯定的是後牆不會被頂穿的，所有力量便都會集中在喇叭的插口，久而久之便會被頂鬆，甚至頂爛。

因此我買喇叭線，除之音質之外，也不得不考慮線身的軟硬程度。

一休大師

Workman 發表於 2020-8-6 09:27
謝謝一休大師的回覆。

我說會被頂鬆的，是喇叭的喇叭線插口。假若離後牆夠遠，我相信線身如何硬也沒問題 ...

原來係咁！ 我完全明白你嘅感受！ 之前我用2404 都係咁樣， 合併機後面位置少， 所以好難使用， 就算我用叉 收實咗， 都驚條線頂返轉頭， 整返鬆佢……

不過呢條真係軟咗好多， 我覺得你可以親身上去睇下！ 其實佢新嗰啲系列 都係軟咗好多， 就算2404 air 我親身玩過 都係好軟身， 好好行， 我覺得佢係有刻意改善咗

Workman

一休大師 發表於 2020-8-6 09:41
原來係咁！ 我完全明白你嘅感受！ 之前我用2404 都係咁樣， 合併機後面位置少， 所以好難使用， 就算我用 ...

收到，真係要去試試了。

一休大師

數一數， 自己已經玩咗十零年hifi， 前五年停咗， 今年再玩返， 想喺度分享下 自己玩線 嘅經歷！

其實喺以前， 我自己係好鍾意食味精， 我係特別鍾意 燒笛， 嗰種清麗 貴氣 順滑 真係好正！ 但係久而久之 你就會發覺 無論你播啲乜嘢碟， 都係有佢嘅味道喺度！ 就好似以前 因為工作嘅關係 經常性都去大排檔食飯， 一般都係 蝦仁炒蛋 豆豉鯪魚油麥菜 小炒王之類， 開頭食就唔覺， 但係食食下 你就會發覺 點解碟碟菜都係一樣味道， 甚至乎我叫個黑椒牛仔骨 佢都係嗰個味道， 其實因為佢地都係落左同一個味精， 耐咗就會有種好厭倦嘅感覺， 但係返屋企食飯 就唔會有呢種感覺， 點解呢？ 因為食材好， 唔使點落味精， 你可以食返食材原本嘅味道， 咁味覺自然多元化咗好多， 將呢個道理 搬番去音響度， 就係而家自己玩線嘅方向， 音色希望係盡量少， 盡量聽返 原本錄音嘅嘢， 一套器材 每一個位置 都在所難免 有頻段嘅改變， 我哋都只能夠盡量去還原 或者平衡返佢， 但係重手嘅頻段改變 或者音色， 我自己就會盡量避開， 咁可能有人會問？ 你點知道原本係點？ 其實唔使特別知道， 你只要搞番個頻段平衡， 成件事已經正確咗好多， 高音多 中頻薄 低音肥， 其實好多人都會識聽， 我哋細個 一定有玩過equalizer， 你只要推高個高音 同埋低音， 即係最多人調教嘅v型， 你自然會發覺中頻薄咗！ 聽陳潔麗好甜， 但係你聽LMF 唔夠力， 其實一樣好多人聽到， 所以我覺得唔一定要 知道原本係點， 先可以作出調教， 大概你係會知道 應該會係點！ 咁當然啦！ 如果你本身啲海鮮 係唔新鮮， 咁適當嘅調味 係可以將佢改善， 例如豉椒炒 就可以遮蓋到佢！ 咁所以嚟講， 都冇話乜嘢一定， 主要都係睇餸食飯！ 但係我認識嘅朋友當中， 佢就係無論碟乾炒牛河 炒得幾好食， 牛肉有幾新鮮， 佢都係要落半支 辣椒醬！ 咁我個人嚟講 我覺得係冇問題， 最緊要佢自己食得開心， 我同樣會尊重佢嘅口味， 有時仲會親身感受下， 唔會覺得佢係傻去形容佢， 搬返去音響度 其實都係一樣啦！ 每個人嘅口味唔同， 最緊要自己開心， 互相尊重， 咁就可以！

一休嘅分享隨筆

ttty

正如武林高手講，把所有招式忘記，便是天下無敵

一休大師

ttty 發表於 2020-8-6 11:06
正如武林高手講，把所有招式忘記，便是天下無敵

哈哈！ 我都係無聊發下噏風， 大家當睇報紙娛樂下笑下 ，甘就ok㗎喇

ttty

思維正確、我支持

awc1216

一休大師 發表於 2020-8-6 10:36
數一數， 自己已經玩咗十零年hifi， 前五年停咗， 今年再玩返， 想喺度分享下 自己玩線 嘅經歷！

其實喺以 ...

我一路就係追求緊依樣嘢，想搵返盡量無咩味嘅線材，例如電源線就夠力，中性平衡，用返銅嘅，唔使用咩銀/銠去調味，既平又真實。我嘅心態係，啲器材唔使做得多，做返本份就ok，咁就最自然合理。我會揀返一係就跟機/原廠出嘅，再唔係就搵返啲中性無味嘅副廠線，盡量用返原本嘅設置。樓主果然係高汁大師。

一休大師

awc1216 發表於 2020-8-6 12:01
我一路就係追求緊依樣嘢，想搵返盡量無咩味嘅線材，例如電源線就夠力，中性平衡，用返銅嘅，唔使用咩銀/ ...

對對對！ 我哋方向一致就會係咁諗， 但係凡事有兩面睇， 另外嗰面想法會係覺得， 如果我要原汁原味嘅聲音， 甘買啲錄音室嘢咪得囉， 使乜要投放咁多錢！ 我玩得hiend， 外觀當然係要靚， 聲音要係瑰麗堂皇， 質素要係最好嘅！ 呢個時候發燒線就會幫到手！ 咁佢哋嘅想法 亦都係冇錯個喎！ 只不過我哋方向唔同！ 所以我成日都話 要互相尊重 就係咁解！ 好似兩個唔同嘅厨師， 大家整嘅嘢食唔同， 但係都好尊重對方， 互相交流心得！

多啲包容， 互相了解多啲， 我覺得得到嘅會更加多

awc1216

一休大師 發表於 2020-8-6 12:51
對對對！ 我哋方向一致就會係咁諗， 但係凡事有兩面睇， 另外嗰面想法會係覺得， 如果我要原汁原味嘅聲音 ...

無錯，有人好捨得換線追線。我只係覺得沉迷追線材，個人又迷失，又煩惱，仲要嘥好多錢。我金仔用返條黑雞線，曾經有師兄不斷叫我換線，話條apl-1唔掂無力又剩，我都無理。

ttty

又有知音人

awc1216

大師，想問吓如果美式頭尾插嚟計，用marinco8215+320iec15定wattgate330i AU+350i AU好啲呢？因為兩者價錢都差幾多

一休大師

awc1216 發表於 2020-8-7 00:42
大師，想問吓如果美式頭尾插嚟計，用marinco8215+320iec15定wattgate330i AU+350i AU好啲呢？因為兩者價錢 ...

如果你想有音色 你可以買wattgate， 咁佢有金，銀 或者銠白金嘅！ 如果你想原味啲，買marinco 就ok啦！甘wattgate 都有出 銅插嘅！ 睇你自己喜歡

一休大師

awc1216 發表於 2020-8-6 13:44
無錯，有人好捨得換線追線。我只係覺得沉迷追線材，個人又迷失，又煩惱，仲要嘥好多錢。我金仔用返條黑雞 ...

係！ 自己喜歡就ok！ 套机係畀你自己聽！ 唔係畀人哋聽， 所以唔需要理！ 除非你好想得到人哋嘅認同， 或者你自己希望人哋畀啲意見你 ，咁你就可以照嗰個人嘅意願去做， 不過就每個人都唔同， 每個人嚟到講一句說話 你都要搞餐懵 或者換曬成套機 都幾慘……哈哈！ 呢啲case真係見唔少……
再偏激嗰啲， 知你唔係用佢喜歡嘅品牌， 直頭唔同你講嘢添， 都係幾搞笑㗎

awc1216

一休大師 發表於 2020-8-7 01:02
如果你想有音色 你可以買wattgate， 咁佢有金，銀 或者銠白金嘅！ 如果你想原味啲，買marinco 就ok啦！甘 ...

太有音色就不了，想原味啲。因我見wattgate啲藍星金插好似都唔錯。不過都係揀返marinco算，話晒佢oem wattgate嘅，應該都唔會差～

awc1216

一休大師 發表於 2020-8-7 01:06
係！ 自己喜歡就ok！ 套机係畀你自己聽！ 唔係畀人哋聽， 所以唔需要理！ 除非你好想得到人哋嘅認同， 咁 ...

無錯呀，跟住又要pm問人邊度買？幾錢呀？攪完又未必好，又嘥錢嘥心機。

一休大師

awc1216 發表於 2020-8-7 01:09
太有音色就不了，想原味啲。因我見wattgate啲藍星金插好似都唔錯。不過都係揀返marinco算，話晒佢oem wat ...

藍星嗰啲！ 音色就肯定重㗎啦！ 如果唔係啲人買咗返去， 冇咩改變嘅話 咁就冇人會再買， 呢個係好正常！ 好唔好就每個人要求唔同， 如果你未玩過， 都可以試下嘅！ 我以前就買齊曬返嚟， 逐隻試， 係幾好玩嘅！

一休大師

awc1216 發表於 2020-8-7 01:11
無錯呀，跟住又要pm問人邊度買？幾錢呀？攪完又未必好，又嘥錢嘥心機。

其實玩呢啲嘢 都係一個遊戲嚟嘅啫， 太過執著同埋認真 都唔係一件好事， 搞到好似自己生意咁…… 放鬆啲就得㗎喇！ 當去旅行咁樣就ok！ 最緊要開心！ 得閒呀換下嘢玩， 過下癮， 你去旅行 你都唔係淨係去日本啦？ 世界各地都會去下， 睇下唔同嘅地方 感受下唔同嘅嘢！ 玩hi-fi一樣嘅啫， 老婆就冇得換啫， 講到玩具， 梗係乜都玩下啦！

awc1216

一休大師 發表於 2020-8-7 01:17
藍星嗰啲！ 音色就肯定重㗎啦！ 如果唔係啲人買咗返去， 冇咩改變嘅話 咁就冇人會再買， 呢個係好正常！  ...

唔啦，擺明唔啱就無謂去試。哈