本帖最後由 banjo 於 2021-3-29 14:46 編輯
嚟個家族合照
前面
後面
煲機中
以下報告, 純粹係好個人主觀聽感, 可能同各位聽開會有所出入.
首先講吓, 點解會用Yamaha A-S3200先啦, 呢部機主要用喺工作房, 由電腦經USB, 去DAC出訊號俾擴音機. 買佢主要原因, 係佢嘅外形好吸引. 其實幾年前已經想買A-S3000, 但當時音響推銷員, 極力推薦金仔E-470, 而且金仔把聲確係好正, 亦係因為咁, 令我中咗金毒要升級到老頂. 但我對Y記嘅合拼機, 仲係念念不忘, 當今年有需要更換, 用咗多年嘅Marantz PM11S3, 即時諗起Y記.
Y記無論內在同外在, 都係好鍾意. 版面充滿80年代氣息, 又有2020年代嘅高音質科技. 扭制同啪制, 手感好強, 長型大塊玻璃嘅VU錶, 透出暖暖黃光, 十分漂亮. 內籠金光閃閃, 金色大環牛, 金色電容, 金銅色隔版, 手工十分精巧工整, 背後輸出輸入, 應有盡有. 不過個唱頭放大器, 就有點雞肋. 而機嘅兩則, 用上黑色焗漆龬琴木, 80年代日系擴音機嘅感覺, 即刻返哂嚟.
跟住落嚟要講吓把聲.
參考歌曲係由灣仔音响展SACD提取. 分別係: Mendelssohn Piano Concerto No1, 劉雅麗-檳城艷, 見龍缷甲-五虎封將.
A-S3200聲底特性係, 清新自然, 有好強嘅空氣感, 高分拆力, 中頻唔係太搶, 低音好結實, 當播放重低音勁歌時, 有打心口感覺, 人聲爽朗活潑.
同金仔E-470比較, 金仔較著重中頻調音, 所以人聲係佢強項, 如聽爵士樂係最合適, 當播交響樂時, 音效會推得較前. 但Y記會喺低音同高音度落功夫, 強項就係鋼琴聲同結他聲, 會感到每一吓鋼琴聲係好有質感, 播鋼琴聲係特別好聽, 當聽鋼琴協奏曲時, 個音場會撐得幾闊吓, 好似坐喺演奏廳嘅中心位咁樣. 我懷疑Y記係用鋼琴聲嚟調音. 金仔同Y記係兩種唔同性格, 各有長短處. 金仔低音無咁結實. Y記弦樂唔夠耐聽, 金仔音場係推得較前,埋身啲. Y記就挨後返啲, 音場闊啲.
報告完畢, 多謝收看.
|