本帖最後由 banjo 於 2021-4-11 00:46 編輯
版面冇乜大改變, 好方便偷運入境, 但如遇到細心嘅海關, 會發現左右兩個圓制嘅內圈, 鍍咗金色, 指示燈由上端移到下端.
以下報告, 係好個人主觀聽感, 各位Hiendy資深金仔玩家, 請高抬貴手, 唔啱聽唔好打咁大力.
呢個報告, 主要係C-3900同C-3850比較. 參考歌曲有交響曲’1812’, 劉雅麗-檳城艷, 見龍缷甲-五虎封將.
喺3年前, 購置人生第一套前後級金仔C-3850+P-7300, 駁好哂線開聲時, 當時心諗: 啲聲真係好正吓喎, 要再搵套可以超越佢, 應該唔係咁易, 實會有排聽, 唔使再諗換機喇.
點知到了今年, 得閒無事行咗上阿二度, 八吓有乜新嘢, 經過毒氣室, 聴到播緊小提琴, 好似係4重奏, 於是入去企咗陣, 發覺啲琴聲好幼細好生動, 琴聲同琴聲之間好有距離感, 望吓啲器材, 居然係金仔前後級, C-3900+A75, 雖然只係聽咗短短幾分鐘, 就知已經奶咗嘢中咗毒, 於是決定立即進行換機行動, 由C-3850升去C-3900.
聽咗3年嘅C-3850, 音質已經耳熟能詳, 所有嘢都係理所當然. 到換咗C-3900後第一次開聲, 播放聽開嘅樂曲, 即時感覺係大聲咗, 聽多咗好多弱音, 感覺整個演奏台大咗好多, 樂器之間嘅距離同定位, 比C-3850更加清晰, 拉得更開更闊.
之後煲咗兩個星期, 發覺啲音質更加進步突出, 而呢部前級厲害之處, 係音樂動態同密度有大幅度優化, 而且喺微動態方便, 係強化得最厲害, 令弱音明顯咗好多, 當播人聲時, 演唱者聲線細微變化, 都好容易聽到, 令到招牌華麗人聲, 更加突出, 更加活形活現, 就因為強化咗微動態關係, 襯托出樂器或人聲嘅線條, 更加立體, 加強咗樂器同樂器之間距離聽感. 就係因為動態強化咗, 平時C-3850聽開嘅音量, 都要喺C-3900調返低啲, 唔係對耳真係頂唔順. 播放時’五虎封將’, 音場比C-3850更加深, 更加大, 鼓聲好震撼好埋身. 播’1812’時, 配合P-7300, 一浪接一浪嘅氣勢撲面而嚟, 力量源源不絕一氣呵成, 盡顯C-3900強勁嘅操控力同身價.
由C-3800到C-3900, 已經去到第三代, 金仔可以不停咁超越自己, 實在佩服. 用10幾萬, 就可以擁有一部精湛金功, 華麗音質嘅前級, 實在物超所值. 講到咁好, 係唔係冇缺點呀? 當然唔係啦, 就係如果播啲錄音唔夠靚嘅軟件時, C-3900都會忠實地, 將瑕疵好突出咁俾埋你聽. 依家我又會諗吓, 過咗幾年後, 如果又出C-3950, 音質會提升到乜嘢景況?
報告完畢, 多謝收看.
|
IP卡
狗仔卡
發表於 2021-4-11 00:42:22
提升卡
置頂卡
沉默卡
喧囂卡
變色卡
顯身卡
發表於 2021-4-11 10:27:12
