101靈敏度的感受-Zu Audio Soul Supreme Speaker

racewong

你地成日話我只介紹貴野， 喂， 我都想介紹D平靚正既器材配件比大家， 不過又要平野， 又要過到我隻耳仔， 真係有D難度。。哈哈

前兩日收到膽王Mark哥電話， 話set左對新款Zu Soul Supreme Mk I, 用部Audionote 梅樹 300B推得好靚聲， 叫我快D上去聽下。



這個來自美國的品牌Zu Audio, 主力產品有線材與喇叭兩類， 其次也有些黑膠配件。

今次既主角Soul Supreme Mk i係一款兩路兩單元設計， 喇叭面顏色可以因應客人要求而特別訂制， 就好似圖中這對茄紫色， 這是Mark哥最愛的顏色唷。



兩個單元分別用上兩吋Horn高音單元，睇埋箱內入面 全個horn既直徑超大， 有八吋直徑， 重達二十磅， 加上十吋全音域紙盤布邊單元。 露敏度高達101db. 而氣孔喺喇叭底, 有四條氣孔, 好啱香港家居, 唔駛拉咁出對喇叭, 浸低頻都可以慢慢浸出黎.





由於依對SOUL SUPREME 有超高靈敏度, 所以喺選擇擴音機方面就唔駛咁頭痛, 大家唔駛再為功能電流而煩腦, 有左依對SOUL SUPREME, 只需要專心搵一部高質的單端膽機, 好似300B, 845, 211 等等既單端膽合併已經可以推到對SOUL SUPREME又好爆, 又有味道.

之前我都講左, 膽王MARK今次使用左AUDIONOTE既梅樹300B單端合併機 (使用[新西電300B]) 推SOUL SUPREME, 第一首就播隻百人大鼓比我感受下[新西]既威力, 以及SOUL SUPREME的動態.
講真我對於ZU SPEAKER既動態不嬲都唔會懷疑, 美國廠美國設計, 加上ZU AUDIO一班設計師本身都係BAND友底子. 佢地既要求一定係超強動態, 瞬變快, 爽快直接.
反而我好好奇ZU 喇叭處理管絃樂等等古典樂章, 或者男女聲獨唱等等的微動態, 感染力如何. 所以我就叫MARK哥搵幾張小品人聲, 加幾件樂器果D 曲目比我聽下.

丫, 唔記得講埋今次既訊源係用埋AUDIONOTE既CDP, 而線材當然係全套ZU CABLE啦.
我自問對於ZU CABLE既特性已經好熟, 所以今次我只係聽左幾首歌, 就知道今次既主角ZU SOUL SUPREME既能耐去到邊?

這對小矮瓜SOUL SUPREME最強播放JAZZ, ROCK, POP等等曲目, 節奏明快爽朗, 低頻彈跳力好正, 能量感可以輕易填滿膽王的二百幾尺試音室. 音場比較埋身, 很有現場感.
播放古典樂章時, 由於佢既能量感十足, 這對於氣氛凝聚力有著重大的幫助, 至於絃樂的表現, SOUL SUPREME能將AN 300B的特性發揮得很柔和幽美.  細節量豐富.

不過講到底, 如果聽SOUL SUPREME的話, 我都係鐘意用佢播番JAZZ或POP會較吸引.


總結:

以四萬幾蚊既價錢, 可以買到一對全美國制造, 音響元素不缺的全音域喇叭, 最重要係超高靈敏度, 這對於一般初燒或中燒玩家來說, 可以話係超級抵玩.
由於佢既101db靈敏度關系, 選擇合併或後級時, 記住以質量或優先, 就如我前文所講, 一部梅樹300B 單端, 每邊得八火輸出. 推動SOUL SUPREME都可以有超強動態.

石機方面, 可以考慮FIRST WATT這類CLASS A來配搭SOUL SUPREME, 我諗大家聽完都會心思思比錢搬番屋企慢慢享受.


代理: 膽王音響

來源: 101靈敏度的感受-Zu Audio Soul Supreme Speaker