本帖最後由 racewong 於 2013-4-25 14:49 編輯
前排收到代理朋友電話, 話ARGENTO有個新拖板, 連埋條20A OLYMPIC REFERENCE 2012電源線, 問我有無興趣試試.
仲SENT左幅相比我睇睇添!
見到幅相, 嘩, 個look好靚好cutie喎, 一個大圓餅, 仲有九個插位. 夠晒實用.
當日急不及侍已去代理拎返屋企慢慢試.
首先講講依個ARGENTO FLOW CENTER (ARGENTO FC), 生產於2012頭, 其內部接線主要使用ARGENTO頂級FMR電源線, 插坐使用ARGENTO獨有自家技術, 使連接位有更好既接觸.
供電位使用20A插頭, 其他九個電源插位都是美式.
為左測試完整既ARGENTO味道, 代理已跟埋條OLYMPIC REFERENCE 2012 20A比我一齊測試.
o係半年前, 我都玩過依條2012, 聽感係 -> 斯文/柔美, 但量感又好充足喎. 比2008果條olympic reference快聲少少!
今次依個ARGENTO FC加埋2012, 唔知有咩化學作用產生呢?
今次測試既器材都係用番AUDIO RESEARCH CD 8 + REF. 5se + PASSLABS XA 100.5推屏風3.7, 線材配搭就沿用
PC - SHUNYATA
IC - NORDOST VALKYRIA, CARDAS CLEAR,
SC - TRANSPARENT
我一向慣性, 測試電處拖板都會首先插CD 8 & 5 se, 後級就直插牆穌.
聽番我最熟識既人聽, 古典, 首先發覺依個ARGENTO FLOW CENTER拖板既中低頻量感好勁, 尤其聽古典爆棚, 氣勢像換了後級一樣. 但聽多一陣, 越聽越唔掂, 高至超高無左好多, 好暗, 音場很污濁. 連ARGENTO 2012獨有既柔美中頻都無左. 聽感真係好唔掂.
聽左兩首歌, 真係頂唔順, 將5se & XA 100.5直插牆身, 只剩低CD8插ARGENTO FC.
高至超高出現番, 全頻平衡度都正常番, 當然有得必有失, 低頻量感回復正常. 聽多兩首, 發覺雖然全頻正常, 但與未使用ARGENTO FC前的表現相差不大. 連最基本的ARGENTO味道都無嘜. 簡單D講, 用左等於無用過一樣.
諗諗o下無理由丫, 代理講個拖板連PC已煲左兩個月, 基本上咩都煲透啦.
不過見依家只插CD 8都可以聽得o下, 唯有插多一排先再諗諗其他測試方法.
過多一個星期後, 有日心血來潮, 將成套機(包括後級XA100.5)插晒落ARGENTO FC, 睇o下會唔會有驚喜. 其實我最擔心係力水方面問題, 因為我本來就無用拖板, 屋企裝修時, 已拉了三條獨立線比HIFI專用, CD + PRE-AMP用一個牆蘇, MONO BLOCK每部用一個牆蘇, 剛剛好用晒三條獨立線.
依家只係用一條20A既OLYMPIC REFERENCE插住ARGENTO FC比電, 會唔會唔夠力, D聲唔夠實淨呢?
開著套機等佢RUN-IN半個鐘後, 開始專心聽番之前既人聲, 古典.
頂, 依個ARGENTO FC咩構造呀! 當全部PC插晒入去之後, 改善之大, 真係嚇Q死人.
大家睇清楚, 係改善, 唔係改變.
聽古典既時侯, 改善最明顯既係全頻控制力提升, 在相同音壓下, 有d平時會吵會叫既CD, 用左ARGENTO FC後, 平順左, 音場穩定度提升, 聽感上好像將所有PC全部升級一樣.
至於人聲方面, 這PART一向都係我套機最弱既一環.
屏風既人聲夠線條, 夠聚焦, 就算口型大小, 我都可以利用喇叭擺位解決問題.
但說到人聲感染力, 我都依家都未感滿意, 就算我用到CARDAS CLEAR XLR做IC, 都只能增加小許感染力.
但當所有PC插晒落ARGENTO FC後, 無論人聲厚度, 濕潤感都能明顯能再次提升.
當然, 令人最擔心既係, 中頻感染力提升後, 會唔會減少左高低伸延及超高既空氣感?! 這方面大家可以放心, 在我的套組裡, 這問題並沒有發生.
最後到力水方面, 咁樣用一條PC比電ARGENTO FC, 都一D都無腳軟. 可能控制力好左, 聽感上部POWER AMP更有力. 全 頻控制更見出色!
後記 -
當我還返個ARGENTO FC比代理時, 代理問我玩成點?!
我一五一十咁講番晒出黎, 代理話佢地試過用三套唔同既機, 有膽有石, 結果都係一樣, 要成套機插晒落去, 先有料到. , 所以佢地對我依個結果並不感到奇怪...
依家還左個拖板後, 回家將所有PC插番去牆蘇, 再開機聽, 發覺若有所失. 硬係無左ARGENTO FC果種濕潤度, 穩定度! 唉. 又中毒!
睇黎我今次又要破財了.
ARGENTO FLOW CENTER - 街價$28,000
ARGENTO OLYMPIC REFERENCE 2012 - 街價$22000 |