咁多位大大好呀,小弟久未露面啦 ,因為近排發覺自己對音響有少少退燒既念頭(其實係無錢up雞買野先真), 所以都連出post都無心機…不過,最近發現左D正野,好想同大家分享。
今年既音展裡,眾多代理都展示出好多新產品,而且大部分既表現都唔錯,充满驚喜。而係眾多代理中, 『駿韻』有一套令人喜出望外組合, 使我聽到欲罷不能。呢套組合既表現唔詳細介紹啦, 反而我想講呢套機有一個牌子令我心如鹿撞 。所講既就係之前『信和』做代理的Kubala Sosna cable(簡稱KS)。得知『駿韻』独具慧眼做左新代理,當然要请教下東哥如何評價呢個牌子啦,但因為當日佢太忙,所以就約小弟搵日去中環基地度驗明真身啦。
當日試既線材分別有平衡線同電線,唔聽由至可,一聽把幾火,唔好誤會,我意思係馬上燒著我 。即時想問東哥借返去慢慢試,但東哥好似睇穿我咁,我都未開口,佢已經提出借比我返去試,簡直就正中下懷 !
試左2個星期後,終於對呢個牌子有所認識! 就係呢條實力大於名氣既KS cable emotion XLR cable。
首先介紹下我既平價系統比大家參考
喇叭 – B&W signature diamond
擴音機 – Luxman 590AX
訊源 – Luxman D06u
線材 – 喇叭線&平衡線 /Belden, 電線/跟機線(簡稱黑雞)
音樂軟件 – 1) NILS LOFGREN ACOUSTIC LIVE, 2) Mission Impossible 1, 3) 2V1G
KS品牌中有6個級別,分別有Elation,Emotion,Expression,Fascination,Anticipation同Imagination,今次我所試既係二哥Emotion xlr 1.5M。
外表上絕無買弄花巧,但線身就造得十分有質感,平衡頭方面亦用上品質絕有保證的Neutrik,而且亦有反咁上下斤兩。
我試野有個習慣,就係喜歡用平平無奇既器材或線材去作比較,我認為咁先可以凸顯測試項目既特性。因為今次测試線材,首先我會用以上介紹過既線材聽一次,然後換KS上去作比較;
聽左一段時間後,歸納出KS emotion在我套系統上的3個明顯特性:
1) 現場感真實
2) 動態十足
3) 無性格可言
1) NILS LOFGREN ACOUSTIC LIVE - track 5
聽過呢隻碟既朋友都知道現場感做得相當逼真,人聲同結他聲既比例恰到好處。首先用Belden測試既時候, 雖然我屋企都係蝸居一族,地方超細,但它都能營造出充足既空間感,你可以感受到歌手唱live時好肉緊同充滿感情;不過當我換上KS之後,所有感覺實在提昇不少,空間感改善最為顯著,佢可以將我豆潤咁大既地方,模擬到球型既空間感 (好抽象?你聽過就會有共鳴 ) 就連身邊都好似有觀眾係度拍手同叫囂鬼鏈(係我叫到鬼鏈咁聲 ),十分真實過癮。
2) Mission Impossible 1 - track 2 & 4
個人十分鍾意呢套戲,所以見有SOUND TRACK都忍唔住要買埋佢,不過原來呢隻碟好聽之餘,動態方面亦做得好出色,各位師兄不防買來聽聽。講返個表現先,本身B&W signature diamond 一隻7吋中低音好難同雙10吋或一隻12吋低音媲美,但我都感受到佢反應快速同低音既彈跳力係表演得相當有質素;但當換上條KS後,第一個感覺係對喇叭好似變左對雙8吋低音,無論低音下潛力同動態,都有顯著分別,但最驚喜既係連一些輕微既動態都好清楚表達到出來,而且仲令本來比較低調既英國喇叭加左幾分辡味,如果本身鍾意聽ROCK既朋友應該覺得好過癮(除非唔覺 )
3) 2V1G 第三次心動 – Track 1-10
呢隻碟本身無論曲,唱功或者錄音都做得非常之好,播起來看似非常簡單,1支結他2把女聲,但如果線材方面比較有個性的話,可能聽落會覺得無咩感情,又或者越聽越想訓咁,起初我都擔心呢條線聽聞係 - 零個性,會唔會聽落無咩感情,冷冰冰咁?點知一開聲約10秒就會心微笑,因為完全無我想像中既問題之餘,感情同出來既細節位都做得剛剛好,我估應該係完全反應出LUXMAN再加B&W既化學作用,原本呢3樣器材本身都有佢既性格,而且比較偏向有少少暖聲的一類,如果再用一D性格比較突出既線材,出來既效果我估會打左D折扣(除非唔會 ),所以不知不覺我又成隻碟都聽哂(覺得滿足 )。
KS本身理念都係希望將錄音同器材本身既特性可以不偏不倚咁一一交代出來,可以盡量做出最原音既音樂效果,而且可以幫到各位發燒友係自己套音響系統上打好基礎,然後再作出自己喜歡的調整,令到有個人既風格。
所以我認為Kubala Sosna cable絕對係器材之間既一個好好的橋樑(除非唔係,但反正我信了 )。
http://www.hiendy.com/hififorum/ ... &extra=page%3D1
|