燒閒家訪：五重奏之才子的家居試音室

dt825

才子，大家熟悉嘅名字，醉心古典音樂嘅佢經常出席演奏會，屋企有兩位公子拉大小提琴或鋼琴協奏，還會得閒嘆杯老威，咁嘅環境你話點會唔識享受音樂呢⋯⋯

才子經常有機會測試高質素器材(其實係攞黎衰，成日自毒到瘟瘟鈍鈍 )所以對器材配搭好有心得，加上經常四出家訪取經所以如何攪靚聲對佢黎講無乜難度⋯⋯

廢話少說快快入正題，既然才子閱機無數又成日家訪，係時候要踩踩佢場同大家分享下，雖然久不久都探訪才子不過大多係吹吹水，今次就約埋幾位燒友前輩一齊認真嘆下音樂，而且撞啱今次嘅器材都好毒下⋯⋯會唔會出事呢？

踏進屋內，一如既往好有家庭溫暖感覺(其實係無開空調有點焗)，加上一系列高檔器材，呢度就係才子的家居試音室⋯⋯



我認識嘅才子一向好專一，佢以前由一部馬仔CD機，和一部膽機推書架仔可以好開心咁玩咗十年八載，但近年佢開始換伴無數化身為風流才子，無他因為各代理紛紛送上名器請求佢品評，血氣方剛嘅才子又點抵得住誘惑呢！就睇下呢期嘅組合先：

LP: Dr. Feickert Firebird, IKEDA IT-407 CR1 + 9TT, SME312S + Nagaoka MP-500
Phono: Luxman EQ-500
CD Player: Electrocompaniet EMC 1UP
Integrated Amplifier: Kondo Overture (PM-2)
Power Cable: Kondo
Interconnection: Kondo Theme Ls-41
Speakers: Verity Audio Parsifal Anniversary
Speaker Cable: Kondo Spz double run



有興趣亦可以睇番才子不久前嘅精彩試音報告：

家居試音室：Kondo Overture 新演繹
http://www.hiendy.com/hififorum/ ... hread&tid=92704

家居試音室：Verity Audio Parsifal Anniversary
http://www.hiendy.com/hififorum/ ... hread&tid=93511

上週才子响大師家訪篇中提到今趟家訪連續篇會攪下新意思，除咗互訪之外大家都分享下感受，希望集合各方分享更能客觀地了解各燒友所玩嘅組合，當然亦要聽下主人家嘅音響歷程先啦：

才子的音響歷程
家訪經驗豐富嘅才子問人就多，咁就要佢剖白下自己身世先⋯⋯

點解叫做才子？
其實只是當初在快閃同好會中的花名，被稱為才子總是令我覺得有點不自然，因為我心目中的才子是很有才華，學術精湛的學者，而我自問只是一個普通人罷了。

幾時愛上音樂？
自從中學開始已經喜歡聽古典音樂了，不經不覺已經三十幾年，幾年前受朋友的影響開始聽馬勒，這同時又影響了我音響之路，要很好地重播馬勒的交響曲，談可容易？！

為何踏上音響之路？
我自問不算很發燒，一套音響往往會用上很多年而不會左搞右搞，不過，近年身邊多了不少「熱情的發燒友」，於是......

試機真係咁好玩？
說穿了，不是因為窮，無能力換器材嗎！反正自己有個不錯的聆聽空間，又可以寫下文章，那何不與眾同樂，分享不同組合的表現呢？雖然是從代理借來的器材，但底線永遠是憑良心去寫出自己的聽感，絕不會作假或誇大事實。

對音色的要求？
除了聽HiFi, 近年又再度活躍去聽現場音樂會，當然，那是兩碼子事，我不會奢求自己的音響能達現場的音效，不過，我亦希望在家中用音響重播時，可以發揮樂曲應有的感染力，不需要音效滿分，但也不可以太差，音色與音效，我會以音色為先，不一定要高音甜，中音準，低音勁，但整體上的平衡是重要的，不需要如顯微鏡般的分析力，但也不能像霧裡看花，最怕的是速度太慢，不過亦不需要趕著收工...... 總而言之，一切以自然為上。

點解玩黑膠？
我並不是追求靚聲，也許只是一種聽音樂的情懷，一種生活的藝術罷了。

喜愛嘅曲目呢？
最愛當然係馬勒的交響曲啦，尤其係第九，其餘Liszt呀, 托波叔嘅車佬呀，卡門呀等等
人聲方面，最喜歡蔡琴＂機遇＂，特別係＂白髮吟＂，重有和鮑比達嘅＂遇見＂，亦當然唔少得小鄧嘅＂淡淡幽情＂啦⋯⋯
其實要講喜愛嘅曲目又點只咁少呢？真係要開多個專題先得啦⋯⋯



大家點睇才子嘅自白？除咗＂自問不算很發燒，無能力換器材，並不是追求靚聲＂這幾句有點失實外，應該睇得出佢係對音樂好有熱誠和認知嘅才子吧，否則邊有心機去研究馬勒一系列名作，同埋坐定定幾粒鐘認真欣賞華格納著名歌劇呢(套指環一盒22隻碟睇見都⋯⋯)

燒閒友之分享

釘sir：
為免執輸比其他人講哂緊係自己主場講先啦....

想從總結開始，因為今次係最有驚喜和足以令自己嘅發燒細胞再度活躍起來....才子呢套組合唔可以話係"無敵"，但話佢"無得輸"應該無人會反對卦，如果係老作都唔會咁快多咗幾位Kondo Overture嘅準用家啦！

大家或者都對Kondo有認識，技術資料才爺嘅報告已經有詳細介紹，我只想分享一下Overture跟Parsifal響才子府上如何令人忐忑不安。

個人偏好於比較器材時特別注意其動態表現是否能令人聽得興奮，才爺當然有所準備，一曲Telarc版本嘅火鳥真的令人驚喜異常，瞬變速度之快連事後回家聽番同一曲段都即時比下去，非常殘酷！

聽膽機又怎能不聽佢唱人聲呢，這方面當然沒有失望，從Krall姐嘅Temptation到琴姐嘅三年，質感嘅真實已經殺死人，最難忘係抽象嘅感染力把人拉進了歌者的感情空間！你或者會叫依啲係重音色，但事實係在座幾位燒友都被毒到暈得一陣陣呢⋯⋯！

我好耐無遇到呢種一聽鍾情嘅感覺，事後要不停同自己講係幻覺黎啫⋯⋯


  
咪爺：
才爺府去過兩三次，第一次去才子係全套自己器材發聲，陣容並非天價名器，其中嘅喇叭大波妺及後級更是前所未聞，都只怪自己大鄉里。但玩音響嘅第一大要素卻是得天獨厚，一個350尺嘅長方形聆聽空間，羡煞旁人。

開始聽音響前亦已得知才子嘅音樂品味，隨著音樂響起，沒有令人驚艷嘅音響效果，有嘅卻是一個非常自然接近現場中後排的音效，左右濶度，前後深合理但不誇張，可以令人舒服咁坐低把整個樂章欣賞完畢才換另外一隻唱片，沒有急著播放特殊音效軟件去比試器材能力的需要，這與自己追求嘅音色及音場表達方向非常接近。而且主人家挑選的軟件音樂性非常好，並非只注重音效表現，可以欣賞樂手技巧或指揮如何演繹名師作品。音樂伴著威士忌，一個令人愉悅的下午非常快就過去了。

到今次再一次家訪才子除咗可以向才子學習欣賞古典音樂嘅知識外，Kondo嘅新款合併機Overture更是小弟心儀多時的器材。

以現代音響器材美學標準去看，Overture極其量只算一部其貌不揚的器材，細看之下，卻又有一份含蓄之美，再加上嚴謹的金工工藝，又令人多添一份好感。

以才子對古典嘅認識，挑選什麼軟件小第絕無異議。一曲既終，令我對Kondo更加佩服，一部輸出只有32瓦嘅合併機，竟然將Verity audio Parsifal 推動得貼貼服服，所有欣賞音樂的要素一點沒有缺失。音樂感、速度、透明感、動態、微動態等等應有盡有。欣賞音樂時，我就像坐在聽音樂會的現場一樣，沒有去問高頻會更高嗎？低頻會潛得更低嗎？就只有坐在那裏，好好去體會樂章中想表達的東西。

那麼是否已達頂峰？對不起，我不知道頂峰應該是怎樣的，而且小弟對更貴的器材也不敢有更多的要求。

有朋友問過小弟，Kondo產品是否作為起點適合新手用？我覺得先不論價錢，因為每個人能夠負擔的亦不同，而且銀碼多少亦與新老手無直接關係。小弟覺得Kondo係不太適合新手使用的，因為講速度會輸俾甲牌機，講動態會輸俾乙牌機，講低音又會輸俾丙牌，結果好快就會離佢而去，所以我會話Kondo會適合作為其中一個終點。



大師：
才子嘅家訪已去了不少次，今次就非常特別，因為主角係日本妹Kondo Overture合併機，喇叭就用上VA Parsifal Anniversary，訊源當然膠膠為主，點解特別？因為Kondo對才子就是好聲的定義，這部Kondo響才子家中我已前後去過兩次家訪，第一次比我嘅印象係非常高速的表達方法，人聲通透潤滑，是非常高級膽機應有水準，在才子聆聽空間約三百幾呎來用這膽合併推這中型VA座地喇叭是勉強可以的！

今次再家訪時才子陰陰笑話今次已換上同廠Kondo的信號線Ls-41和喇叭線Spz double run.   Wow………………今次真係唔講得笑，瀬嘢！！！氣勢同頻寬，高低伸延都高出之前幾班，第一張大碟先來jazz at the pawnshop當舖爵士，空間感異常立體，背景樂器敲擊不斷，氣氛置身其中非常好，真係賞心悅目，腦袋未來得切回氣之際，毒釘又換另一張大碟Diana Krall The girl in the other room嘅Temptation，Diana把聲一出，那把熟悉的沙喉，今次再加上糖衣包住的通透潤滑，彷彿其他hifi原素已變得不再重要，在那幾分鐘已成個人投入歌曲中了。我諗緊這是否自己時常口中提到的仙音嗎⋯⋯？

突然我背後有人大聲講，我條囡囡出場未呀！我等唔切啦，妖⋯⋯原來係同行一位德高望重前輩，大師7，才子即時手震震快手拎張小鄧1985年東京演唱會出黎，播放小鄧同歌迷傾計清唱嗰段，在場幾位同行家訪前輩當然識做唔出聲，靜待大師7慢慢享受佢囡囡嘅演繹啦。

之後大家坐響客廳另一角享用才子已準備好嘅午餐時，同時播放小鄧嘅淡淡幽情CD，都可以感受到Kondo合併機所出嘅那種潤滑通透帶糖衣表達方式，非常大的頻寬，填滿這唔細嘅空間，耐聽，聽完一首歌又想聽另一首歌，的確係一種享受。不需要坐在皇帝位來聽歌就係咁簡單，令我諗緊如果有咁正嘅系統是否係一個終點嗎？



至於才子自己又點睇呢？
Kondo搭VA整體感覺有種高貴優雅的音色，細緻動人，有豐富的音樂感染力，可以令人忘記什麼音效之類的東西。

才子嘅文采有幾利害憑簡單幾句已充分表達出佢對Kondo唧愛慕，亦另旁人對佢嘅痴情為所動容⋯⋯

不過收到風才子剛帶著傷感送別咗個日本妹，隨即就吹哂口哨迎接另一位瑞士貴族名媛入宮喎，咦⋯⋯才子咪好唔得閒？(大家耐心等報告啦)

去完才子家居試音室，下一站去邊呢⋯⋯？

待續⋯⋯

eds60

多謝分享。 晚一點我先慢慢欣賞全文。

racewong

好好睇! Thx Danny

dt825

racewong 發表於 2016-3-23 10:16
好好睇! Thx Danny

咁客氣

Kelvin11

靚機影嘅相就係零舍唔同

bigpun1975

一流家訪報告

c7c

Kelvin11 發表於 2016-3-23 10:39
靚機影嘅相就係零舍唔同

不能同意更多

safin

件件精品  好期待個EQ-500報告

Kelvin11

safin 發表於 2016-3-23 11:38
件件精品  好期待個EQ-500報告

馬上奉上

家居試音室：令人期待的唱放 - Luxman EQ-500
http://www.hiendy.com/hififorum/ ... hread&tid=92744
(出處: Hiendy.com 影音俱樂部)

yhyueng

冩到咁精彩,宜家都會味中..........
無聽火鳥喔.....

pl96

有釘Sir,咪爺和大師等前輩加埋才子,真係十分精彩無倫 ,睇到感覺好似血在燒

Kelvin11

yhyueng 發表於 2016-3-23 11:53
冩到咁精彩,宜家都會味中..........
無聽火鳥喔.....

無聽火鳥？

ccli1996

多謝精彩嘅分享
我都有幸可以到過才子府上去領教一下Kondo+VA嘅仙音毒

yhyueng

Kelvin11 發表於 2016-3-23 12:07
無聽火鳥？

真係無聽.....

safin

Kelvin11 發表於 2016-3-23 11:44
馬上奉上

家居試音室：令人期待的唱放 - Luxman EQ-500

精彩

pp101

pl96 發表於 2016-3-23 12:00
有釘Sir,咪爺和大師等前輩加埋才子,真係十分精彩無倫 ,睇到感覺好似血在燒 ...

厚彩睇到火燒咁 唔係睇到濕哂姐

eds60

yhyueng 發表於 2016-3-23 12:31
真係無聽.....

有機會去到都唔聽。 我都想聽仙音啊！

hohoiho

如第一集燒閒家訪, 報告好有感染力, 令我好似都置身其中。
多謝釘兄。

Kelvin11

yhyueng 發表於 2016-3-23 12:31
真係無聽.....

咁下次啦

pp101

eds60 發表於 2016-3-23 12:45
有機會去到都唔聽。 我都想聽仙音啊！

因為太多名盤聽 所以咪茅聽火鳥囉！同埋剛到經才子所出的仙音，每隻碟刀可以由頭聽到尾,跟本就唔想換碟