一帖睇完，自己動手換fuse{懶人包}加評測

bigpun1975

好多人玩Hifi 一講起DIY 就怕怕，如果要搞電嗰part 更加耍手擰頭，但係成日有個肥版主響網上放毒，又話換條fuse 又點勁點勁，不過好多會員未搞過可能真係無從入手，不如由我豬賓講下換fuse法門啦。


最簡單換fuse 應該係Amp 和電處一類; 一般都會有個fuse box 響機背，只要用手或螺絲批就可以將fuse box 甩出嚟換fuse。



一支螺絲批搞掂


要注意事項係記得fuse 數值，長度，快燒定係慢燒？多數大功率Amp 或後級都係用慢燒fuse, 如果大家唔熟最好拆條fuse 去鋪頭配，咁就一定無失拖喇。


呢個寫明慢燒




條fuse 買到番嚟應該點裝呢？係咪好似訊號線咁有方向？答案係有方向嘅，咁係咪好似好多人講咁，係跟fuse 上牌子名方向由字頭去字尾就一定啱呢？咁就唔一定，因為fuse組裝時嗰啲女工都唔會考究線嘅方向，所以大家都係信自己對耳比較穩陣喇；咁點知個方向正唔正確呢？啱方向多數音場較闊，堂音豐富啲，啲聲開揚啲；唔啱方向就剛剛相反喇，音場窄、聲音前傾，高音暗，唔開揚，咁錯嘅機會就十分大喇！



好喇，搞完Amp ，到訊源喇，被認為係換fuse 最大效果一部份，不過以CD盤為例，全部fuse 都係響機內，拆開我部CDP 比大家睇下先.....


睇完喇，可能大家都R 曬頭，粒fuse 呢？睇真啲，咪左下角呢個位囉⋯⋯ 吓! 響咁鬼入，點搞呀！



好多巴打見到咁鬼樣一定已經關蓋上番螺絲，其實又唔難搞嘅；首先要抽起底板上面個電源頭，咁個fuse box 就可以清清楚楚露番出嚟喇；喂，仲有個膠殻喎 ..... 只要用支整眼鏡嗰啲小批一「了」就得，換完fuse 還完番，有靜電風扇最好吹一吹裏面，咁會更加靚聲㗎，不過都係，記住!記住!記住!   ，試方向！唔好懶！



換英式13A fuse 相對簡單，看圖識字啦！





到試聲環節，由2000 到10000，前前後後，不同方向，真係人都癲；
Power House Alpha 一共有三個 grade, 係以填充管內嘅礦物粉粗幼度去區分，2000 最粗，10000 最幼，而粉粒亦最多。

以一曲走天涯，用點指泰迪羅賓 - 幾段情歌去試，


實際上，10000 分析力高，細節最多，也比較幼細，用於訊源命中率極高，反而2000 就能量大，連帶嘴型也大，線條比較粗，落訊源不太討好。
掉番轉，用於Amp , 尤其mono block 一類，2000 嗰種能量同埋氣勢係十分適合嘅，落10000 去Amp 唔係唔得，不過感覺係幼細過頭，低頻量感縮咗一個碼；
我自己用嘅 Leben 合併機就喜歡用8000， 有氣勢之餘幼細度都ok, 堂音係三條中最豐富，由於我部機比較細火數，用8000 力量都夠，當然Mono 或電處就最好用2000 喇，三款各司其職，睇下你用響邊個位喇。

代理: AUDIOLINK
電話: 2807 1855
銷售點: AUDIOLINK, LABKABLE
定價: $1200 一粒

hammer

星期六去買條試一試

1o1o

這個好野來的

ltkeric

多謝 Bigpun 師兄提供實用技能

racewong

ltkeric 發表於 2017-5-3 23:23
多謝 Bigpun 師兄提供實用技能

你買左未先?

Davidsky

豬賓版主你好有心機啊

CKKeung

豬賓版主你好有心機x2   

bigpun1975

Davidsky 發表於 2017-5-4 02:58
豬賓版主你好有心機啊

都幾好玩嘅，最重要有效果

bigpun1975

CKKeung 發表於 2017-5-4 07:17
豬賓版主你好有心機x2

Keung 兄呢排有乜搞作？

mchan6

豬賓版主你好有心機 THX

mchan6

我部機用兩粒咪要試多幾次先知方向

ltkeric

racewong 發表於 2017-5-4 00:01
你買左未先?

剛從日本買補品大出血完，遲兩個月至買

Hungmo

bigpun兄, 建議如果可以寫埋ip4兩端聽感, 俾各位參考吓好D
好似我第一次換屎都要試好多次先決心用邊面

bigpun1975

Hungmo 發表於 2017-5-4 10:59
bigpoon兄, 建議如果可以寫埋ip4兩端聽感, 俾各位參考吓好D
好似我第一次換屎都要試好多次先決心 ...

上面有寫喎

咁點知個方向正唔正確呢？啱方向多數音場較闊，堂音豐富啲，啲聲開揚啲；唔啱方向就剛剛相反喇，音場窄、聲音前傾，高音暗，唔開揚，咁錯嘅機會就十分大喇！

不如我補充少少，呢條fuse 高音幾靚，密度唔錯，低頻唔大舊，層次幾好

bigpun1975

mchan6 發表於 2017-5-4 09:44
豬賓版主你好有心機 THX

多謝

bigpun1975

mchan6 發表於 2017-5-4 09:48
我部機用兩粒咪要試多幾次先知方向

比我會試三次，正正，反反，正反

Hungmo

bigpun1975 發表於 2017-5-4 11:32
上面有寫喎

咁點知個方向正唔正確呢？啱方向多數音場較闊，堂音豐富啲，啲聲開揚啲；唔啱方向 ...

我應該眼大睇過龍

sp4384

請問部機用快燒，有人話用慢燒好聲，咁可唔可以用慢燒？請高人指教

Kennyc

sp4384 發表於 2019-11-3 07:55
請問部機用快燒，有人話用慢燒好聲，咁可唔可以用慢燒？請高人指教

點好聲都假，條fuse 慢慢燒，入面零件有機會燒埋，後果自負

sp4384

Kennyc 發表於 2019-11-3 11:44
點好聲都假，條fuse 慢慢燒，入面零件有機會燒埋，後果自負

明白晒，多謝高人指點