AV急症室之出診報告 - 一個虛不受補的Vicken家庭影院

pepsiman

提起「補品」呢兩個字，有人可能會想起「蔘茸」、「海味」，亦有人會想起「三遮鮑魚」、「Racing風隔」，作為AV友，就梗係即時想起「線材」、「墊材」等等啦！「補品」從字眼上應該係正面既名詞，不過當用不得其所時，就極可能會弄巧反拙，得不償失。百事佬同大家以及今次主角都係一樣由入門級器材開始玩起，之後比人落毒開始升級。子彈充足時當然係upgrade器材啦，但莫財呢？就會向「補品」方面入手。起初學人將喇叭線加蕉插已經莫大滿足，之後加套釘同墊，就算唔使開機望見都已覺得好聲咗，去到捨得用幾舊水買條電源線換走條原裝黑雞線，線身大大碌，唔打得都睇得，又話好聲咗！相信呢D都係廣大影音玩家嘅進化論，自我感覺良好勝於一切。


久而久之，所謂嘅「補品」就會愈加愈多，唔夠底音換條線、高音唔夠清通又加釘加墊、太肥加件黑麻石、聲音唔夠「行」再換乜乜插頭谷行佢，總之網上見到有咩好野就心痕！買、買、買，買下一大堆「補品」就似係追逐戰一樣，無高加高、無低加低。結果墊板上有釘墊、釘墊上有釘腳、轉盤內CD墊、上再有減震Pad、機背又銀線、佬白金插頭、仲要加埋地盒....。但係大家有無諗過，其實太多「補品」亦係一種負累，根本已經忘記咗器材本身嘅基本表現，最後浪費金錢之餘亦得不到理想聲音！

今次影音急證室嘅主角vicken，雖未去到以上所講咁嚴重，但已開始步入過度進補嘅危機。今次百事佬家訪，就係希望可以解救vicken虛不受補嘅家庭影院。喺列出vicken嘅家庭影院系統之前，大家先要有心理準備，因為器材及補品之多，可能會令大家大吃一驚！







前級Yamaha CX-A5100 (電源線紫龍皇8800、頭用古河 f.i13 63g、尾插fi,11n g、fuse alpha10000 13a)



Ediscreation 七聲道後级 (13a srback 古河s55 頭插、fi 1363r、尾插古河fi15c nfc，過機線DIY古河入門 鍍金平行插、純銅5mm加纯銀 5mm)


Proceed amp5 (mps 天籟電源線、頭插古河fi11r、尾插古河fi11r、fuse srback13a)

Proceed hpa3 (古河ts31電源線、古河fi1363 r + fi11r、fuse st back13a)

平衡訊號線 - 古河鍍金入門平行插 + 老翻 Odin 鍍銀線+ monster 純銅

KEF Reference 203/1 (喇叭線：純銀行超高音、鍍銀行中高音、假西電行低音)



srback 地盒

中置KEF R600c中置 (喇叭線：鍍銀行中高音、假西電行低音)





OPPO UDP-203  (全古河鍍金入門頭尾插摩改電源線、鍍銀牛、mufdorn1.5mm+1mm接線、alpha10000fuse2a、 fi106 nfc iec座)



後置KEF Q800DS

天花KEF CI200QR ×4 音箱為30升容量

超低音1 MK MX5000



超低音2 M&K MX150

JVC X5500投影機

彩虹魚光纖HDMI (供電fi103 4n 銀fuse、濾波、銀接線國產、保險絲座4k fuse、bhc濾波電

DIY LPS(鍍銀牛 5V 3A  BHC電容兩隻並聯 neotech 7n銀接usb座、usb mundorf1mm前jet、Fi103插座+Sr back fuse)

OS幕

vicken師兄機齡唔算長，只有兩年之多，現時所用的Y記旗艦前級亦係佢第二部影音處理器。但何解機齡輕輕就已經毒入膏肓、不斷進補呢？原來佢身邊有一位為佢長期落毒嘅舅父影音顧問，怪不得器材是如此廣泛、古今匯聚的呢！百事佬耐心地了解vicken的影音系統，何解用「耐心」兩字嚟形容呢？因為器材背後嘅線材有如港鐵路線圖般複雜，縱橫交錯，一時間百事佬都搞唔清邊條駁邊條。經vicken導引之下，總算稍稍明白。好！聽聽器材表現先！

先來Dolby Atmos試機碟，幾套片段過後，咦？點解聲音咁古怪嘅？前面三隻喇叭聲音暗啞，人聲唔出，左前置仲特別細聲添。因為vicken求診時已話我知佢係第一次玩Y記，好多功能都唔識點用，所以只係用Auto set up調過一次就無再作微調了。於是我打開部AMP個Menu睇睇，自動設定出嚟結果與一般無異，不過當打開個EQ設定一睇，發覺左前置個EQ曲線非常古怪，中、高頻全部大幅度下調 (唔記得影相添)，形成左前置特別細聲情況，但其他聲道就無呢個問題。既然都要重新調校，一於唔理咁多，開工！





搞好咗基本設定同EQ之後，再搵隻Dolby Atmos試機碟同狂八試試佢！唔！終於似番D樣，不過人聲仲係暗同埋上唔到幕，於是再喺EQ落重藥，去Option將Treble、Bass、超底音調整、「對白提升」加至 "4"、最後將Extra Bass、Enhancer及Hi-Res Mode設為「On」。「返來囉！」聲音收晒貨，偷看vicken時都見佢眉開眼笑起嚟！不過有一點要特別提醒vicken，就係一定要記住將「YPAO Volume」同「Adaptive DRC」兩個功能關咗佢，因為開著會將動態減低，真正「無聲無氣」呢！



聲音搞掂咗，投影機畫面係百事佬第二個要調校項目，因為發覺畫面非常之光，光位過光、黑位都變灰了。經了解後原來vicken喜歡睇戲時會開著地燈，所以刻意將畫面校光，怪不得喺全黑嘅環境之下畫面會如此光亮。我於是叫vicken將屋內所有燈熄晒，落埋窗簾，再拿起OPPO藍光機搖控利用另一記憶調校一番。之後用狂八及攻殼機動隊A/B比vicken比較一下，「嘩！真係差好遠喎！電影感返番晒嚟」vicken不禁地說。

電動卷簾，夠晒Pro

調校前

調校後

臨走之前，發現屋中一角有一個波鞋塔，無誇張！真係好似個塔咁高，由地下一直伸延至天花板，全部都係「空氣佐敦」波鞋，仲有唔少係特別版添。百事佬望到眼定定時，vicken行埋嚟得意洋洋咁對我講：「呢幢波鞋我儲咗好耐時間，全部都係佢心肝寶貝，心血結晶，價值足以媲美整套影音組合啊！」喺離開vicken師兄屋企嘅最後一刻，百事佬再三叮囑vicken要重新整理過現時系統，化繁為簡從新出發，肯定會有意想不到嘅結果。






後記：

家訪過後，vicken師兄WsA我話已經搵到中置暗聲原因，罪魁禍首原來係一開二平衡訊號線焊接不佳所致，而家已經正常番。聽到vicken傳嚟好消息當然戥佢高興，不過vicken嘅補品數目實在太多，一定要用多D時間同心機先可以清楚各樣補品對系統嘅利弊，然後妥善咁分配比所有器材，提升器材表現。看似好繁複，不過呢D就係影音發燒友嘅樂趣，局外人完全唔會理解得到呢！百事佬有一次從整影音補品嘅經驗，就係將所有器材「補品」全部拔除，用回原裝線材先試聽有咩不足，然後再續一配上合適線材、墊材或補品，最後發覺有唔少「補品」都被抽起，亦有唔少線材於器材與器材之間調換了。因為發燒愈耐，器材就會愈換愈多，如果只套上原有補品，久而久之器材嘅本性就會不知不覺被扭曲，所以「補品」用得其所真係好重要架！

sega1119

百事大佬近排百事饮多左，又肥左喽！

pepsiman

sega1119 發表於 2018-1-10 17:14
百事大佬近排百事饮多左，又肥左喽！

要跟你操吓先得了

wildmanhk

我都有病呀大夫幾時打救下我呀

wildmanhk

仲未出你嘅XTZ秘密武器

edison133

有百事佬幫手set—定好聲la!

terry-chui

百事 兄真係肥左x2

pepsiman

wildmanhk 發表於 2018-1-10 19:14
我都有病呀大夫幾時打救下我呀

你套AV都未搞掂...

pepsiman

wildmanhk 發表於 2018-1-10 19:15
仲未出你嘅XTZ秘密武器

秘密武器會喺2018家訪中出鞘...

pepsiman

edison133 發表於 2018-1-10 19:19
有百事佬幫手set—定好聲la!

見笑, 我都係新仔一名...

pepsiman

terry-chui 發表於 2018-1-11 09:43
百事 兄真係肥左x2

我都唔想...

ballgor

pepsiman 發表於 2018-1-11 10:27
秘密武器會喺2018家訪中出鞘...

XTZ秘密武器，唔通係嗰個鋁盒.....？

wildmanhk

ballgor 發表於 2018-1-11 10:45
XTZ秘密武器，唔通係嗰個鋁盒.....？

波哥真利害

ballgor

wildmanhk 發表於 2018-1-11 10:47
波哥真利害

百事佬侤出埋有秘密武器應診就pro!

wildmanhk

ballgor 發表於 2018-1-11 14:50
百事佬侤出埋有秘密武器應診就pro!

呢個秘密武器，又稱喼神。真係睇得又打得。set up 十仔恩物。 以後百事大夫出診著埋白袍就型到爆錶

pepsiman

ballgor 發表於 2018-1-11 10:45
XTZ秘密武器，唔通係嗰個鋁盒.....？

咁都俾你估到,唔通你跟蹤我...

pepsiman

wildmanhk 發表於 2018-1-11 14:55
呢個秘密武器，又稱喼神。真係睇得又打得。set up 十仔恩物。  以後百事大夫出診著埋 ...

廳日會再深入了解一下喼神,第時出診就可以更得心應手...

wildmanhk

pepsiman 發表於 2018-1-12 15:37
廳日會再深入了解一下喼神,第時出診就可以更得心應手...

應診預約巳排至2047

hammer

看百事大夫的應診報告真是獲益良多

mojiji1

個post吟耐先出，同可以講得晒佢點駁，同用咩缐材，真西飛利