未來戰士 Terminator Dark Fate

wooban · 發表於 2020-1-28 15:15:53

呢個年假終於有時間睇埋另外一個大隻佬嘅經典系列 - Terminator Dark Fate ，今集已經去到第6集，論故事，除覺得一，二集有關連外，其他的都大同小異。而去到呢集，終於見番未來戰士嘅神髓，所講嘅係節奏，選角同鏡頭運用幾方面，有番T2嘅味道。劇情方面，由正反兩角出場，保護目標及首次交鋒，大車追小車，到最後打到剎手機械人落抗，都刻意以T2為藍本。有新人物，當然亦都有交代。到選角方面，今集搵到 Mackenzie Davis 繼承保鑣一角，講姿色雖然麻麻，但勝在手長腳長，頭段在工廠用鐵鎚打鬥同尾段耍鐵鏈都有唔錯效果。

講番隻碟，畫面都係一貫地 sharp, 有足夠大頭特寫，容易睇到面部輪廓細緻，尤其兩位神枱級元老嘅風霜痕跡亦一一睇到，黑位亦都不少。聲音方面，絕對唔駛擔心，由頭爆到尾，試音位連場，槍聲爆炸聲都好有質感，尤其中尾段由直升機衝入去廢置場，直到兩架大型運輸飛機縛鬥一幕，係一段長時間嘅炸機音效，一睇真係停唔到。另外有幾個驚喜位置，如Sarah Connor 出場落車果下低頻，練槍時打中西瓜爆炸聲，拘留室響警鐘果下，揮動鐵鏈時直情聽到在前方同右方轉動聲場面，音效好出而唔胯張，一聽有印象。呢隻碟聲畫俱佳，無買錯，必入！