AV急症室之出診報告 - 換機狂想症 Issachar 師兄

pepsiman

今次出診原先計劃係準備將YAMAHA RX-A3080最強一面 <擴展音場> 喺本文患者之家庭影院中一展所長，好可惜到我見到Issachar師兄時，佢劈頭第一句就係：「我已經換咗部天龍AVC-8500H喇！咁啱部3080有師兄接咪賣咗佢囉」大家唔好以為百事佬就因為呢個單一事件就斷定Issachar係患上換機狂想症喎，我有無斷錯症？睇落去你地就知嘞！

先了解一下本症病人之影音器材：

AV Amp：Denon AVC-8500H
Source ：HTPC (魔獸 8K 銅線 HDMI, Telso Macro Q USB filter, stock power cord)
Topping DX7s USB DAC (Gourd USB 線, Early Bird RCA rd RCA 線, stock power cord)
前置：Wharfedale D330 (NuForce SC-700B 3 米) 中置：Wharfedale D300C (VDH 銅線)
後置：DALI C-2 (Belden 9497)
超低音：XTZ SUB 2x12 (stock power cord)
天花喇叭：XTZ Spirit 2 Front Presence (鴨記雞線)
電源處理：Sound Fantastic UK plug powerbar

Issachar居住於深水埗區地方不大，不過客飯廳呈長方型，大約為7呎x 14呎左右，呢個比例玩家庭影院也相當不錯。不過當我行近電視機時，發現Issachar只用咗半個廳之面積構造影院，而浪費咗後半部嘅空間，大家一定以為係要騰出飯廳空間而要作出犧牲，錯！原來Issachar因為除咗係家庭影院迷之外，亦係一個電腦迷同遊戲機迷，會利用一部55寸SONY A8F同時間又打機又睇戲、又睇戲又上網、又上網又打機，無聽錯！係同時間，即係要同時做三件事而又要睇得到銀幕上D字，所以Issachar喺電視前放咗張電腦枱，放置Keyboard同中置，梳化皇帝位就只可以坐近電視而放棄用全個廳嚟玩。Issachar更笑言：「因為經常要一心三用，Ready Player One前前後後我睇咗廿幾次先可以話全套戲睇晒，哈哈！」家訪接近二百次嘅百事佬此刻也無言起來。

同時間又打機又睇戲、又睇戲又上網、又上網又打機，所以犧牲咗聆聽空間

我諗Issachar睇咗廿幾次Ready Player One，應該對佢嘅聲效一定好熟悉，就由呢套戲打探一下呢個患者嘅病情先。「其實之前部3080我都好滿意，不過見天龍有imax玩，咪換鬼咗佢囉」Issachar說到。試過街道賽車一段後，俾我感覺係人聲局促同動態收斂，完全唔係天龍機嘅風格。「有無自己執過個set-up？」我問，Issachar答：「Auto Cal.後改咗Config.，而音壓同分頻就改過少少嘢」初步估計病情唔算太嚴重，應該有得救！好，一切由Dolby Atmos碟開始。

聽過一段Dolby Atmos Demo Disc內之Horizon後，發現要執嘅地方都唔少，中置人聲較矇唔開揚，動態不足，環繞聲聲音太近，超低頻有某頻段有異樣，事不宜遲，立即打開個menu望望先。

Auto Cal.數據
Issachar自行設定數據

Auto Cal.數據
Issachar自行設定數據

Auto Cal.數據
Issachar自行設定數據

距離維持不變

圖中顯示，由Audyssey Auto Cal之後，除咗環繞聲外，其餘所有Speaker Config.都設定為「Large」，自不然分頻點亦係「Full Band」，環繞聲為80Hz        ，再望望個Levels，十居其九係大幅度負數，動態不足相信已搵到病原。Issachar曾自行將Config改為small，將中置分頻點改為60Hz，其餘所有聲道改為80Hz，再將中置Graphic EQ 中2KHz以上四個頻段增加以增強高頻，最後將超低音音壓加大4db以加強超低音效果。而Issachar聞說Audyssey的聲效麻麻，所以將其”OFF”，但相反；曾於俱樂部在一次威廉Sir舉辦嘅影音研究所中，演示過Audyssey開/關對比，開著後音色係正面嘅，於是我先將Audyssey轉為”Reference”再試聽一次，中置聲音已有顯著改善，而環繞聲整體亦突出起嚟，繼而我再於Dialog Enhancer中選取 ”Medium”，我同Issachar都覺得呢個聲音最自然。
將Audyssey轉為”Reference”

於Dialog Enhancer中選取 ”Medium”聲音最自然


百事佬向來都唔用測音錶去調整各聲道到同一水平，因為相信人耳始終左右耳有強弱，每次都會第一身用人耳去調校。不過若然深信呢個道理，就無理由唔由機主出發呢！所以最近我校機都會叫用家坐皇帝位專心各聲道音量，我會用test tone來回各聲道等用家導航「+」或「-」，將各音量調至相近我先開始調校。開始前我先將各聲道全部調到「0」，盡量以正數平衡各聲道。一般情況下超低音我都唔會喺test tone度調校音量，只會保持「0」，只會將超低音喇叭Volume調到一半音量，到進入電影實試時先作最後調校。


反覆試聽過之後，以Issachar第一身調出以上音壓取得各聲道平衡。

有咗上圖嘅數據，我就可以用Demo Disc統一調校前、後及天花喇叭左右音壓，最後得出以上數字

大致上已有改善，動態回復不少，聲音亦自然好多，不過仍略嫌電影氣氛不夠，於是將各聲道分頻點提高（見圖），XTZ SUB 2X12有一定能耐，有足夠能力承擔更多工作。

Auto Cal.數據
由於主聲道交由超低音處理嘅頻段為100Hz，所以將原先120Hz轉到去110Hz，唔校準100Hz原因係希望有10Hz重疊減少運算中出現差異

很奇怪，當百事佬將超低音音壓再提高，而去到一D深沉嘅低音時，總係會震到電腦枱上物品發出”Dee Dee”聲，唔可以再校大音壓。我細問Issachar之下，原來佢將XTZ SUB 2X12嘅Parametric EQ開著，再將50Hz一段加大咗，怪不得會有咁嘅不平衡情況。當Issachar Off咗SUB 2X12嘅EQ之後，超低頻回復正常，細聽幾次之後，將超低音音壓加多2.5db仍然無共震情況，而且墊底氣氛及punch同時擁有，Issachar都話平衡咗好多。原來Issachar咁調校係因為有時會深夜時分睇戲，唔想影響到人又想聽到有超低音，所以加大咗50Hz呢段。其實想細細聲睇戲又有好嘅效果，只需開著Dynamic EQ及Dynamic Volume功能，選擇Heavy、Medium、Light就可以夜間睇好戲呢！

再試多次Ready Player One，Issachar都話平衡咗好多

大部分設定上嘅功能都調整好，唯獨後置聲音太近百事佬有點不滿，於是我將後置喇叭盡量推後與皇帝位增加距離，雖然只係短短一呎，出嚟效果係明顯且正面。我即時建議Issachar如果可以的話，最好將後置喇叭搬到皇帝位更後嘅位置，Issachar聽後雀躍地話：「無問題，我仲打算加多對後天空聲道喇叭玩5.1.4添！」


後記：診症尾聲，Issachar話題裡面經常提到「唔知馬仔幾時出新機呢？到時我諗我又會換嚟玩吓！」、「後置同後天花喇叭我都想用埋XTZ Spirit 2」唉！男人花心就梗架啦，但都無理由新機剛剛入架，就已經諗緊新歡架，真係無藥可救！

bigpun1975

後置很快要換了

wildmanhk

大師......出診.......荷包.......必有所失

pepsiman

wildmanhk 發表於 2020-2-4 16:20
大師......出診.......荷包.......必有所失

咁又......未必.....嘅....

wildmanhk

換埋XTZ....

sega1119

哎~~~睇来病得唔轻

issachar

bigpun1975 發表於 2020-2-4 15:08
後置很快要換了

係呀... 後置我一直物色緊...

KelvinLiu@FB

佰事佬幾時得閒幫我調吓

banjo

向典型環境鬥士致敬.

Jazzgd1

調轉fh同後置會唔會好聲D呢？

pepsiman

sega1119 發表於 2020-2-4 17:09
哎~~~睇来病得唔轻

最緊要有得醫...

hangshun

issachar 發表於 2020-2-4 17:09
係呀... 後置我一直物色緊...

咁就快去馬搵鎗王入多2對Spirits 2啦.......

hangshun

pepsiman 發表於 2020-2-4 20:08
最緊要有得醫...

但佢新機入咗無耐,咁快移情別戀

hangshun

Issachar兄: 原來你同我都用同一款機箱,同一款水冷,Display card都係Zotac, 而且都鍾意打機.....

pepsiman

hangshun 發表於 2020-2-4 20:16
但佢新機入咗無耐,咁快移情別戀

可以搵第二樣嘢嚟醫...

pepsiman

issachar 發表於 2020-2-4 17:09
係呀... 後置我一直物色緊...

後置可以考慮吓XTZ Spirit 4,同天花喇叭肯定夾聲...

issachar

banjo 發表於 2020-2-4 18:53
向典型環境鬥士致敬.

  環境鬥士真係唔易做...

issachar

Jazzgd1 發表於 2020-2-4 19:09
調轉fh同後置會唔會好聲D呢？

我都有諗過... 不過未有動力去實行... 同埋百事版大都有提議我可以試下將對後置擺遠 D...
其實要擺有位既... 不過個位唔多靚

issachar

hangshun 發表於 2020-2-4 20:51
Issachar兄: 原來你同我都用同一款機箱,同一款水冷,Display card都係Zotac, 而且都鍾意打機.....
...

嘩.... 好驚喎!!! 有冇咁0岩呀!!!!!

不過水冷我剛剛買左 Z73... 但係未有時間上...

pepsiman

issachar 發表於 2020-2-4 21:57
我都有諗過... 不過未有動力去實行... 同埋百事版大都有提議我可以試下將對後置擺遠 D...
其實要擺有位 ...

聲靚咪得囉...