ERIC 的 AV 軍火庫

bigpun1975

Hiendy 家訪交流室 ( 2011年6月號 )


編輯 & 圖片: Pepsiman
文字: 豬賓(bigpun1975)


     不經不覺，家訪交流室已經嚟到第十二回嘞！今次我哋專訪嘅ERIC，大家除咗記得佢個海龜頭頭象之外，對佢應該印象唔會太深；因為工作繁忙嘅關係， ERIC亦都比較少在Hiendy發言，今次筆者就聯同Pepsiman去尋找呢一個傳聞中嘅AV軍火庫，亦都希望揭開ERIC嘅神秘面紗！






再訪AV村

     在屯門某一個角落，已經住咗Hiendy四位AV發燒友，包括Stanley 2468、水貨Ken、Timmy大師，以及今次嘅主角ERIC，佢哋不約而同都有自己嘅獨立影音室又或者用盡成個廳嚟玩AV，嗰度係咪風水好啲有利於玩AV筆者真係無去考究，只係知道佢哋個個架生都唔少嘢就係不爭嘅事實。


喜歡這種亂！

     造訪ERIC之前，我哋首先醫飽個肚先。一路食佢一路話自己間屋好亂，叫我哋有心理準備咁話。一入到去ERIC屋企，一個約16呎乘14呎嘅廳，基本上已經係為AV而生，一套五隻KEF XQ歐洲版喇叭，另外一套又係五隻今年先入宮嘅DALI喇叭、五部Parasound後級、一部Emotiva XPA-5後級、三隻Subwoofer，包括：威力登DD15、MK KX-12、SVS PC-13U，仲有Timmy大師嘅遺物，吖！唔係….. 應該係搬屋遺留低嘅兩隻十仔，都仲未計一大堆blu-ray碟同ERIC嘅汽車模型收藏。可憐嘅餐枱，只能瑟縮在大廳的一旁作放什物之用。亂，真的亂，但發燒友一定喜歡這種亂。  

電視都兩部!









一年的新手

     ERIC於三年前與太太搬到現址，其實話佢係新手，只不過係成立咗一半，因為之前係從事影音相關行業，玩AV已經有十多年經驗，只係之前只求有聲出同夠爆就算數，各方面都唔係好講究。入伙時係用一部Onkyo 905，B&W同 Cambridge書架喇叭加多隻B&W十仔就起壇，投影機？當然無啦。直至到一年前部Onkyo 905輸出畫面開始有問題，最終換上Onkyo 5007，喇叭亦升級至KEF XQ5座地喇叭、KEF XQ2C中置；但係唔知點解，ERIC一直都玩唔好套機，及後因為太太的一句說話，造就咗一個AV軍火庫之誕生。


揸fit人

     ERIC之前嘅AV生活可謂閉門造車，一來身邊無朋友玩AV，二來又無上網揾資料，只係自己試、自己玩。ERIC響度諗，換咗部5007，無理由出嚟嘅效果都係同之前差唔多架，問題出響邊庶呢？佢一直只是乾着急，但又苦無對策！此時ERIC太太講咗句無心嘅說話：你玩模型車啲咁冷門嘅嘢都有網上討論區俾人傾計啦(ERIC係一個模型車發燒友)，點解玩AV無先；你話旺角賣AV鋪頭多，定模型鋪頭多吖？ERIC好像是當頭棒喝，又係喎！於是乎就上網搜尋AV討論區嘞。在機緣巧合之下，在網絡世界認識倒天下第一門派嘅揸fit人Timmy大師同埋佢嘅一班門生，從此佢嘅AV路上就再不孤單，亦因認識倒一班發燒友而令到AV上嘅知識更加豐富，當然唔少得被佢哋毒害啦！就係咁，試過啲AV產品有效果又買，班「毒友」話嗰樣正又買，買吓買吓ERIC屋企就響一年之內變成一個AV軍火庫咁嘞！


器材列表
投影幕: JK 106” 電幕

投影機: SONY HW-15



AV 前級: ONKYO 5508




後級: Parasound HCA-3500 X1
     Parasound HCA-2200 X1
     Parasound HCA-1000A X3





Emotiva XPA-5




前置: DALI IKON 8 &  Subwoofer: SVS PC-13 Ultra





中置: DALI VOKA II MK II




後置: DALI IKON 7




BDP: Philips 9500  &  CDP: Marantz SA14 Ver.2





超低音: Velodyne DD15




MK KX-12




兩聲道前級: Primare Pre-30





後備喇叭: KEF XQ5, XQ2C, XQ3


100小時嗎？

     講咗咁耐，都係時候玩吓啲重型軍火嘞，ERIC首先開隻蝙蝠俠黑夜之神比我哋欣賞吓。一睇；咦！乜啲色咁古怪嘅？啲紅色一撻撻！綠色又多過頭，啲演員個個面青青，光位重出現爆光情況添。ERIC表示部SONY HW-15買番嚟校咗一次之後，到依家睇咗百幾個鐘頭都無再set過喇。Pepsiman接過遙控之後左校右校，色彩、對比度、亮度都重新設定過，畫面終於正常番。所以；一部投影機新買番嚟，最好都係先run in一百個鐘，等個燈胆穩定咗先調校，唔係就真係盞搞！再細看投出嚟嘅畫面，發覺黑位同色彩都唔係十分實淨，仲有些少漏光嘅情況出現，應該係投影幕嘅問題。ERIC表示，希望盡快換上一支大啲嘅梗幕以解決以上問題。


13 VS 15

   早排大家都為咗隻試十仔天碟「鳳凰號」而左撲右撲，ERIC有幾隻咁堅嘅十仔，我哋當然唔會錯過咁好嘅機會，攞隻碟去試一試佢哋嘅威力。同樣係以第五同第六段墜機一幕去試，首先係DD15出場，聽感係：始終有番十五吋單元，低頻量十分之足夠，輕易填滿咗整個聆聽空間，除咗掃褲管之外，仲有少少打心口嘅感覺，不過速度唔算快。再嚟係SVS 13U，舊版相信好多朋友都聽過，但係ERIC呢隻係新版嚟，份Amp係從新設計，感覺上速度比舊版快，但係下潛力始終係舊版好啲，呢隻新版13U聽落中低頻比較多，量當然唔及隻DD15，但都好足夠，速度比DD15快，而且低頻嚟得乾淨一啲。如果你問筆者邊一隻好啲？我會話兩隻其實都能獨當一面，視乎你口味如何，但係如果兩隻一齊用就覺得有些少個性重叠，可能夾番隻MK KX-12會仲有驚喜。


起双飛！

      家訪當日，試倒ERIC嘅Onkyo加DALI組合，可能套喇叭仲好新，聲音未能離箱，一切未可作準。佢當初之所以購入全套DALI喇叭，係覺得KEF XQ喇叭雖然音樂感唔錯，聽演唱會一流，但係去到演繹一啲動作片或爆破場面時，總係覺得唔夠刺激，欠缺咗一份勁度。ERIC得知網友Q姐係玩全套DALI，為求覓到心頭好，就隻身遠赴Q姐嘅香歸試聽（唔知有無俾Q姐.....）。點知一試鍾情，大家千祈唔好誤會，係鍾情套喇叭，並不是Q姐。ERIC果然坐言起行，買齊一套DALI返歸。一開聲，真係合晒「何車」動作場面嘅刺激感返晒嚟，但係就連ERIC太太都略有不滿，呢套DALI喇叭嘅音樂感真的大不如前！針，確實無兩頭利呢！ERIC原本打算只留低一對KEF XQ5座地喇叭作聽歌之用，XQ2C同XQ3將會放售；在家訪第二日，筆者突然收到ERIC來電，佢話：我啱啱試過起雙飛..... 吓！乜你講埋啲咁嘅嘢架，我總算得上係個正人君子吖(至少我自己認為係，哈哈！)然後佢同筆者講嘅嘢更加恐怖；豬賓，你真係諗多咗喇，我見有套KEF喇叭淨咗響度，後級又用唔晒(最憎人曬命)，部Onkyo 5508有balance同 rca輸出，咪用盡佢駁晒兩套喇叭嚟玩囉，依家係變成雙前置、雙中置同雙後置，仲加埋隻MK KX-12玩三十仔添，問你死未！根據ERIC所講，出嚟嘅效果非常之滿意，有音樂感之餘又夠爆，佢仲相約筆者再到來一聚咁話，我諗真係要有足夠嘅心理同生理準備先會再戰呢個AV軍火庫了！


後記.....

     互聯網嘅普及，不但令人們距離拉得更近，亦使一班AV發燒友能聯繫在一起。ERIC亦在網上揾倒一班志同道合，無私分享嘅好朋友。只要你不恥下問，又或者希望分享一吓玩HiFi的苦與樂，我們亦樂意成為你的好朋友。影音世界上沒有最好、只有更好！願與您共同進步。



多謝收看家訪交流室，再見！  

iwantbd

果然----有心有力!!

chhanthony

五部Parasound後級

Gary33

Eric兄
果然係底唔狂........威力登DD15、MK KX-12、SVS PC-13U....

好正呀

LKM

good job!

qq1122yq

隻身遠赴Q姐嘅香歸試聽（唔知有無俾Q姐.....）。
bigpun1975 發表於 2011-6-1 19:04

    胡貴佢好鍾意上我度食撻架！

TCRAY

點解唔見咗隻MK250嘅

herman

我果三部Parasound呀~~

懷念

sing1357

真係名乎其實既軍火庫.....

ryanenen

軍火庫 + 名車成.......勁

eosteven

雙5.1即係全頻overlap, 聲會唔會矇左架?

pam_jack

真係好勁...後置都用座地...

行雙 5.1...

翩美...賣飛佛...

qq1122yq

真係好勁...後置都用座地...

行雙 5.1...

翩美...賣飛佛... ...
pam_jack 發表於 2011-6-2 15:31

    佢痴線架，仲有對ikon6 座地做後中置添呀...問你怕未！

howin

雙5.1即係全頻overlap, 聲會唔會矇左架?
eosteven 發表於 2011-6-2 15:25

    你未聽過咩??

eosteven

你未聽過咩??
howin 發表於 2011-6-2 15:52

    未呀, 聽過唔會問la

howin

未呀, 聽過唔會問la
eosteven 發表於 2011-6-2 15:59

    我都未不過我諗唔會有人答你會囉...會Eric就唔洗擺到成屋喇叭啦

pam_jack

佢痴線架，仲有對ikon6 座地做後中置添呀...問你怕未！
qq1122yq 發表於 2011-6-2 15:50

但係相中睇唔到嘅...莫非係走鬼後中置?

pam_jack

雙5.1即係全頻overlap, 聲會唔會矇左架?
eosteven 發表於 2011-6-2 15:25

我諗係睇戲用 Dali 5.1...睇演唱會用 KEF 5.1...應該唔會雙 5.1 一齊開嘅...

qq1122yq

但係相中睇唔到嘅...莫非係走鬼後中置?
pam_jack 發表於 2011-6-2 16:21

    代答：影相前未入，最近先入...

howin

我諗係睇戲用 Dali 5.1...睇演唱會用 KEF 5.1...應該唔會雙 5.1 一齊開嘅...
pam_jack 發表於 2011-6-2 16:26

    錯...係全開