點解我要賣咗我新買返嚟冇耐嘅 LHY 旗艦交換機 AS8 Pro

tmtsui

最近幾日, 我响二手平台放售一部用咗幾個星期嘅老虎魚 LHY 旗艦交換機 AS8 Pro。

目前仲未有人問津, 但就有幾位師兄問我, 呢部 LHY 旗艦交換機 AS8 Pro 係咪好差, 咁快就賣嘅？

既然有幾位師兄好奇問起, 我就响呢度一次回答。


我平時主要係聽 Roon, 而且一直用緊 Dela 嘅 S100/2 加 LHY 嘅 FMC。其他器材就唔講嘞。

純粹從成本嚟睇, 計埋線電, 接線等等, 淨係網路交換機呢 part, 我就差唔多用咗萬七八蚊。

雖然萬七八蚊唔算係一個大數目, 但當我睇到老虎魚呢部交換機個 spec, 見到佢有咁多功能, 用料又足, 有 OCXO 鐘、光隔、接地、線電、環牛等等, 加上我以前又用過佢哋好多產品, 效果都幾好。所以咪買佢返嚟諗住換咗我部 Dela switch, 希望咁樣唔單止有新嘢玩, 又可以慳返啲錢用嚟買下其他嘢囉。



我而家部 Dela 出嚟嘅聲音, 屬於比較清淡嘅類型, 雖然唔講得係完美, 但係都好夾我鍾意聽嘅人聲加一兩件樂器嘅音樂。

老虎魚呢部交換機, 出嚟啲高中低頻延伸其實非常好, 又平衡, 聲音密度又高。

另外, 佢聽起嚟比較暖、比較圓潤。 但絕對唔係肥, 唔係慢。 絕對係一部好機。

只不過問題就係, 呢部機嘅聲同我一直聽開嘅唔一樣。

我試過換電源線, LAN 線, 光鑯線。 變化係有, 但始終都係同我一直聽開嘅 Dela 聲有啲唔同。

對我嚟講, 呢兩部機都係好機, 只係兩部機嘅聲底取向唔一樣。 就好似平時揸開寶馬, 而家換咗部平治。 我唔係咁適應。

又好似我哋有時換線咁, 唔係貴嘅, 好嘅就一定啱。

有人鍾意聽膽機, 有人鍾意聽原子粒機, 燕瘦環肥, 各有所好, 最重要嘅, 仍然係要自己鍾意至得。



咁我係咪捉蟲？都係㗎。

我咪自己同自己講, 玩 HiFi 有時就係要俾啲學費㗎啦。

特別係呢種類型嘅機, 根本無得試聽。大家都係睇住個 spec 估下估下佢點樣點樣。

所以，我哋如果唔係真係响自己套機度聽過佢, 根本就唔會真正知道部機啲聲係點？ 同埋最重要嘅, 你唔會知道部機夾唔夾自己套機？ 係唔係自己杯茶？

所以我响聽咗呢部老虎魚嘅旗艦交換機 AS8 Pro 三個星期之後, 覺得唔係呢部機唔好, 而係我自己適應唔到, 始終放唔低之前 Dela 嘅聲音。 所以最後決定攞返部 AS8 Pro 出嚟賣。

希望佢啱其他人。

P.S.
事實上, 我都有試過將 AS8 Pro 和 S100/2 兩部機 stack 埋一齊 （留意唔係字面上嘅疊埋一齊） 咁用, 出嚟啲聲音, 的確係比單獨一部機好。

不過我衡量過之後, 覺得我如果咁樣做嘅話, 就完全違背咗我原來 "以機換機" 嘅打算, 而且响 budget 上面都超標咗好多。

所以, 我索性都係賣返佢出去就算。

有興趣嘅師兄, 可以 PM WhatsApp 俾我。

racewong

好正既分享.