建國大典 - 8 電啊電～

zelo

個新地方已經玩咗三個月，經過多次擺位、空間處理，好彩我識得人多，有班朋友出力出時間幫手，冇佢哋鞭策，我估我第一個月就會放低唔理，現階段大體上應該冇問題，之後就係音色、結像方面做調整，我除咗有Team 1、2、3之外，仲有隊物流服務隊，佢哋除咗送水上嚟之餘（送水都有要求架），仲有求必應，總之交低鎖匙，第二日就有一堆嘢放正房中間，或者自動波上埋架，所以依段時間試過好多配搭，行少好多冤枉路，要入貨都唔會奶嘢



首先我要處理電部份，工廠大廈啲電時好時壞，我又唔夠水入部電源再生嘅器材，近日見到Isotek有部Uni 16，又話可以拼埋部Titan一齊用，見到價錢唔太貴，又買部試吓，我個接法係牆插入Uni 16再入Titan，好老實，初初接上時効果唔太理想，所有嘢暗晒之余，動態都差咗，真係拆都拆唔切，不過任何器材我都會先試清楚，我之後一直插住煲佢幾日，原來真係有改變，依家套機對比之前靜同乾淨好多，之前用咗有出現嘅問題都已經消失，反而動態仲強咗，Uni 16對電源線比較敏感，我個人覺得要用無味加力量型接線比較好，依家個電叫做暫時解決，唔完美但可接受。





源頭解決之後試得最多係電源線，Odin Gold, Crystal Infinity, AQ Dragon, Tiglon白虎…等等，先講後級，換咗AQ Dragon之後，音色變得更平衡，控制力亦都有明顯提升，所以依對線我已經知道冇得走，又要乖乖科水。之後到前級，我發覺條白虎真係好啱聲，分析力同線條比之前好，我覺得可以砌低好多高價位線，加上個價錢真係抵玩，我覺得好值得推介吓，唯一要彈係線身真係好硬，不過依家有地方又冇乜所謂了，所以呢條又換埋。



試哂所有amp，又開始玩source，部Ethos CD Player換上Odin Gold同Crystal infinity真係好啱聲，兩條各有輸有贏，Odin Gold澎湃有力、線條清析，Infinity高音飄勉，聽人聲夠晒毒，可惜荷苞唔夠深，兩條線個價錢仲價過我部CD機，所以都係回歸現實，用返條舊線算。



搞完CD，又搞套黑膠系統，都係用Odin Gold、Infinity再加條Dragon，結論係，三條都唔啱用，我覺得每條線嘅個性太重，配DS Audio GMEX會更顯著，所以最後我都係覺得條舊Sigma啱用啲，我個人覺得Odin Gold同 infinity 用喺數碼前端會適合好多。去到依度已經放咗半血，下集寫埋接線部份。