第一次去廣州音響展

kelvinhin

第一次去廣州音響展，非常有趣。首先係好多人（但星期五已經算少人），好多得意嘢睇，有好多香港展覽已經冇咩機會見到嘅示範組合，例如大型多聲道示範，有啲香港冇機會見到嘅機，甚至有啲邪門嘢睇，例如光明正大賣嘅盜版唱片及器材。雖然展會嘅情況往年睇相都睇咗好多次，但真係去現場都係會被震撼到。依個 post 會持續更新我嘅所見所聞，敬請留意。

kelvinhin

CH 推 Magico 真心係有啲驚喜，聲音密度、動態、細節、平衡度都非常出色，加上選曲及音量控制恰當，令我聽咗好耐都唔捨得走。

banjo

多謝分享, 再多相睇吓就好喇.

racewong

banjo 發表於 2025-12-28 08:06
多謝分享, 再多相睇吓就好喇.

佢影左好多相呀

kelvinhin

之前分享咗我喺廣州音響展最愛嘅系統，其實仲有幾套我都係十分欣賞。




尚韵用全套 Audia Flight 夾 Kronos 盤同風佬推Alsyvox 屏風喇叭嘅效果我覺得都係有啲驚喜。之前聽過用 Soulution 推，聲音嘅透明度相當出色，但相對之下我都係鍾意用 Audia Flight 嘅效果多啲，主要係依個組合嘅聲音表現更為熱情、飽滿，呈現到喺屏風喇叭上罕見嘅「肉地」感，同時仍然十分通透、細緻。




作為 ATC 喇叭嘅長期用家，一直都好想試吓 ATC 喇叭喺東方賓館大會議室嘅效果，而今次力高就攞咗對 SCM150 passive 出嚟，用全套 Pass Labs 前後級配合 Playback Designs 訊源開聲。之前喺香港視聽展都聽過 Pass Labs 推 SCM20，聲音表現都唔錯。即使我覺得咁大個場用 150 我覺得係有啲 under-sized，但 Pass Labs 後級嘅強大動力仍然足夠填滿個場，聲音密度同動態都令我覺得好滿意，而且聲音仍然係相當平順。



另外兩套我好鍾意嘅系統不約而同都係細系統嚟。首先係凌智嘅 Diesis Audio「小天使」EdoVox，雖然只係用 Nagra CDC CD 機連前級配合 Compact PSU 直入 Classic Amp 後級，但聲音表現都係十分出色，尤其係動態表現同控制力都做得比預期中好。另一套係樂燊用 Simaudio 推 Raidho 細坐地，聲音溫暖而細膩，尤其喺入嚟依間房前聽咗一堆陰陽怪氣嘅機，入到嚟就覺得豁然開朗。

kelvinhin

作為 ATC 長期玩家，去到音響展一定會留意吓用 ATC 喇叭嘅房。今年廣州音響展計埋代理力高間房，目測有四間用 ATC 喇叭做示範。其中力高間房上一篇介紹過就不再重複。

世紀格雷嘅房間使用 Maxwell 909 合拼 amp 推 SCM150SE，串流機及 DAC 當然都係佢哋嘅產品。雖然房間好多人，只能企側邊聽一陣，但我覺得對 150SE 推得幾好，ATC 嘅招牌聲音特性都發揮到出嚟，雖然依部 amp 定價 RMB 82800 唔係平，但仍然係值得留意，畢竟之前佢哋嘅 DAC 評價真心唔差。



之後去到仙瑟音響嘅房間，依間台灣公司係 A.R.T. (Audio Reference Technology) 嘅亞洲代理（之後我會另文講吓廣州展嘅台灣參展商），佢哋開聲嘅系統係 Slient Angel 串流機配合 Mutec DDC + RME DAC 經 Spectral 前級接駁 SCM20ASL LE 主動式喇叭及一對 C1 超低音，並且用 Yamaha 專業後級推兩對超高音喇叭，分別向前及向後發聲。SCM20ASL LE 我曾經喺香港代理度聽過，整體音質同我依家用緊嘅 SCM20ASL Pro 差不多，但就會飽滿同細膩多少少。不過喺依間房入面，對 SCM20ASL LE 嘅聲音表現我會直接用「唔正常」嚟形容，第一日聽時，聲音非常薄同刮耳，第二日再聽，表現有改善，但中低頻仍然係明顯過份薄弱，而且就算係聽啲小編制弦樂/人聲都係咁。雖然我之前未聽過 A.R.T. 線嘅表現，但綜合網上嘅評價，話佢哋嘅線都係「屬於稍暖、厚、音色漂亮的類型」，即使 RME DAC 及 Spectral 前級都係通清取向，但會攪到連聲音嘅平衡度都出事，我會傾向相信係超高音引致「多隻香爐多隻鬼」…



第四間係 Williamson Audio，依個係香港人主理嘅牌子，主打佢哋自己設計嘅 OTL 300B 後級可以做到高達 300W 輸出，而方式就係用 300B 做電壓放大，原子粒做電流放大。之前我喺 Review33 見到依部機嘅設計師討論依部機嘅技術細節（帖文標題：單支300B合拼出200W!!!  ），個 post 都幾有趣。而依次佢哋就用晒自家 CD 轉盤、DAC、前級、後級推 SCM50（舊高音版），聽隻 "Erick Friedman - Violin Showpieces"，表現幾好，推出嚟嘅聲音好精神，好爽快，而又有少少膽嘅圓滑感。希望有機會再可以試吓佢哋嘅產品。

racewong

kelvinhin 發表於 2025-12-29 02:16
作為 ATC 長期玩家，去到音響展一定會留意吓用 ATC 喇叭嘅房。今年廣州音響展計埋代理力高間房，目測有四間 ...

香港品牌? 有無拎聯絡電話呢? 等我搵下佢先

kelvinhin

racewong 發表於 2025-12-29 10:59
香港品牌? 有無拎聯絡電話呢? 等我搵下佢先

Williamson Audio 佢今年香港視聽展都有擺 booth 但只係做靜態展示，而且佢個 showroom 在深圳萬商果邊

racewong

kelvinhin 發表於 2025-12-29 13:09
Williamson Audio 佢今年香港視聽展都有擺 booth 但只係做靜態展示，而且佢個 showroom 在深圳萬商果邊
...

吓? SHOWROOM反而喺深圳?

kelvinhin

racewong 發表於 2025-12-29 13:58
吓? SHOWROOM反而喺深圳?

可能係佢間廠都係喺果頭呱...而且如果想吸到街客的話，香港集中多音響舖嘅樓上舖租金真係好貴，否則添置依家就唔會賣波鞋、賣衫同賣咭啦

racewong

kelvinhin 發表於 2025-12-29 14:36
可能係佢間廠都係喺果頭呱...而且如果想吸到街客的話，香港集中多音響舖嘅樓上舖租金真係好貴，否則添置 ...

其實添置好鬼平...

kelvinhin

今次睇展，我冇特別留意耳機產品，畢竟最有睇頭嘅喺一個禮拜之前嘅廣州耳機展都出到七七八八。但當中都有啲特別嘢，例如 Yamaha YH-C3000 封閉式耳機，發佈咗幾個月，最近喺大陸同日本都正式推出，只可惜香港唔知幾時先有。

Ryuzaki

kelvinhin 發表於 2025-12-31 10:16
今次睇展，我冇特別留意耳機產品，畢竟最有睇頭嘅喺一個禮拜之前嘅廣州耳機展都出到七七八八。但當中都有啲 ...

唔怪得今年廣州展少左好多耳機野睇
原來之前有個耳機展

Dynavector

racewong 發表於 2025-12-29 13:58
吓? SHOWROOM反而喺深圳?

   
槍王老細，

威廉逊係深圳華強北万商电器城，位置見條片6分54，我20幾年前係佢舊舖聽過威廉逊7前級，佢老細鐘意ATC。佢舊舖係隔離大廈，不過兩個場係通嘅係電梯口行過去就得，見條片26分。万商個場咁多年都冇乜點變，條片9分10，係洗手間，唔收錢，條片9分29，個間聲華音響好多好嘢，以前佢D貨係香港拉過深圳，佢地有辦法唔駛過關，唔駛打稅。


https://youtu.be/8aGI9M2z9iM

racewong

Dynavector 發表於 2025-12-31 12:39
槍王老細，

威廉逊係深圳華強北万商电器城，位置見條片6分54，我20幾年前係佢舊舖聽過威廉逊7前級， ...

搵日真係要上去行下.

kelvinhin

Ryuzaki 發表於 2025-12-31 10:59
唔怪得今年廣州展少左好多耳機野睇
原來之前有個耳機展

之前見到廣州耳機展有用 Nagra HD DAC X 夾 HiFiMan 耳筒，勁

kelvinhin

之前都有聽聞過廣州音響展好多房都開得好大聲，去到發現好多房真係開得好大聲，而且部份係大聲到會破壞聲音平衡度令音質變差嘅程度，講真，東方賓館及中國大酒店啲房嘅隔音都OK唔差，但睇嚟係啲主持都慣咗開得比較大聲，而當外面比較嘈時又會開得再大聲啲，形成惡性循環，我覺得好可惜。最不解嘅部份房間竟然會喺開放式環境度同時有幾套機開聲，何必呢?



好彩有啲房選擇閂埋門去隔絕外面噪音，從而可以開返細聲啲，依點就非常值得鼓勵。

Ryuzaki

kelvinhin 發表於 2025-12-31 23:15
之前見到廣州耳機展有用 Nagra HD DAC X 夾 HiFiMan 耳筒，勁

嘩! 咁鬼毒