復古外形 卻非舊聲 Unitra WSH-805

kelvinhin

大概半年前，我喺 P&O HiFi 荃灣嘅陳列室試聽 Perlisten 喇叭，喺試音室外就見到套之前未見過而超靚仔嘅 CD 機同合併 Amp，依套機嘅外形猶如七八十年代嘅日本高級音響，但部 CD 機卻係用上 E Ink 屏幕，而且居然毫無遺和感。一問之下，原來佢哋當時啱啱做咗波蘭牌子 Unitra 嘅香港代理，而依套就係佢哋嘅 WSH-805 擴音機及 CSH-801 CD 機。

Unitra 對於香港發燒友頗為陌生，但佢哋早喺 1961 年已經成立，喺計劃經濟年代曾經係東歐最大嘅電子產品生產商之一，甚至曾經為日本公司代工。但隨著冷戰結束，國營體系瓦解，Unitra 喺八十年代末亦停止營運。直到 2021 年，華沙有班工程師與音響發燒友以「讓 Hi‑Fi 回到本來面貌」為目標重啟 Unitra，佢哋堅持完全喺波蘭設計及製造，專注兩聲道音響而唔係回到綜合家電路線。



今次測試嘅 WSH-805 擴音機第一眼最吸引人嘅當然係非常靚仔嘅音壓錶及大型啪掣，音壓錶可以調節亮度，而且光線亦相當均勻。佢亦設有低音、高音、Balance 及「Smart Adaptive Contour」輪廓補償，可在需要時微調聽感，並有 Linear（Bypass）模式，可以一次過關閉調音功能，獲得更好音質。



除咗外觀外，佢嘅規格都十分靚仔。佢用上全模擬雙單聲道架構，不但放大路徑分離，甚至連火牛都分離，令聲音分離度在 1kHz 時超過 100dB，營造穩定結像與寬闊音場。功率放大部分使用電流回輸技術，配合離散式電路，令其信噪比超過 100dB，諧波失真只有 0.0008%，互調失真低於 0.0015%，令聲音非常乾淨，充滿細節。近年如此高性能嘅擴音機好多都係行 Class D，但 WSH-805 卻係穩打穩紮嘅 Class AB 擴音機（8Ω 每聲道 80 W、4Ω 每聲道 125 W），甚至仲提供 Class A 模式，雖然輸出會下降到 8Ω 每聲道 8 W、4Ω 每聲道 16 W，但就可以令聲音更線性。

輸入端子方面，WSH-805 提供五組 RCA、一組 RCA MM/MC 唱頭放大及一組 XLR。輸出方面，有兩組喇叭輸出方便 Bi-wire 接駁，亦有 6.3mm 耳機輸出。



我搵咗 Atomica Grand Strato「皇極」配合 WSH-805 作試聽，而喇叭線為 DR.E ML-3。「皇極」之前喺 Hiendy 俱樂部及胆皇度試聽過，音質好好，亦唔難推（效率 88dB）。喺 Class AB 模式下接駁 Lumin P1 試聽，先用 Supra EFF-IXLR XLR 線接駁，聲音非常生猛活潑，但播 rock 嘢卻發現有拆聲情況，睇返說明書，發現 WSH-805 XLR 及 RCA 端子嘅最大輸入電壓為 3.15V rms，而 Lumin P1 喺正常增益下 XLR 嘅最大輸出電壓為 6V，意味著拆聲係意料中事。將 P1 調到低增益輸出，其最大輸出電壓大概為 2V，咁就冇拆聲情況，但聲音卻明顯冇咁生猛。由於 P1 嘅 RCA 輸出喺正常增益下最大輸出為 3V，所以我就換條 Supra EFF-ISL RCA 線上去，將 P1 轉返正常增益，聲音即刻醒神返晒，又冇拆聲。考慮到現時愈來愈多訊源嘅輸出電壓都比正常規格高，儘量用返 RCA 駁 WSH-805 會比較穩陣。



WSH-805 推「皇極」除咗好生猛活潑之外，亦都相當乾淨同細節豐富，可以還原到錄音本色之餘，聲音亦唔會覺得冰冷或刺耳，同時層次感又好豐富。依套組合我故意唔聽咁多發燒碟，揀多咗近年嘅流行曲嚟聽。例如香港樂隊 The Hertz 嘅首張同名大碟，依隻碟錄音一般，喺某啲機度聽可能會覺得有點渾沌，但喺依套系統上，即使我好清楚感受到其動態壓縮有點過火，但主音嘅聲音仍然係非常清晰，唔同樂器唔會「炒埋一碟」，可以分到各自嘅音色質感，而且鼓嘅低頻亦相當 punchy。



而攞依個組合嚟聽錄音出色嘅音樂，當然效果更上層樓。聽沈靖韜喺 2025 年范．克萊本國際鋼琴大賽半總決賽中演繹巴赫/拉赫曼尼諾夫 BWV 1006，可以好準確地還原到其乾淨俐落嘅琴音，而且充滿靈動感，亦好清楚聽到喺踏上踏板時對音色嘅變化，整體感覺相當細緻、順暢。聽埋 Mikhail Pletnev 嘅新碟《Chopin & Scriabin: 24 Préludes》，依隻碟嘅錄音與演繹都係喺另一極端，聲音非常柔和，故意地營造出虛幻嘅感覺。而 WSH-805 就可以保留到依種朦朧感之餘，又仍然係相當實淨，聽到鋼琴嘅形態感。依部 amp 嘅聲音表現有啲 Luxman 嘅影子。

至於 Class A 及 Class AB 模式下聲音有咩分別？繼續聽住隻《Chopin & Scriabin: 24 Préludes》，從 Class AB 模式調去 Class A 模式，音量不變（大概 70~75dB），Class A 模式嘅聲音密度明顯會更高，聲音略為偏暖，錄音中嘅「溫柔感」更強烈。但留意某啲歌用 Class A 模式聽可能又會冇咁爽快俐落，而且 Class A 模式下機身溫度會高好多，所以最好預留充足散熱空間。



WSH-805 嘅 MC 唱頭放大並無提及增益有幾大，駁去只有 0.4 mV 輸出嘅 Hana ML 唱頭，最初對佢都冇咩期望，但實際表現都唔差。音量雖然要略為扭大啲，但整體聲音仍然足夠生猛、有力。背景並非漆黑一片，但底噪都係可以忽略嘅輕微程度，而且佢亦足夠重現到好多聲音細節。我覺得已經起碼係幾千蚊獨立唱放嘅水準。

最初見到 WSH-805 果陣，見到佢嘅復古外形以為連啲聲都好復古，但一開聲完全係現代高階合併機嘅應有水準，而且調返去 Class A 模式又會出返啲韻味，兼且用料十足，係值得留意嘅黑馬之作。

黑膠迷

這部擴音機外表很有70年代產品的感覺
令我想起當年的Pioneer/Onkyo/Kenwood...............

racewong

黑膠迷 發表於 2026-1-12 10:50
這部擴音機外表很有70年代產品的感覺
令我想起當年的Pioneer/Onkyo/Kenwood...............
...

前輩都買左部805?

kelvinhin

黑膠迷 發表於 2026-1-12 10:50
這部擴音機外表很有70年代產品的感覺
令我想起當年的Pioneer/Onkyo/Kenwood...............
...

我第一眼都覺得好似七十年代嘅日本機，但望落更精美

黑膠迷

kelvinhin 發表於 2026-1-12 13:26
我第一眼都覺得好似七十年代嘅日本機，但望落更精美

同意,佢同時有埋Phono及"Tuner"輸入,
Headphone輸出近代新擴音機而言較罕見

黑膠迷

racewong 發表於 2026-1-12 11:47
前輩都買左部805?

冇呀,阿婆退休多年,食緊棺材本,邊有錢換新機..................

banjo

對ATC20去咗邊?

racewong

黑膠迷 發表於 2026-1-12 16:34
冇呀,阿婆退休多年,食緊棺材本,邊有錢換新機..................

前輩大把靚碟. 有排聽啦

kelvinhin

banjo 發表於 2026-1-13 08:38
對ATC20去咗邊?

收埋咗，以前有對 ATC 7 但換咗 20A 之後賣咗，所以借對皇極試吓夾部 Unitra，我覺得依個組合真心幾得，同埋喺細環境都發揮得唔錯。

banjo

kelvinhin 發表於 2026-1-13 14:45
收埋咗，以前有對 ATC 7 但換咗 20A 之後賣咗，所以借對皇極試吓夾部 Unitra，我覺得依個組合真心幾得， ...

可以玩雙修, 時不時攞返對20出嚟爆吓, 又有另一番滋味.

racewong

banjo 發表於 2026-1-13 15:00
可以玩雙修, 時不時攞返對20出嚟爆吓, 又有另一番滋味.

KELVIN仔個竇玩無極已經夠玩

banjo

racewong 發表於 2026-1-14 11:40
KELVIN仔個竇玩無極已經夠玩

呢樣真

racewong

banjo 發表於 2026-1-15 08:52
呢樣真

無極 好好爆