簡單使用報告：Tiglon TPL-3000A, TPL-2000X

zelo

前一排新搬後，一直想幫部前級搵條電源線，損友們大家都好捨得借嘢我試，又Odin gold又Crystal 文西又AQ Dragon，効果當然好，但價格唔好，我依啲窮L邊可能玩得起，試完去食住下午茶正在煩惱之際，有位損友”怪醫K”無啦啦彈咗一句，師兄，白虎啱唔啱？身長1.8、實淨又有線條，試過保證你即刻愛上，嘩⋯⋯公衆地方咁樣大大聲問我依啲嘢⋯⋯攪到成間茶餐廳啲人望向同一方向，心情非常複雜，不過既然你問到，心諗試吓都無壞，最後我低低頭細聲講，好吖…麻煩師兄，怪醫K見我神情咁恍惚，忍唔住兜巴車埋嚟同我講，佢係講緊條Tiglon TPL-3000A 白虎電源線。





第二日怪醫K帶住條Tiglon TPL-3000A白虎電源線上嚟，日本產品基本上唔使怕質量問題，成組線無論包裝、造工都係一流，線身夠硬淨，但未至於屈唔到咁硬，仲可以做到走線，線身技術我唔多講，我淨講吓個効果，通常試線我都係習慣性先放去前級，因為最易聽到効果，套前級我係一直用住蛇王Sigma NR，貪其無色無味夠氣力，換上白虎電源線後，立刻聽到高中頻有返多啲生氣，聲音比較彈跳，更有音樂感，低頻方面速度比較快，需然量冇減，但收得較快，或者可以講收得比較圓潤，絕不拖泥帶水，我個人覺得係一條平衡度幾高嘅電源線，最重要係價錢尚算公道，就算要加長都係補好少錢，價錢亦都好公開，喺官網已經有晒價格可以參考，所以試完之後我立即第二日搵老陳訂咗條返來。





再過前一排，我部Studer A807開盤機又要搵對XLR線，因為要用到3米，基本上所有品牌都要特別訂製，用開嗰啲品牌要去到依個長度已經係殺人價，我見條白虎用得咁好，對Tiglon依個品牌有啲信心，於是上官網睇睇，見到TPL-2000X依對接線，雖然網上評價唔多，但我見價錢合理，又即管做死侍入對試吓，因為要特別訂造，所以都等咗個幾月先收貨，收貨時拎上手，做乜輕飄飄咁，嚇到以為個盒入邊冇餡，要即場拆開箱檢查，依對線確實非常輕，線身好柔軟，都係嗰句，日本產品造工無可挑剔，聲音取向同條白虎差唔多，都係屬比較跳動、音樂感重嘅類型，速度比較快及通透，分析力亦都有一定水準，三頻表現平均，亦都屬於平衡度好高嘅接線，總括來講我覺得依兩件產品性價比好高，不過就真係少人留意，以價論聲，我個人覺得算對得住個價格，尤其條電源線，真係幾值得玩。

racewong

識玩當然玩白虎