Vivid Giya G4 CU簡單聽後感

zelo

前兩日上俱樂部聽吓對Vivid Giya G4 CU版，Vivid我聽過好多個組合，不過夾Nagra classic又真係未試過，睇牌面好似好淡味，會唔會vivid 唔夠vivid？又上去聽吓順便見吓幾位老友，一入房見到對紅色G4非常搶眼，外型一如以往非常型仔，加上依對G4真係好細隻，成對藝術品咁，入屋應該唔會有人詐型。



入到房即刻坐埋一邊聽嘢，先睇睇用咩推對喇叭先，三件頭Classic Dac2 , Classic pre, Classic amp夠哂簡單，聽咗幾首歌又真係推得有板有眼，不過依對喇叭對擺位有啲要求，要toe in多少少，加上兩邊要預留啲空間俾兩邊低音單元，以當日聽感，個擺位已經合格有餘，結像清晰，音樂感豐富，致於淡唔淡口？我老人家唔食得太濃味，個人覺得以Nagra推已經夠晒味道，要唔要再加料就好睇你個人口味。

有咁多好處，當然有讃有彈，成個系統可以話刀仔鋸大樹，不過有時都要睇吓棵樹有幾大，我覺得G4個低音單元稍為偏細，以俱樂部間房個空間，對G4嚟講大咗少少，能量感有少少不足，聽大動態音樂時我覺得中高同低頻有少少斷層，我覺得G4比較適合用喺150尺左右大嘅空間，大過兩百尺應該要考慮選擇大一個型號。

總括嚟講，今代CU版確係有進步，音色方面更有音樂感，造工亦都比起以前進步太多，如果以價錢來講，成個組合60個有找，加上全部細細件又易入屋，一定唔會有爭地盤、搶灘事件發生，仲有係唔好以為成套機細細件，但音色絕不細口型，音効完全可媲美一套中型系統。