黑膠入門佳選 TEAC TN-400BT-X

kelvinhin

之前一直都好想買隻入門級唱盤擺喺耳機系統果邊用。早前去廣州音響展，大昌嘅代表話 TEAC 嘅入門級唱盤 TN-400BT-X 有全新湖水綠顏色，問我有冇興趣試吓，即刻應承咗，因為好多新手入門都會揀依個價位嘅唱盤，而依款之前亦有好多人推薦過，我真心想試吓究竟佢係咪好選擇呢？



TN-400BT-X 雖然攞上手並唔太重，但用料以入門級唱盤嚟講算係足秤。首先佢用上電子控速及高扭力摩打，以皮帶驅動鋁合金轉盤，配合精確切割嘅不銹鋼中軸及黃銅軸承，可減少摩擦力，令佢轉速更穩定。其唱臂雖然冇好似高階款咁使用 SAEC 唱臂，但仍然係用心之作。使用 S 型靜態平衡設計，加上用重鎚調整唱重及旋扭式反偏壓（Anti-skating）調節，可以作出更準確嘅調整，令唱頭發揮更佳音質。唱頭殼使用標準 SME 式設計，更換唱頭更方便。



TN-400BT-X 原版使用胡桃木貼面，配合 MDF 盤身及橡膠四點式腳墊，以入門級唱盤嚟講頗為堅固。而湖水綠配色版就改用光面機身，望落就更有時尚感。做工上我覺得都十分細膩，睇返個盒原來佢係台灣製造。而佢跟機嘅MM 唱頭係 Audio-Technica AT95E，以入門級唱頭嚟講都唔差，起碼係用橢圓針，提供比圓針更好嘅循跡能力及高頻延伸。



作為入門級唱盤，內置唱頭放大器十分常見，TN-400BT-X 亦唔例外，內置使用 JRC NJM8080 運算放大器（OP-AMP）嘅 MM 唱頭放大器，更支援 aptX Adaptive 藍牙發射器，連接藍牙喇叭或耳機，雖然我都係建議儘量駁線聽會比較好聲，但如果夜晚想駁耳機靜靜哋聽，我覺得依個都係十分方便嘅選項。



即使 TN-400BT-X 係入門級唱盤，但調較上都唔可以馬虎。我調較依隻盤嘅工具，全部都係喺淘寶買，總成本大概一百蚊人仔，建議每個新手都可以買返套先。當中包括針壓計、Azimuth 尺、水平珠、唱片掃及唱針掃。放置唱盤後，首先用水平珠睇吓係咪水平，如果唔係就扭腳座作微調。然後跟返說明書，安裝唱頭殼、重鎚及將唱臂調整到「浮起」嘅狀態。AT95E 嘅建議唱重係 2g，將唱重扭到 "2" 嘅位置後，將唱針落喺針壓計上檢查係咪 2g，唔啱就微調重鎚位置。之後就放塊冇用嘅黑膠上去轉盤，將 Azimuth 尺放喺上面，將唱針落喺中間四方格位置，喺 Azimuth 尺正面單眼觀察唱頭殼係咪同啲線水平，如果唔係就輕微扭鬆唱頭殼，調整方向後揸住唱頭殼扭緊，記得扭唱頭殼時必須起咗針先。唱片掃係喺播碟前向外輕掃碟面，帶走碟面塵埃，而唱針掃就係每播完一面唱片後，從後到前輕掃唱針兩三吓，清除針尖污垢。



隻 TN-400BT-X 擺喺耳機系統上，用內置唱放開聲，即使增益唔算好大，但就算用上 Sennheiser HD800 + Ferrum OOR 依套細節刻畫能力極強嘅組合，喺正常聆聽音量下都聽唔到底噪，係音量要扭大啲。我揀咗 Blue Jeans Cable LC-2（Belden 代工）RCA 線連接 OOR，音質真心比預期中好，首先佢嘅聲音比預期中平衡、乾淨，並冇因為係「送俾你」而將貨就價。聽 Lincoln Mayorga & Distinguished Colleagues - Volume III 依隻「喇叭花」Sheffield Lab 嘅早期直刻碟，聲音十分開揚，各種樂器嘅質感雖然稱唔上係相當立體，但仍然係可以分得開，有啲層次感，甚至仲聽到少少空氣感，咁嘅價錢，我覺得好超值。



TN-400BT-X 作為入門級唱盤，音質上當然不能挑剔太多，例如輕微嘅內圈失真就無可避免（依個係 AT95E 嘅通病），但我仍然搵到好多地方係真心幾欣賞。首先係佢有電子控速，令佢嘅轉速好穩定，而且調較速度亦十分方便。我聽咗好多隻已經聽到熟嘅碟，聲音係非常穩定，亦都冇因為太快或太慢而令聲音走 key。雖然我冇精密儀器檢測轉速，但起碼聽落去冇問題。



手上有隻 Nagaoka MP-200 唱頭擺喺度冇用，又有個 Technics 唱頭殼可以用，所以就裝咗落 TN-400BT-X 度聽吓，沿用佢嘅內置唱放，都可以聽到改善相當明顯。MP-200 最吸引我嘅地方，係佢嘅聲音以 MM 頭嚟講相當細膩，而又清晰。喺 TN-400BT-X 嘅內置唱放上，依個特色仍然可以清楚地呈現出嚟，而且聲音嘅細節亦明顯多咗好多，係相當有感嘅升級。



雖然我一直覺得用藍牙聽黑膠係「邪魔外道」，但喺 TN-400BT-X 度駁 Sennheiser Momentum 4 藍牙耳筒，效果又可以接受喎。聲音細節我會覺得係比有線連接少啲，但仍然可以呈現到柔和而飽滿嘅「模擬感」，相信同 aptX Adaptive 支援最高 24bit/96kHz 高清格式有關。而佢嘅發射能力亦唔錯，就算我行去隔住牆嘅另一間房，都無斷線。



之後我攞咗隻盤返去發燒房，聽吓駁喇叭嘅表現。喺機背關閉佢內置嘅唱放，改用我用開嘅 Aurorasound VIDA Prima，先用原裝嘅 RCA 線及 AT95E 唱頭聽聽效果，播流行曲其實已經唔錯，活潑有力，當然講高低延伸同我用開嘅 Hana ML 唱頭 + Technics SL-1200GR 唱盤就冇得比，考慮到 TN-400BT-X 價錢只係我本身套黑膠系統嘅零頭，咁的話已經係高水準表現。



但聽多幾隻碟，我發現高頻好似有啲昏暗，我就估計係原裝 RCA 線電容值太高。對 MM 唱頭而言，如果從唱盤連接去唱放嘅接線電容值太高，就會令高頻變暗。所以我換咗本身用喺 SL-1200GR 嘅 Van Den Hul 「雲吞河」D – 501 Silver Hybrid 信號線上去（依條線嘅價錢同隻盤幾乎一樣），雖然依個係好唔合理嘅組合，但聲音可以用「一天光晒」嚟形容。高頻延伸出返晒嚟，雖然講細節拾取能力仍然同 Hana ML 有一段距離，但起碼高、中、低音都可以平均地還原到先。

將唱頭換做 MP-200 再聽，聲音明顯比用內置唱放更開揚，三頻亦更平均，令佢聽古典嘅效果明顯比 AT95E 唱頭好好多，同時亦証明隻盤設計良好，就算係入門級產品都可以有升級空間之餘，仲可以聽得出升級後嘅分別。



至於係其他「補品」又聽唔聽到分別呢？我試咗將手頭上一隻唔太貴嘅 12V 線性火牛替換原裝嘅開關式火牛，改善雖然冇換唱頭咁大，但都係聽得出，尤其係用其內置唱放時，聲音細節更多、聲底更乾淨、清晰。而更換原裝嘅羊毛唱片墊做 fo.Q RS-912 唱片墊亦一聽就聽到改善，甚至我覺得分別會比更換火牛更明顯，同樣係令聲底更乾淨，但換唱片墊會多份通透感。不過有啲「補品」TN-400BT-X 係會「虛不受補」，例如 SAEC SRS-9 唱片壓，雖然佢已經係比較輕身嘅唱片壓，但放咗落去，聽落聲音都係會少咗份「靈動感」，如果係放淘寶賣幾十蚊，大概 400-500g 嘅唱片壓，聲音更會死氣沉沉。對於依種入門級唱盤，我都係會建議唔好用唱片壓。

試 TN-400BT-X 真心好開心，因為過程就好似將我初玩黑膠時嘅經驗重新體驗一次，一路感受慢慢升級嘅過程，亦能從中發掘到佢嘅升級潛力深厚。就算係出廠狀態時嘅聲音表現，以其街價嚟講已經交足貨。如果升級埋唱頭或其他配件，亦都有充足發揮空間，令佢足以成為我心中最出色嘅入門級唱盤之一。