葡萄老祖去漫遊 4 – 陳年葡萄

zelo

前排大師話有局開，話約上King sir度學習，我當然奉陪到底，因為今次去嘅唔係一般燒友，而且King sir個地方公認超好聲，我每次見到佢套機都口水直流，只係一直苦無機會拜訪，計起上嚟King sir可以話係我師公，佢喺我開始玩Chord細件頭時，已經聽緊成套全新旗艦，所以粒葡萄都陳咗好多年，今次家訪我係非常期待。


同大師食完個快飯就直接上樓，一開門已經葡萄酸湧上喉嚨，我初頭以為King sir只係用一邊廳嚟玩，原來佢係用成個單位獨立玩，簡直係發燒友嘅天堂，名乎其實嘅私竇，另外入到門口有樣嘢又係好吸睛，就係兩邊疊起兩對 REL 212/SX subwoofer，一對疊起個高度已經高過對YG喇叭同我個人，放兩邊傍住對喇叭真係夠晒霸氣。可能個廳夠晒闊，位置亦都足夠有餘，我入屋後望上去又冇乜壓逼感。



跟住望吓對喇叭，咦…原來已經由YG Hailey升級到YG Sonja 3.2，依個發現簡真係入Golden Goal嘅心情，因為Sonja 3.2我只係喺音展聽過，家用都係頭一次，所以見到對Sonja真係喜出望外。至於音源，King sir一共有兩個盤加四支臂，分別係Transrotor Tourbillon 07 唱盤+ da Vinci Grandezza唱臂 +  Clearaudio Goldfinger Statement唱頭、Kuzma Safir 9唱臂 + 4QD唱頭、Reed 3P唱臂+ vDH Colibri Stradivari唱頭 ，Kuzma Stabi Ref唱盤 + Kuzma 4Point唱臂 + EMT JD VM唱頭，唱放又係有兩部：Soulution 750同音樂大師240 ，依個盤陣基本上聽咩類型嘅歌都可以，點聽都難唔到依個盤陣。而數碼音源方面主要係用Soulution 745 SACD做轉盤 + DIY 解碼。前後級為音樂大師41胆前加音樂大師1841 monoblocks，線材方面我見到好多用上定制嘅，今次時間比較倉猝，而且現場又有太多暗器，所以冇辦法逐件記晒。





我哋先由CD聽起，音樂一起已經可以令人入晒局，音場可以用宏大嚟形容，坐正皇帝位係可以感受到全幅後牆已經成為一個大畫面，結像清晰、定位準確。YG喇叭一向俾我感覺係比較冷聲、高分析、精準，但喺King sir度聽又係另一種聽法，佢套系統相對比較暖聲，聽女聲帶有絲絲甜味，我個人覺得好”㯲聽”，或者我咁比較，我以之前影音展個聽感嚟做比較，影音展聽嗰對Sonja好強勁，好高分析，嗰次我都係聽得好過癮，但我個人覺得聽多幾首歌會有少少攰，會想行開一陣轉頭再聽，King sir依對我係會一直坐住聽唔想離開，唔係嗰日要輪換，我係可以成為一隻藤壺咬實個皇帝位唔走，始終擺音展同喺屋企聽在調校上係會有一定差異，播到尾段，King sir放咗隻霸王卸甲入面首三國，依首歌真係嚇親，尾段有風聲嗰部份，令我覺得好似置身風眼入面，風聲係圍住你個人咁，可以做到依個効果，我覺得嗰四隻十仔真係功不可沒。





因為CD真係好聽，黑膠部份只係聽咗好短時間，唯一最有印象係vDH Colibri Stradivari唱頭播女聲超毒，依個唱頭播女聲好夾，把女聲甜到漏，聽到我起晒雞皮。今次家訪又係一次純學習之旅，唯一可惜係無緣聽到對Magneplanar 20.7屏風喇叭，不過淨係聽對Sonja已經值回票價，家訪King sir之後實在印像深刻，我嘗試用自己套機還原個効果，當然大家唔同系統，要做到100%還原係冇可能，所以用盡辦法都只係可以還原少部份，但都已經好開心，起碼我套機跟住做都有進步，我依家唯一可以做嘅就係繼續葡萄落去。

racewong

我都好耐無去KING SIR度聚舊啦.