Ben哥DIY的家

pepsiman

Hiendy 家訪交流室 ( 2010年9月號 )                     
                                                      
編輯、圖片: Pepsiman
文字      : 豬賓賓


  各位好，闊別大家一排嘅家訪交流室又同大家見面。由今期開始，將會由我bigpun1975聯同Pepsiman版主一齊去主持家訪交流室。其實我加入之後，大家唔好以為Pepsiman會小咗嘢做，我只不過負責寫作及以助手形式協助，一切聯絡、攝影、美術、編輯及後期製作，都係由Pepsiman一手包辦，所以希望大家多多支持，同時俾多啲意見，等我哋可以做得更好！
  好勒，入番正題。今次我哋專訪嘅對象，係一位玩咗AV及HIFI超過二十個年頭嘅網友BEN哥(網名 ben13)。於九月上旬一個時睛時雨嘅星期六下午，筆者與Pepsiman一同去探訪呢位前輩，大談AV經。



低清至高清

我哋到達大圍某個依山建成嘅屋苑，Ben哥已經開大冷氣等我哋。未開始前先大家吹吓水，原來Ben哥早於八十年代中期，DOLBY PRO LOGIC 年代已經玩AV，當其時玩AV絕對係一樣高消費活動，而且選擇唔多，同依家嘅普及程度真係有天淵之別。之不過當時嘅Ben哥因為工作繁重關係，無乜時間去發展呢個興趣，之後就慢慢丟淡咗勒。直至近年，工作已經上咗軌道，而且高清影音已發展得非常成熟，所以就投入高清影音嘅懷抱。與此同時，兩聲道方面，Ben哥喜愛DIY，無論前級、後級、甚至CD盤，都係自己一手一腳搞，想部機點樣都得，自己話晒事，零件亦平到一百幾十都有交易，所以非常之抵玩！再細看Ben哥牆壁四周，都黏滿一舊一舊嘅剪碎隔音綿，而兩個角落更分別有長隔音綿及白色紙筒，相信一定是調聲的秘技。



電源質素之重要性

傾完計，筆者就開始睇下Ben哥啲[架生]，發覺佢已經為屋企嘅器材拉咗獨立電。Ben哥覺得乾淨嘅電源在HiFi及AV都非常之重要，就如水喉有潔淨嘅水一樣，毫無雜質自然飲得健康。加咗獨立電之後，無論力水及背景寧靜度都得到提升，連帶電視畫面也乾淨不少，所以佢一口氣造咗六個蘇位，一共十二個插頭，足夠AV及兩聲道應用。


器材一覽表:

AV系統
Plasma: Pioneer 500A


AV Amp: Yamaha Z7


BD player: Pioneer 51-FD


Subwoofer: Sunfire HRS-12


前置: Westlake Audio 6.75


五聲道前置喇叭線


中置: Focal JmLab LCR700


後置: Dynamic Audio
後中置: B&W SOLID


HiFi 架: Solidsteel

兩聲道系統

DIY仿 Audio Research SP10  前級


DIY 6V6 膽後級


DIY CDPro2 transport
TDA1541雙皇冠解碼


與AV 共用 Westlake Audio 6.75 喇叭


兩聲道前置喇叭線


Z7之威力

睇完一輪之後，當然係玩機嘅時候啦。首先開隻近期聲畫絕佳嘅[末世天書] Denzel Washington 同 Gary Oldman 在小鎮大街槍戰一幕試吓(Chapter 8)，第一個感覺就係Pioneer 500A嘅還原度非常之高，Gary Oldman 所穿著嘅三層黑色衣服，都交代得清清楚楚，唔似我屋企睇同一段時，部LCD TV只得一層死黑，500A無論黑位同灰位都有上佳嘅表現。再睇落去，筆者與拍檔都覺得聲音唔似一向聽開嘅Yamaha風格。一問之下，原來Ben哥比較鍾意用Straight mode去睇戲而放棄DSP mode，佢認為咁樣睇戲會比較埋身。但係我哋本住乜都試吓嘅精神，Pepsiman就提議開番個Spectacle嚟試下。一開之後，空間感隨即加強，清楚聽到Gary Oldman手下開嘅一槍，係由右前置射到左後中置，而且尾音仲十分之長。雖然Ben哥嘅梳化係貼牆擺放，但係聽落有如置身大街現場一樣，在座幾位聽完後都嘖嘖稱奇！
再跳到同碟攻打木屋一段(Chapter 11)，手動機槍於前置及中置出嘅聲音十分澎湃，令成張梳化都震晒。但當鏡頭一轉，到後置及後中置出機槍聲時，我哋就發覺聲音出現咗唔連貫嘅情況，聲音明顯係細咗同暗咗，Pepsiman立即按入Z7個menu睇睇，發覺前中置聲道比後置相近。所以佢先將後置嘅聲量略為提高1個db達至+8db，前置及中置大幅調低5-6個db到+1.5db，後置及後中置分頻點亦由80Hz提高到100Hz，加強後置中低頻力度盡量追近前中置，再作少少EQ微調。出嚟嘅校果係可以做到七隻喇叭聲壓相同，但由於前中置與後置及後中置質素實在相差太遠，所以出來聲效始終未如想像般理想，後中置都唔係太發揮到。據Ben哥所講，對B&W SOLID喇叭已經服役有二十年了，開始出現老化嘅情況，都係時候退下來。其實佢一直想將全套AV用喇叭換成JBL系列，一來唔怕有唔夾聲嘅情況出現，二來就唔洗好似依家咁同兩聲道共用一對喇叭，免除抆抆插插之煩腦。

Sunfire 變 MK !!??

家訪前，Ben哥曾要求Pepsiman帶埋條呢期Hiendy大熱嘅 JPS in Wall 電源線，同埋性價比幾高嘅Emotiva HDMI線去家訪，所以就先將條電源線插落去Z7換走條Acrolink 4030一試。我哋先播 [蜘蛛俠 3] 沙魔於地鐵隧道內大戰黑蜘蛛俠一幕。感覺上包圍感强咗，聲音動態亦增加了，最特別係超低音嘅衝擊力亦都顯注加强，眼前嘅 Sunfire HRS-12好似搖身一變，變成一隻MK MX-250一樣，拳腳吓吓都有打心口feel。估唔到一條電源線會對成個系统有翻天覆地嘅轉變，真有趣!!!
見大家意猶未盡，Pepsiman就攞出一條Emotiva HDMI出嚟玩吓，換走Ben哥條國產含銀HDMI線。出嚟嘅效果相比下非常出色，顏色鮮豔，聲音平衡度高。細問之下，原來條線只不過係二佰個大洋左右，希望下次HDMI比試大會會見倒 [ 佢 ] 嘅出現啦。
玩機嘅時間過得特別快，轉眼有到咗黃昏時份，臨離開之前，Pepsiman提議一聽Ben哥親自炮製嘅DIY兩聲道。播放今年影音展贈品2010原音精選SACD，我很幸福 ~ ~ 真的幸福 ~ ~ 蔡琴優美嘅歌聲隨隨哼出，背景寧靜，但發現聲底沒有膽機一貫的厚潤，何解呢？
Ben哥說著 : 由於膽機需要熱身才會好聲，而且CD機的電溶亦是新換的，絕對未入狀態。
接著係第二首You look good to me醇音樂，樂器有一定分離度，定位清楚，還原度不弱，不知是否調音秘技嘅功力。之後再聽同碟第四首由夏詔聲主唱嘅追憶，喉底聲音帶點磁性，聲音亦開始有所轉變，相信是膽開始漸入狀態，膽機特色亦逐漸浮現。最後，我哋在Ben哥嘅DIY兩聲道器材所發出的優美歌聲下，結束了這次家訪。

後記…

今次家訪嘅Ben哥，絕對係一位精明玩家，由獨立電、Yamaha Z7到Pioneer 500A，都以表現及出嚟嘅效果為首要選擇條件。其實整體嚟講，已經有不俗嘅表現，相信更換後置喇叭後會更上一層樓。

聖龍

嘩嘩嘩~~~
終於見到 ben 兄既器材喇~~~

ki45

嘩......好正呀
幾時到我呀兩位

bigpun1975

唔該曬百士佬幫我執手尾

pinkhung

西湖喎!!有眼光

ben13

見笑，見笑，八國聯軍！
今次真係多謝庄主，賓兄光臨寒舍。重有牛兄添！重有玩具再調下d音效！:handshake

pepsiman

見笑，見笑，八國聯軍！
今次真係多謝庄主，賓兄光臨寒舍。重有牛兄添！重有玩具再調下d音效！:ha ...
ben13 發表於 2010-9-12 01:09

Ben哥,
唔好咁講啦,好多謝你俾機會我地嚟打搞就真,
希望你盡快搵到合適o既後置啦....

ben13

Ben哥,
唔好咁講啦,好多謝你俾機會我地嚟打搞就真,
希望你盡快搵到合適o既後置啦.... ...
pepsiman 發表於 2010-9-12 01:13

努力緊！

ben13

西湖喎!!有眼光
pinkhung 發表於 2010-9-12 01:03

    多謝雄哥，可惜地方有限，用唔到8.1！

pinkhung

回復 9# ben13


    你都7.1+Front height啦,仲想加D乜

hkbomberman

Very nice photos and report!

ben13

回復 10# pinkhung


    係講緊對聽歌仔既前，係西湖既一個型號8.1，令你誤會，sorry!

wingchow

利害利害. 屋企擺設左好多吸音設備, 很花心機玩好套機. 又要溶入家庭之中. Ben哥既影音組合. 比起我睇好多雜誌都有心機好多!

bigpun兄既報告寫得詳細到胃. 咁大段文都搵唔到廢話..被訪者屋企玩法特別, 訪問者有心機寫.  呢篇家訪係我近年見過好好既一篇!

bigpun1975

見笑，見笑，八國聯軍！
今次真係多謝庄主，賓兄光臨寒舍。重有牛兄添！重有玩具再調下d音效！:ha ...
ben13 發表於 2010-9-12 01:09

下次有機會再到訪ben 哥, 今次時間有d 趕, 聽歌唔係好夠喉....

bigpun1975

利害利害. 屋企擺設左好多吸音設備, 很花心機玩好套機. 又要溶入家庭之中. Ben哥既影音組合. 比起我睇好多 ...
wingchow 發表於 2010-9-12 01:52

其實百士佬幫咗我好多, 我錯別字又多, 有時型容得又唔夠仔細,
我實不敢要功, 希望我日後多加改進...

ben13

回復 14# bigpun1975


    隨時都歡迎，下次既時候個盤同解碼都應該煲好。聽得應該會舒服d！

cyberken

BEN 哥不如出POST 教下大家點玩吸音/擴音...一定大受歡迎

cyberken

呢個家訪專業過其他人同雜誌既家訪多多聲..

米奇老野

識得DIY HIFI既人係最幸福.
真係好羨慕~~~~

pepsiman

回復  ben13


    你都7.1+Front height啦,仲想加D乜
pinkhung 發表於 2010-9-12 01:27

    雄哥,你呢句7.1+Front height真係.......出色....