百事佬手記(6)
百事佬披上戰衣，飈著戰羊，穿州過省，
走遍大街小巷，四出偵查，
索盡最新行程，為大家報導市場上嘅最新消息。
不經不覺，百事佬手記已經同大家闊別咗兩個月，無計啦！
年頭準備果個藍光機大作戰已經搞到頭都大埋，仲要中途殺出個KK Show，
所以都無時間出動去刮料，真係辜負咗我嘅一班忠實Fans（唔知有無呢？）
既然無乜新野，惟有刮番啲舊料啦！回顧番兔年，
我哋HIENDY真係搞咗唔少活動，可謂吃喝玩樂乜都齊，
兩聲道同多聲道同隸精彩，係仲未搞得成馬交家訪旅行團啫，
希望今年能夠完成呢個夢想啦！
++++++++++++++++++++++++++++++++++++++++++++++++++++
KK嘅熱潮係影音界真係一時無兩，年頭有幸係阿二無線電領教過KK嘅超低音柱，
果種震撼力到而家都仲記憶猶新，而近期HIENDY亦有幾位師兄不約而同入咗隻KK5000，
不過大家所配嘅器材同線材都截然不同，為咗可以更了解KK嘅特性，
百事佬四出走遍新界北以及九龍東，親身感受一下KK入屋後嘅真正威力。
先講dickyball兄嘅PK配，Pioneer加上KK，分析力與超低頻並重，
機主為KK配上DDL 1出2訊號銀線及Viablue電源線，dickyball兄將KK單元對正皇帝位，
超低頻嚟嘅時候有似一度牆撞埋嚟一樣，不過稍欠中低果浸，
於是我建議將隻KK轉為單元向左正常擺法，及換上WW Oasis 6訊號線，
量感雖然有所減少，不過超低頻正常番有番層次，起碼唔會有突如其來嘅瘋癲感。
試完PK配，急急腳落街搭的士飛去錦上路西鐵站，會合Q姐同耶穌，
由雀仔兄帶領下去到佢嘅獨立影音室一嘗OK配。雀兄所用嘅架生一D都唔野少，
七隻喇叭有六隻係座地，而對前置已經差唔多買得起我成個AV組合，
對後置亦係唔少會員用嚟聽兩聲道嘅喇叭，可想而知呢套環繞聲音質係幾咁正呢？
眾所周知雀兄所用嘅器材都係站在時代嘅尖端，所以KK一出，
雀兄諗都唔使諗就Order咗一隻返嚟玩，不過貪心嘅雀仔又點會淨係用一隻十仔吖？
加多兩隻Emotiva 12”十仔問你怕未？心想，頭先試一隻KK已經好似成度牆撞埋嚟一樣，
而家仲加多對毛仔，會唔會好似成個月球撞埋嚟咁呢？
但係由ONKYO 5509演繹出嚟又唔係咁恐怖喎，一浸浸包住我地，又幾舒服咁噃！
再偷偷望吓雀兄用緊咩線材，原來佢用緊AQ sub3 XLR，不過條電源線係DIY嚟，
唔知係乜料！咁遠嚟到元朗，就梗係試真D啦！試吓齋一隻KK，又試吓兩隻毛仔。
講真；兩隻毛仔表現絕對唔弱，但當比起隻KK，力度同乾淨度都差兩班，
始終一分錢一分貨．雀兄玩玩吓突然問我套組合有無咩進步空間，
既然問到我又唔客氣真接講出問題所在。聲音係正，
不過環繞聲因為後置喇叭太近皇帝位所以非常現形，後中置又因為座地關係，
俾張梳化背遮擋咗唔少聲音。我隨手將張梳化移前到原本皇帝位嘅前面，放低番個椅背，
將後置45度斜向新皇帝位，再校校各聲道音壓以及由朕操刀呃呎大法，
雀兄坐落去一聽，面部即時呈現喜悅。見佢咁受落，
就建議雀兄最好將後面四隻喇叭都轉為環繞聲喇叭掛上牆拉長與皇帝位距離，效果會更意想不到呢！
原來靚聲係來自馬里奧
同埋變型金剛
銀色梳化就係之前嘅皇帝位
PK同OK都試過喇，最後去埋東九龍嘅KY配。
Mark哥一向用開M&K MPS5310超低音，仲記得差唔多兩年前家訪時聽過，
係行戲院feel果隻取向。但係男人就係花心架喇，仲要係結咗婚嘅男人添！
聽得多戲院feel又想聽多玩心口……feel，所以花心嘅Mark哥忍唔住KK嘅誘惑，
溝咗佢返嚟組成KY配。為咗迎接新歡，Mark哥將原本M&K嘅位置，由KK取締咗，
但因為KK係左口魚關係，所以Mark哥特製咗一塊木板俾佢作反射之用，真係體貼！
Mark哥所用嘅訊號線係超時空，而電源線就係Northwire Double Run，
呢條訊號線係走力量路線，所以一出超低頻真係打得好狠勁，但尾音唔多，
仲有少少硬嘅感覺添。超低調校天后Q姐聽完之後即時出手，只係三兩吓手腳，
已經改變咗順耳番，彈跳力返番嚟，不過同之前兩個師兄都有同一問題，
就係縮水底褲，一個字“緊”。唉！要煲熟呢隻內藏雙12＂嘅超低音喇叭，
真係少D耐性都唔掂！最可惜果晚約咗個女撐枱腳，
無緣見識超低天后Q姐點令KK推至潮吹，可惜！可惜！
一連試咗三隻不同配合嘅KK SOUND MX-5000MKIII，果然文明不如見面，
絕對係超低音行列嘅一夥超級新星呢！
++++++++++++++++++++++++++++++++++++++++++++++++++++
之前同幾個版主&網友係舍下玩咗個Docking & USB Cable Challenge，
估唔到效果係咁明顯，亦牽起一股購買Docking熱潮，
我希望短期內可以為大家再報導一下經摸改供電系統後嘅Docking表現，密切留意。
| 
IP卡
狗仔卡
發表於 2012-2-22 09:57:43
提升卡
置頂卡
沉默卡
喧囂卡
變色卡
顯身卡
發表於 2012-2-22 10:15:00
，唔係一定更加好玩
