家訪拳王Rockychan

pepsiman

Hiendy 家訪交流室 ( 2010年10月號 之一 )

編輯 & 圖片: Pepsiman
文字: 豬賓賓


     親愛嘅Hiendy弟兄姊妹，大家好。在吃過月餅後無幾耐，汽水人又騎住隻豬，吖...唔係... 係騎住自己隻羊.... 與筆者再到港九新界出訪，而且今次仲有版主hkp1196(大蛇明)客串參與，玩蛇一定唔少得。唔知Pepsiman係咪有心整蠱，今次又要去屯門家訪 。相信大家都記得，筆者曾經迷失於屯門(應該係迷路至啱)…不過本住Hiendy精神，服務人群，無有怕，再嚟... 而今次家訪嘅對象，聽個名就知道睇得又打得，佢就係Rockychan...{:5_528:} 。



快樂的假獨居

     Rocky同屋企人住屯門友愛邨，但點解叫獨居呢... 因為屋企人從事夜間工作，晚出早歸，所以Rocky夜晚收工返嚟，整間屋就成為自己的AV小天地。政府成日都講獨居老人有幾慘，但係作為一個影音發燒友，始終希望有一個屬於自己嘅玩機地方。就以筆者為例，朝早細女未起身，唔爆得... 下午大女要做功課，又唔爆得... 夜晚食完飯，阿媽又睇公主嫁到，都唔爆得... 所以筆者對於Rocky嘅假獨居生活十分羨慕... 鍾意爆機爆到幾夜都得，又或者爆其他o野亦得.....得咗！


有誠、有成？！

     Rocky嘅影音之路，已經有三年幾了。回想起佢自己新手入行嘅經過，與筆者、以及大部份新手都差唔多。同樣地；Rocky身邊都缺乏一啲影音嘅高手，一切影音上嘅知識，都源於網絡上，又或者坊間嘅雜誌，所以實戰嘅機會(到外間試聽)可以話等於零。某日，佢終於的起心肝，單拖去有誠大厦希望買到人生第一套影音組合。一個新手上到去，只係知到自己荷包有幾多之外，大底對各品牌嘅認識都一知半解。一眾sales見倒Rocky呢個咁好(筍)嘅客人，當然唔會放過啦，馬上推介佢一款「超值套餐」。器材包括有：Yamaha AV Amp、Mission喇叭等等...。Rocky見到套機嘅價錢同自己心目中嘅預算差唔多，而且嗰Sales又猛落嘴頭，所以只好乖乖磅水，買咗呢套「超值套餐」勒。終於等到送貨嚟喇....故事當然唔會好似王子同公主咁，可以快快樂樂生活落去啦。套機返嚟玩咗一輪，Rocky先至發覺部AV Amp雖然有HDMI插頭，但係原來唔支援高清音效解碼。就係咁，好快佢就將部AV Amp換成了Onkyo 606，跟住又發覺套Mission喇叭效能上都未如想像般理想。所以；最後都將全套組合送到哥哥家中去了。

米樂、咪落！

     經過一次不愉快嘅經歷之後，Rocky明白到玩AV一定要多聽、多睇、多做功課，去了解自己需要乜野。兩年前嘅AV show，Rocky終於响米樂揾到佢想要嘅東西 >> MK喇叭組合 << 他沉醉於MK喇叭之高性能，高還原度，以及沒有任何音染之聲音中。眼前再沒有「過度熱情」的sales，亦沒有經濟實惠嘅「超值套餐」。一切一切，都源於自己嘅真感覺，所以就決定買下全套MK喇叭了。及後發覺，家中嘅環境，並不足以完全發揮隻MK MX-250的能力，所以Rocky就將之換上營造氣氛絕佳嘅JL Audio Fathom F113超低音。

一個無記性的老板

     在一個機緣巧合之下，Rocky認識倒一個同住屯門、專做HiFi電源嘅影音店老板。Rocky從他身上學到很多關於影音電源嘅知識。家訪當日，筆者就見識到Rocky家中近二萬元嘅獨立電源系統，咁當然係出自呢位「好朋友」手筆啦。呢位老板，Rocky話佢好無記性，成日唔知有心定係無意咁放低啲影音毒物，比Rocky「試玩吓」，仲要係試啱先至計（最毒呢招）。嗰日我哋就見到一個Fisch嘅拖板放響Rocky嘅電腦枱度勒，當然有時「免費試玩」嘅代價，就係乖乖奉上銀両啦！

仲未開封嘅fisch拖板



睇真啲張電腦枱，原來拳王連電腦都用到古河英式插頭，勁啊...




器材列表:

TV: Pioneer 500M －　PC: Nanotech #305



AV AMP: Onkyo 906 －　PC: Nanotech #305 ；HDMI: Wireworld Ultraviolet



POWER AMP　－　Emotiva XPA-5



BDP: Pioneer 09-FD　－　PC: PS Audio AC-12



SPK: MK S-150 X 3；MK SS-150 X 4；SC: Belden 1810A













SUBWOOFER: JL Audio Fathom F113－PC: JPS in Wall, AQ Sub-3







STB: MTV 5000



XBOX, PS3, Wii





taoc架



logitech remote



獨立電：
Power Labs電箱；ABL SURSUM 冰火MCB X 2；PC: Grey Knight









拳王的blu-ray珍藏




器材測試:

     在未試機前，先介紹一吓Rocky嘅玩機空間。約9呎乘12呎直廳，觀賞距離約為9呎，隻JL F113就放响皇帝位右邊前約4呎，比例非常合適。又攞嚟試機天碟Spiderman 3，試咗幾段，Pepsiman與筆者都發覺背景音樂唔夠出，使到睇戲時嘅氣氛大大減低，而且高頻有少少叫，同埋高低頻有銜接唔倒嘅情況。Pepsiman立刻開啟Onkyo 906嗰menu睇睇...，發覺前置及中置都Set為Full Band，環繞Set 為80Hz，LFE 80HZ，以及Double Bass: On。Pepsiman先將前、中、後置分頻點劃一改為80Hz，再將超低音的音壓加大1.5個db，JL 113嘅擺位都將佢擺後一啲，再調校一下喇叭嘅距離及音量大小。校完之後大家坐低再聽一次，聲音順耳番，無咁「拮」耳，背景音樂亦加强咗動態。















但係好奇怪，中低頻都好像有點似有還無嘅感覺，而只係感覺倒50 Hz以下超低頻掃褲管嘅感覺。所以Pepsiman再作一次超低音相位調校，由0度改到45度，然後Rocky攞出JL嘅專用收音咪再作一次音場校正。原本簡單嘅自動嘅音場校正，只需三兩分鐘理應完成，但當日並不如想像般咁順利，多次進行時都失敗，最後要做咗幾次先至成功。之後再於皇帝位試聽，發覺與之前分別不大，超低音低頻最好力嘅地方，竟然响大門口位置！咁唯有再試下其他擺位以及調校一吓，但都係未如理想。



有大蛇明嘅出現梗有毒蛇出洞








不知不覺已到了晚上十一時了，筆者為免錯失了尾班巴士，只好沖沖結束今次家訪了。


但係筆者反而想借今次家訪嘅經驗，同大家討論一吓以下三點：

1)        你覺得Subwoofer應該係有大買大，定係因應環境去買一個合適Size嘅十仔呢？
2)        線材嘅配搭，對於Subwoofer有幾大影響呢？
3)        Subwoofer嘅擺位，對於效能上又有乜唔同呢？         


多謝各位支持Hiendy家訪交流室，下次再見，拜拜！  

下期預告:

Boy哥的旗艦級組合

bigpun1975

回復 1# pepsiman


    真快手,thx!

chrisclw

好多條JPS in Wall喎

canon.hk

雖然我唔係玩過好多十仔,但以我經驗好似我屋企咁地方細細因應地方大小買一隻有質素嘅十仔表現會好d,買太大有時根本唔夠位比d聲走，擺位會仲難就，而線都好重要可以保其不足但唔好諗住可以張sunfire變成mk

maner394

MK加JL呢個組合夠新鮮..........

nwwedmond

JL支收音咪應該唔係向上calibrate, 我記得manual講過係應向前方或指向隻十仔.  如我有錯請更正.

hkp1196

當日所聽, 隻 JL 仲未發揮到佢的潛力, 我相信一來隻十仔仲未煲好, 二來係擺位問題, 令到d低頻走咗去皇帝後面, 再比多d心機調校, 應該仲有好大改善空間................

hkp1196

雖然我唔係玩過好多十仔,但以我經驗好似我屋企咁地方細細因應地方大小買一隻有質素嘅十仔表現會好d,買太大 ...
canon.hk 發表於 2010-10-14 00:49

我唔同意, 你一年已經玩過哂差不多所有牌子十仔喇..................

canon.hk

我唔同意, 你一年已經玩過哂差不多所有牌子十仔喇..................
hkp1196 發表於 2010-10-14 01:09

    唔好咁講我只係玩過幾隻入門av十仔啫未玩過d高級野

wingchow

呢類家訪報導, 真係一次比一次專業. 一次比一次吸引. 我極少係公開場合讚版主. 亦都勸各版主唔好互相加分, 最好連互相溝通都唔好. 因為唔想比人感覺小圈子,自己人. 想同大家打成一片. (雖然而家大家好enjoy玩互相扣分 ). 不過今次真係我唔讚大家既努力唔得!

就算其他雜誌網站都難以搵到呢種文筆生動, 唔會講來講去都係幾個形容詞, 睇完除左了解到機主既器材陣容, 亦都學左好多野. 相片亦都唔會重覆同埋悶, 有你地係度咁寫呢d報導, 真係令我覺得好感動. (仲要係無糧出, 只有汗出)

gundamfix2005

好詳細嘅包膠......仲好睇過av雜誌


1) 你覺得Subwoofer應該係有大買大，定係因應環境去買一個合適Size嘅十仔呢？
     因應自已環境去買，無理由買隻JL113放係幾十呎度用，隻十仔發揮唔到，如JL，分別有10，12同13吋之分，小弟選了中間個size(12吋)因環境不大。

2) 線材嘅配搭，對於Subwoofer有幾大影響呢？
     因小弟看過kachow兄之前嘅post有關JL十仔電源線分享，小弟也試過幾條線插(CSE L550, Oyaide Tunami, AET HCR EVO) JL，也認同kachow兄之高見，L550 win咗。
http://www.hiendy.com/forum/viewthread.php?tid=90

3) Subwoofer嘅擺位，對於效能上又有乜唔同呢？         
     留返比其他ching分享

bigpun1975

回復 10# wingchow


    其實我哋都係為興趣, 無諗過出乜野糧, 篇文出黎反應好我哋己經好滿足,希望大家繼續支持, 多謝!

cakecake

Hiendy 家訪交流室 ( 2010年10月號 之一 )
...........
......但係筆者反而想借今次家訪嘅經驗，同大家討論一吓以下三點：

1)        你覺得Subwoofer應該係有大買大，定係因應環境去買一個合適Size嘅十仔呢？
2)        線材嘅配搭，對於Subwoofer有幾大影響呢？
3)        Subwoofer嘅擺位，對於效能上又有乜唔同呢？ .......
pepsiman 發表於 2010-10-13 23:49

我終於....有知音人了......

Hintel

好生動report :)
樓主有齊我dream 器材:),
Mk s150 + jl subwoofer


- 發送自我的 iPhone 大板凳應用

ryanenen

回復  wingchow


    其實我哋都係為興趣, 無諗過出乜野糧, 篇文出黎反應好我哋己經好滿足,希望大家繼續 ...
bigpun1975 發表於 2010-10-14 09:16

Bigpun 愈寫愈好, 要讚!

板主, 我想問各會員比d分應該分比bigpun先岩数

kachow

好詳細嘅包膠......仲好睇過av雜誌


1) 你覺得Subwoofer應該係有大買大，定係因應環境 ...
gundamfix2005 發表於 2010-10-14 09:12

CSE能夠收個Bass實淨d. 對JL呢隻越煲越少打心口既subwoofer黎講有幫助. 不過我而家都無玩.. 可以有其他師兄試過d線更加好.. 尤其有大蛇明版主. 佢d線條條都超越晒我當年試JL既線既級數.. 可能會有新發現.

pepsiman

好生動report
樓主有齊我dream 器材,
Mk s150 + jl subwoofer


- 發送自我的 iPhone 大板凳應用 ...
Hintel 發表於 2010-10-14 10:06

肥新郎,拳王就住o係你附近,有時間你咪約佢試吓囉,
話唔定遲o的dream器材會o係你屋企出現呢...

cyberken

百事佬同豬賓呢對拍擋真係好正, 一高一, 直頭係hiendy 之光

pepsiman

Bigpun 愈寫愈好, 要讚!

板主, 我想問各會員比d分應該分比bigpun先岩数 ...
ryanenen 發表於 2010-10-14 10:34

壞人,你係唔係玩分化呀...
分數只係虛榮嘢,你出多幾句讚美嘅說話,豬賓自然會收到啦....

pepsiman

百事佬同豬賓呢對拍擋真係好正, 一高一, 直頭係hiendy 之光
cyberken 發表於 2010-10-14 13:34

    鯊魚仔,你想講一高一俊朗咪直接講囉,唔洗吞吞吐吐o架...