|
|
Hiendy 家訪交流室 ( 2010年11月號 之二 )
編輯 & 圖片: Pepsiman
文字: 豬賓
有追開家訪交流室嘅朋友，應該都知道今次訪問嘅對象係 lulu sir(網名 lulu)。在家訪之前，筆者本與lulu sir是互不相識的，只係從日常網絡交流中估計他是何許人。我曾經估計佢係一個電機工程師？因為佢無論維修音響器材，以至拉影音獨立電，都係自己一手包辦；我又估佢係一個裝修設計師？因為佢全屋嘅裝修同設計都係自己搞掂；我又估計佢係一個髮型師或者化妝師？因為佢成日叫人哋去照鏡。原來筆者通通都估錯晒，佢之所以叫做lulu sir，係因為好多網友遇上有關AV工程上嘅問題時，都會第一時間揾佢問問，朋輩之間，都認為佢係AV界嘅「曾近榮」。所以，就專稱佢為lulu sir了。
B&W 狂迷
Lulu sir 家住東九龍，屋苑依山而建，遠望九龍城舊機場海旁，風涼水冷，令人心曠神怡。一踏進lulu sir家門，筆者就已經被一對B&W 802吸引住，再行入一步，又發現一對好似書枱咁大嘅B&W後置喇叭吊喺皇帝位兩邊。細問之下，原來lulu sir對B&W品牌嘅喇叭特別情有獨鍾，已經玩過數對B&W而依然未厭。要我演繹，倒不如交比lulu sir親自講吓玩B&W嘅經歷同中HiFi毒嘅經過仲好啦。
(以下lulu sir親身自白，原汁原味絕無删剪)
某日，百事大俠與一眾高人，駕臨寒舍，說武論劍，只見多派大俠高人，在寒舍內左圈右點，每招都瀟灑優雅，匪夷所思，神而明之，威力其大，將小的彈出數丈之外，良久不起......倒地模糊間，耳邊响起.....〝 唰 〞一聲，見一小童正用右手放一枝有針的臂形物體在一轉動之黑色圓形膠上，因他年紀實在太小了，放唔正，所以發出此聲，這時，一名年約三十歲之男子走前用手按住小童左膊(小童面帶驚恐之色，心想又要滕條炆豬肉啦！)誰知，該男子用右手輕捉小童右手，語帶和藹曰〝 亞仔，係咁樣放唱針！〞隨即樂韻悠揚而起，滿室歡愉温暖.................
喂！返嚟啦！唔好發夢啦！我諗各位 大大都意會到發生乜嘢事，就係該男子令我中毒至今，雖然係回憶，但仍然感覺 老爸有力嘅手掌十分温暖，佢永遠都係我心中嘅【 強人 】。
其實小弟都係新手，識小小咋，百事佬仲叫我講講玩音響咁耐有乜心得，嘩！邊係玩音響呀，都係買啲套裝機，用返啲跟機線咋。講到啲舊史 (舊屎) 又長又臭，有乜好講吖！但佢成日《 吹 》我，咁唔爆都唔得啦，唉！為有講小小啦！
記得讀緊中學，自己買套件學整機到而家都好耐啦，用過嘅機都唔小，第一部買嘅擴音機就係 Sansui AU-7900 每聲度75W，點解咁記得，因當時仲係讀緊中三，行到鴨記一間電器行，個sale話可以做分期，咁就簽名，當時嘅我邊有可能做到分期吖，又無嘢做，對保嗰日個職員先至講叫我 老爸上會，咁樣，一星期後Sansui AU-7900就大駕光臨小舍啦！當時都唔知幾開心，頭幾晚都睇住部機瞓唔着………之後到出嚟做嘢，來來去去都係日本機款伴我過日神。
好啦！轉捩點响邊，就係我出來做嘢無耐，同事帶我去佢屋企坐，一上到佢屋企見到幾舊〝 烏黑黑 〞嘅物體，又有兩個〝 黑嗎嗎 〞嘅肥婆坐响大廳，初時都唔識係乜，但佢哋一出聲，我即時呆咗，黑人肥婆嘅聲係我從未聽過咁「真實」同「有力」。係乜黑鬼咁犀利呢？於是抄下寶號，拎去問人，才知係 Threshold SA-1 160 Watt MonoBlock Power Amp 推 B&W Matrix 801 S1，自始就不能自拔咁跌落呢個〔 洋鬼子 〕深谷，亦鍾情B&W從容不迫嘅霸氣，但想容納大肥婆，真係談何容易，無三佰呎廳都唔好諗，為有揾二奶802啦！但初初做事嘅我，邊有咁多閒錢吖，為有一路去各名牌陳列室吸毒頂引，一路儲錢，但亦受盡sale白眼...........
呵！呵！終於吐氣揚眉嘞，大約响90年代初，小弟第一套見得人嘅組合出籠啦，就係一套西裝，二手嘅Krell KBL + KSA-200推 B&W Matrix 802S2。嘿！嘿！幾威呀，一時無兩，以為天下無敵，原來都係井底蛙，入門嘢呢啫，亦同所有同好一樣，成日身痕……換過無數器材，但能收入寒舍嘅喇叭就只有B&W , ProAc , PMC , Dynaudio，最終都係B&W最得我心……..其它嘅唔係唔好，只係個人喜好，聽過就算。由M802S2開始，廠出新配件，如完全分離中高/低音分音電路板、低音控制器、金屬膜半球體磁液冷卻高音、Anchor腳架都一一買來一試，對音色真係有幫助，其後到M802S3都在寒舍作客多個春秋。
98年令我無法忘記的一刻，由如當年初聽黑人肥婆出聲之一剎那，M802轉款到N802個樣，嘩！由如一件藝術品.....太靚啦！跟住睇吓價錢，係舊款嘅三倍，即時無心機，但對衰腳又唔聽話，未等我同意就行咗入去試音室，仲拉埋我上身入去，跟住點？咪响入面high咗成個鐘囉，的確高、中、低都贏舊款，為有努力工作，最終都贏得美人歸 ~~ 呀！係贏得肥婆歸先至真 ^0^
至於有人話B&W高頻伸延不足，中頻又淋，低頻肥大、含糊、緩慢，有點【累累贅贅】嘅感覺，無錯，B&W要800D系列才真正擺脫以上幾點(小弟覺得係「幾點」，並不是「缺點」)，802D因改用鑽石膜高音，低頻改用Rohacell較輕物料，應變快咗，高中低嘅反應變得大致上一致嘅『温純』中性喇叭，有點兒直迫Watt仔嘅爆炸力，但這是B&W獨有韻味、聲底嗎？其他Hi End同價品牌能清澈無誤哋原本演繹Hi-Fi，可惜未能隨時營做出如此豐滿，從容不迫的音樂感，氣氛，及獨有嘅霸氣，諸君有無試過飲多小小紅酒，未醉，仍清醒嗰種feeling？這正正就是這英國品牌嘅味道。當今大量線材、器材，一定可以將B&W推到另一境界。
以上是小弟對B&W嘅睇法，因個人口味同埋係佢嘅fans，故一定有偏差，各位高人有錯請指點，其實我仲想講吓用乜用乜去配合佢，得出嚟係乜嘢聲，但又長又臭，都係唔發嗡風啦！
聽lulu sir講咗咁耐，不如睇吓lulu sir嘅器材先啦：
AV系統
DVDP : Marantz DV-9500 ( AET HIN )
BDP : Panasonic DMP-BDT300 ( Kharma KPC-M-1A )
LDP : Pioneer LD-X1
AV Amp : Denon AVR-4308 ( Apex Audio Ampcord )
Projector : Sony VPL-VW50
Screen : OS 100” white mat
Center Spk : Revel Performa C30 with stand ( AQ CV-8 36v )
Surround Spk : B&W FCM 8 ( Belden 8471 )
左後置
右後置
喇叭大特寫
Surround Back Spk : JBL control 52 ( Belden 8471 )
Sub. : Sunfire Trubwoofer EQ12
(Apex Audio Ampcord ) ( QED Signature )
兩聲道系統
CDP : Metronome T2i-Signature
( Voodo Golden Dragon ) (VDH Orchid XLR )
Pre Amp : Pass labs X1 ( Stealth M5000 ) ( TaraLabs Vector 1 XLR )
Power Amp : Pass Labs X350.5 ( NBS Black Label )
Spk : B&W N802 ( Kimber KS3033 )
*獨立電三組, 兩組用Wattgate 381 Gold蘇底, 一組用SINE 冷凍 Gold蘇底
*一組Wattgate 381 Gold蘇底插 AET HIN 去DIY 2000W隔離牛, 分別去前級,CDP, BDP, SACDP,
*一組Wattgate 381 Gold蘇底去 Pass Labs X350.5
*一組SINE 冷凍 Gold蘇底去 AV amp, Subwoofer
敗於一條 HDMI 手上....
lulu sir從舊居搬到現址都係三幾個月嘅時間，屋內裝修雖唔稱得上係美輪美奐，但當知道係lulu sir自己一手一腳粉飾出嚟，真係不禁讚嘆不已。之前舊居嘅器材，大部分都跟隨lulu sir一同搬到新居，但唯獨中置及後中置嘅命運就無咁幸福嘞，lulu sir換上咗revel中置同埋JBL後中置。至於一直纏繞住lulu sir嘅SONY VW50投影機表現仍然一如以往，相當失色。要用言詞形容相信好難令讀者感受到，所以用呢兩句去表達應該會好啲；〝明明放咗隻Blu-ray入去，點解會變咗DVD畫質架？〞畫面仲有啲閃閃吓，又變晒色添..... 咁唯有抆晒啲線再插過，但結果都係一樣。苦無對策之下，不得不call SONY嘅技術支援幫手，不過最後都係搞唔掂。最終；lulu sir唯有將成部投影機送回原廠檢查。檢查完畢，SONY嘅回覆係：部投影機一啲問題都無喎！Lulu sir聽完真係頭都大埋，咁啱網友ryanenen換投影機條HDMI線，舊有嗰條WW ultraviolet吉咗出嚟，於是乎就攞埋條線上lulu sir度睇下幫唔幫倒手。Ryan上到去二話不說就將原本投影機條Golden Sound HDMI線換上WW ultraviolet，lulu sir對此原本都冇乜期望嘅，點知一見個畫面，大家都笑了..... 畫面回復正常，lulu sir話從未見過部機有咁靚嘅畫面，開心到喊咗出嚟。Ryan就邊笑邊講：傻佬，你條HDMI有事都唔知，真係激死！Ryan估計，lulu sir舊有嗰條線，係一條舊款HDMI線，並唔支援高清畫面及音效傳送，所以搞出一個咁大嘅笑話。估唔到lulu sir英明一世，竟然敗於一條HDMI線之下.....。
Golden Sound HDMI
WW ultraviolet HDMI
遮光之重要性
Lulu sir搞番掂部投影機之後，都有去校過個畫面，但係校極都唔係好滿意，所以今次我哋嘅任務係極具挑戰嘅〝調校畫面〞。校機之前，先關掉投影機所有影像優化功能。之後筆者同Pepsiman左調調右調調，再將之儲存在另一個save裡面。之後，放隻Iron man 2去比較一下之前的畫面，發覺之前嘅畫面有偏藍同爆光嘅情況，經調校之後，主角面部膚色回復正常，鐵甲奇俠的金屬感更加强烈。跟手再揾隻忍者剌客考驗一吓部投影機嘅黑位分析能力，以阿rain逃出貨倉一段測試，發覺並不是太理想，黑位有啲黐地嘅感覺，黑位同暗位嘅細節流失都比較嚴重。lulu sir 解釋道：現時用緊嘅OS投影白幕，係多年前嘅產品，質素低之餘並已經出現老化嘅情況，依家正考慮換上一枝全新嘅灰幕，希望可以加强畫面黑位與暗位嘅層次。因為lulu sir家居牆身以淺色為主，所以在開投影機睇戲嘅時候，會出現反光嘅情況，Pepsiman就建議在投影幕兩邊嘅牆身加番幅黑布用嚟遮光，效果一定比現時優勝。剛巧lulu sir裝修時有塊黑布剩低，Pepsiman就馬上將佢掛於其中一面牆身去作一個比較。相比下，發覺不但解決咗反光嘅問題，而且幕邊嘅黑位同灰位嘅層次亦有所提升，又因少咗多餘嘅反射光進入觀看者的眼睛，投入感亦因此大增。lulu sir接受咗Pepsiman嘅建議，表示會盡快加番兩塊黑絨窗簾布於兩邊側牆，加強影院嘅效果咁話。
調校前
調校後
調校前
調校後
自動音牆校正應否用嗎?
自動音牆校正應否使用，一向都係好多玩家嘅疑問。lulu sir就試過用部 Denon 4308嘅自動音場校正去調校，發覺啲聲好怪，各喇叭嘅頻律都好似大幅度被壓低，由其超低音被壓低得最緊要。最後lulu sir都要熄咗部AV Amp嘅 Audyssey EQ，情況先有所改善，但係都未係好滿意嘅程度。此時，Pepsiman再以忍者剌客阿rain逃出貨倉一幕去測試一吓環繞聲，發覺前置同中置聲，與後置同後中置唔係好連貫，後中置嘅音壓仲嚴重偏低。聽完之後，Pepsiman就先將中置於AV Amp裡面嘅音壓校到0 db，再以測音計量度中置喇叭所出嚟嘅音壓，記低得出嚟嘅數值，然後將前置調至細中置2 db，再將後置同後中置調至大前置3 db，之後再將前、後及後中置之左右喇叭聲壓調整到相同。由於成套AV組合有幾隻唔同牌子嘅喇叭，所以Pepsiman要在AV Amp嘅EQ裡面作出適當嘅微調。再以忍者剌客先前測試的一幕再聽，中置人聲變得開揚，前面音效與後面唔連接嘅情況已經無再出現，可以清楚聽倒戲裡頭嘅忍者飛標聲，係由前置出，而後中置收。跟住lulu sir要求試套佢最熟識嘅功夫熊貓，一連試大砲逃獄，搶包及天山吊橋一段。見lulu sir睇得非常投入，面露出滿意嘅表情，就知道佢完全收貨了。Pepsiman解釋道: 由於AV Amp使用收音咪作自動音牆校正，但收音咪設計與人耳構造有別，所以一般後置及後中置都會比前中置細聲，但要調高多少，就真是需要用多幾套戲實試才知道。以現時lulu sir的後置佈局，如能將皇帝位移前數尺，一定有更佳的環繞聲效果。
筆者有幸見到對B&W 802，當然唔會錯過佢表演嘅機會啦，最後...在一遍美妙嘅音樂聲中，結束了今次家訪喇。
後記.....
今次嘅家訪對象lulu sir，經常以新手自居，講野又冇離正經，寫嘢又寫到好似武俠小說咁..... 但其實lulu sir對器材擺位，以至裝修佈置，都有一番心德，令到筆者穫益良多。同時；原本lulu sir同埋佢老細都係一對貓貓愛好者嚟，唔怪得屋企成地都有膠釘墊啦。
特別送上lulu sir精心設計的機頂盒擺放方法讓會員大開眼界...
再次多謝各位收睇家訪交流室，拜拜！
下期預告:
gundamfix2005的六國大封相組合
|
評分
-
24
查看全部評分
-
|
IP卡
狗仔卡
發表於 2010-11-27 23:51:43
提升卡
置頂卡
沉默卡
喧囂卡
變色卡
顯身卡
發表於 2010-11-28 00:03:39
好多細節位都精心佈處! 例如夾高晒d線唔掂地.. 
lulu sir 成日扮新手.......
發表於 2010-11-28 01:35:26
全套B&W!!!
